बालकृष्ण ढुंगेललाई मञ्चमा राखेर बादलले भने : अपराधीलाई छुट दिँदैनौँ

A+ A A-

नेकपा ओली समूहका नेता तथा गृहमन्त्री रामबहादुर थापा 'बादल'ले शनिबार विराटनगरमा आयोजित जनसभालाई सम्बोधन गर्दै कुनै पनि अपराधीलाई सरकारले छुट् नदिने बताए ।

‘आज यस एतिहासिक सभामार्फत म सबै अपराधीलाई सचेत गर्न चाहन्छु कि यो सरकारले कुनै पनि अपराधीलाई कुनै प्रकारको छुट दिने छैन । कुनै भ्रष्टाचारीलाई कुनै प्रकारको छुट दिने छैन,’ उनले भने, ‘हाम्रो नीति भ्रष्टाचारविरुद्ध शून्य सहनशीलताको नीति हो । त्यस्तै, अन्य सबै प्रकारका अपधारमा पनि शून्य सहनशीलताको नीति हो । र, यसलाई हामीले सफलतापूर्वक अगाडि बढाइराखेका छौँ ।’

बादलले भाषणका क्रममा सरकारको तीन वर्षको अवधिमा देशमा गुण्डागर्दीका साथै टोले गुण्डा र नाइकेको अन्त्य भएको पनि सुनाए । उनले सरकारले महिला हिंसाविरुद्ध अभियान पनि चलाएको बताए ।

‘अस्ति भर्खरै हाम्रो प्रधानमन्त्रीले भन्नुभएको थियो- अपराधीहरूलाई, महिलाहरूको बलात्कार गर्नेलाई पानीमुनि गए पनि छोड्ने छैनौँ । प्रधानमन्त्रीको त्यो उद्घोषलाई सावित गर्‍यौँ' उनले भने, 'भागरथीका हत्यारा बलात्कारीलाई कानुनको कठगरामा उभ्याउन सफल भएका छौँ । निर्मला पन्तको हत्या र बलात्कारी पनि कानुनको पञ्जानजिक आइसकेको छ । त्यसलाई पनि हामी छिटै कानुनको कठ्गरामा उभ्याउने छौँ ।’

मञ्चमा उनले अपराधविरुद्ध शून्य शहनशीलताको नीति अबलम्बन गरी जस्तोसुकै अपराधीलाई कुनै प्रकारको छुट नदिने बताइरहँदा उनको छेउमै थिए, कर्तव्य ज्यान मुद्दामा अदालतबाट सजाय पाएका बालकृष्ण ढुंगले । ढुंगेल तीनै व्यक्ति हुन जसलाई ओखलढुंगाका उज्जन श्रेष्ठको हत्यामा संलग्न ठहर गर्दै सजाय दिएको थियो । तर, हत्यामा अदालतले दोषी करार गरेका उनै ढुंगेलाई ओली नेतृत्वकै सरकारले आममाफी दिँदै रिहा गरेको थियो ।

सशस्त्र युद्धकालमा ओखलढुंगाका उज्जनकुमार श्रेष्ठ हत्या अभियोगमा सर्वोच्च अदालतबाट दोषी ठहर भई जेल सजायँ भोगिरहेका तत्कालीन माओवादीका नेता ढुंगेल गणतन्त्र दिवसका अवसरमा रिहा भएका थिए । सरकारको सिफारिसमा १५ जेठ २०७५ मा गणतन्त्र दिवसको अवसरमा सरकारको सिफारिसमा राष्ट्रपति विद्यादेवी भण्डारीले आममाफी दिएकी थिएन् ।

को हुन ढुंगेल ?

सशस्त्र युद्धकालमा २०५५ सालमा ओखलढुंगाका श्रेष्ठको हत्या गरेको अभियोगमा ढुंगेललाई जिल्ला अदालत ओखलढुंगाला २०६१ सालमै सर्वस्वसहित जन्मकैदको सजाय सुनाएको थियो । त्यसपछि पक्राउ परेर कैद सजाय भुक्तान गरिरहेका बेला पुनरावेदन अदालतले फैसला उल्ट्याइदिएपछि उनी रिहा भएका थिए । त्यसपछि तत्कालीन माओवादीका तर्फबाट २०६४ सालको पहिलो संविधानसभा सदस्यमा उनी ओखलढुंगाबाट निर्वाचितसमेत भएका थिए ।

२०६६ सालमा सर्वोच्च अदालतले जिल्ला अदालतकै फैसलालाई सदर गरेपछि भने उनी फरार अभियुक्त बने । तर राजनीतिक रूपमा भने उनी निरन्तर सक्रिय थिए । सर्वोच्चले बारम्बार ताकेता गर्दा पनि प्रहरीले पक्राउ गर्न आनाकानी गरिरहेकामा अदालतको आदेश कार्यान्वयन नगरेको भन्दै ४ कात्तिक २०७४ मा प्रहरी प्रमुखविरुद्ध अवहेलना मुद्दा दायर भएपछि ढुंगेल पक्राउ परेका थिए । त्यसपछि जेलमा रहेका ढुंगेललाई सरकारको सिफारिसमा राष्ट्रपतिले आममाफी दिएकी थिइन् ।

माआवादी पुष्ठभूमिका ढुंगेल जनयुद्धका सर्वोच्च कमाण्डर रहेका प्रचण्डको साथ छाडेर ओलीले नेतृत्व गरेको नेकपाको केन्द्रीय सदस्य छन् । ओली समूहमा लागेपछि उनले प्रचण्डको चर्को आलोचना गर्दै आएका छन् ।

विराटनगरको जनसभामा सम्बोधन गर्दै अबको आन्दोलनमा कोही बलिदान भए मृतक हुन्छ कि शहीद भन्दै प्रचण्डसँग जवाफ मागेका थिए । नेतृत्वको गरेको जनयुद्धमा बलिदान गरेकाहरूलाई शहीद होइन मृतक मात्र बनाइएको छ । अब प्रचण्डले गर्ने आन्दोलनमा कोही बलिदान भए मृतक हुन्छ कि शहीद ? जवाफ चाहियो’ उनले भने ।

प्रकाशित मिति: शनिबार, फागुन ८, २०७७ १८:४४