प्रदेश १ को प्रदेशसभा बैठक आज बस्दै, सञ्चालन हुने–नहुनेमा अन्योल

A+ A A-

प्रदेश १ को प्रदेशसभा बैठक आज बस्दै छ । नेकपाको विवादका कारण स्थगित बैठक सभामुख प्रदीपकुमार भण्डारीले आज दिउँसो २ बजेका लागि डाकेका छन् । तर, बैठक सञ्चालन हुने या नहुने विषयमा अन्योल कायमै छ ।

मुख्यमन्त्री शेरधन राई पक्षले भीम आचार्य पक्षका १६ जना सांसदलाई गरेको कारबाहीको विषय टुंगो नलागी बैठक अघि बढ्न नसक्ने अडान राख्दै आएको छ ।

आचार्य पक्ष र पमुख प्रतिपक्षी नेपाली कांग्रेसले प्रदेशसभा सञ्चालन गरी मुख्यमन्त्री राईविरुद्धको अविश्वास प्रस्ताव टेबुल गराउन सभामुख भण्डारीलाई दबाब दिँदै आएका छन् । तर, मुख्यमन्त्री पक्षले दल विभाजन टुंगो नलागी बैठक सञ्चालन गरिए अवरुद्ध पार्ने रणनीति लिएको छ । सोही कारण आजका लागि डाकिएको बैठक सञ्चालन हुने वा नहुने विषयमा अन्योल छ ।

प्रदेशसभा सचिव गोपाल पराजुलीले आज दिउँसो २ बजेका लागि प्रदेशसभा बैठक डाकिएको शिलापत्रलाई बताए । ‘अहिले म अफिस जाँदैछु । त्यहाँ पुगेपछि सबै कुरा थाहा हुन्छ’ उनले भने ।

सभामुख भण्डारीले प्रदेशसभा बैठक सञ्चालन हुने या नहुने बारेमा केही खुलाउन चाहेनन् । ‘अहिले म व्यस्त छु । पछि कुरा गरौँला,’ उनले भने ।

प्रदेश १ मा हिउँदे अधिवेशन सुरु भएको एक महिनाभन्दा बढी समय पुग्न लाग्दा पनि ओली र प्रचण्ड–माधव समूहमा विभाजित भएको नेकपाको विवादका कारण बैठक अघि बढ्न सकेको छैन । नेकपामा एक समूहले अर्काे समूहलाई गरेको कारबाहीको विवाद टुंगो नलागेका कारण बैठक अघि बढ्न नसकेको हो ।

मुख्यमन्त्री राईविरुद्ध प्रदेशसभा सचिवालयमा अविश्वासको प्रस्ताव दर्ता भएकै अवस्थामा ७ माघमा विवादकै बीच प्रदेश प्रमुख सोमनाथ अधिकारी प्यासीले पठाएको हिउँदे अधिवेशन आह्वानको पत्र पढेर २५ माघसम्मका लागि प्रदेशसभा स्थगित गरिएको थियो । २५ गतेको बैठक पनि सत्तापक्षकै अवरोधका कारण स्थगित गरेर ९ फागुनमा सभामुख भण्डारीले अर्को बैठक डाकेका थिए ।

सत्तारुढ दलकै ३७ जना सांसदको हस्ताक्षरसहित नेकपाको ओली समूहमा रहेका मुख्यमन्त्री राईविरुद्ध प्रचण्ड–माधव समूहमा रहेका आचार्य पक्षले अविश्वास प्रस्ताव दर्ता गरेपछि प्रदेशमा नेकपा विवाद चुलिएको थियो । त्यसयता नेकपाका दुवै समूहबीच कारबाहीको जुहारी नै चल्यो । सोही विवाद टुंगो नलाग्दा प्रदेशसभा नै बन्धक बनेको छ ।

अविश्वास प्रस्ताव दर्ता गरेपछि मुख्यमन्त्री राईले दलको नेताको हैसियतमा पार्टीको हितविपरीत, पार्टीको विधान, कानून, संविधान र संसद् नियमावलीविपरीत गतिविधि गरेको भन्दै आचार्य पक्षका १६ जना सांसदलाई तीन महिनासम्मका लागि निलम्बन गरेका छन् ।

त्यसपछि प्रचण्ड–माधव समूहले बहुमत रहेको दावी गर्दै मुख्यमन्त्री राईलाई दलको नेताबाट हटाउँदै मुख्यमन्त्रीसहित उनी पक्षका ८ जना सांसदलाई कारबाही गरेको घोषणा गर्‍यो । सो समूहले आचार्यलाई दलको नेता बनाएको घोषणा गरेको छ । सोही विवादका कारण अविश्वासको प्रस्ताव अघि बढ्न सकेको छैन ।

राई पक्षले पार्टीको विधान, संविधान, कानुन र संसद् नियमावलीअनुसार १६ जना सांसदलाई कारबाही गरिएकाले त्यसको टुंगो लागेपछि मात्र संसद् सुरु हुनुपर्ने अडान राखेको छ ।

बैठक सञ्चालन हुन नदिने रणनीतिमा राईपक्ष

कानुनी रूपमा दल विभाजन नभएको हालको अवस्थामा संसदीय दलले गरेको कारबाही टुंगो नलागी अविश्वास प्रस्ताव अघि बढ्न नसक्ने राई पक्षको अडान छ । ‘१६ जना माननीयज्यूहरूलाई संसदीय दलले वैधानिक रुपमा गरेको कारबाही र दल विभाजनको टुंगो नलागी प्रदेशसभा बैठक सञ्चालन हुन सक्दैन,’ नेकपा प्रमुख सचेतक बुद्धिकुमार राजभण्डारीले भने, ‘नियम कानूनअनुसार गरिएको कारबाही टुंगो नलागी बैठक अगडि बढ्न दिँदैनौँ । अस्ति जसरी बैठक स्थगित भएको थियो आज पनि हुने त्यही नै हो ।’

उता आचार्य पक्षले बैठक सञ्चालन हुने जनाएको छ । आचार्य पक्षका पूर्वआर्थिक मामिला तथा योजनामन्त्री इन्द्रबहादुर आङ्बोले संसद् बैठक सुरु गराई अविश्वासको प्रस्तावमाथि छलफल गराउनुपर्ने बताए ।

‘मुख्यमन्त्री पक्षले कतिपटक चाहिँ बैठक स्थगित गराउनुहुन्छ ? सरकारले आँफैले बोलाएको बैठक कतिचोटि रोक्ने ? लाज हुँदैन ? सामान्य संसदीय मूल्यमान्यताअनुसार मुख्यमन्त्रीले संसदमा फेस गर्नुपर्छ,’ उनले भने, ‘हामीले संसद् नियमित प्रक्रियामा अगाडि बढाइयोस् भनेर सभामुखज्यूलाई आग्रह गरेका छौँ ।’

यता प्रमुख प्रतिपक्ष दल नेपाली कांग्रेसका प्रमुख सचेतक केदार कार्कीले हालसम्म अन्य कुनै सूचना नआएकाले प्रदेशसभा बैठक सञ्चालन हुने दाबी गरे ।

‘परामर्श समितिको बैठक अस्ति नै बसिसकेको छ । अहिलेसम्म कुनै सूचना नआएकाले आजको बैठक सञ्चालन हुन्छ भन्नेमा छौँ ।’ उनले भने, ‘बैठक सञ्चालन भएर अविश्वास प्रस्ताव टेबुल गराउनुपर्छ ।’

प्रकाशित मिति: आइतबार, फागुन ९, २०७७ १०:४४