विराटनगरमा ओली समूहकाे सभा, कार्यकर्ता भेला पार्न १५ सय बस, सम्बाेधनका लागि प्रधानमन्त्री र गृहमन्त्री जाँदै

विराटनगरमा ओली समूहकाे सभा, कार्यकर्ता भेला पार्न १५ सय बस, सम्बाेधनका लागि प्रधानमन्त्री र गृहमन्त्री जाँदै

सभाका लागि तयार गरिएकाे मञ्च

A+ A A-

नेकपा ओली समूहले आज विराटनगरमा शक्ति प्रदर्शनसहित सभा गर्दैछ । प्रदेश १ को राजधानीमा पहिलो पटक ओली समूहले जनसभा गर्न लागेको हो । प्रदेश १ मा प्रधानमन्त्री केपी ओलीको गृहजिल्ला पनि रहेकाले विराटनगरमा हुन लागेकाे सभालाई चासोका साथ हेरिएको छ ।

विराटनगर महानगरपालिका–२ स्थित विराट नर्सिङ होमनजिकैकाे मैदानमा आयोजित सभामा करिब डेढलाख कार्यकर्ता उतार्ने दाबी ओली समूहले गरेकाे छ । विराटनगर बजार क्षेत्रमा जनसभा आयोजना गर्दा जनतालाई असर पर्ने भएकाले खुल्ला ठाउँमा कार्यक्रम गरिएको नेकपा ओली समूहका केन्द्रीय सदस्य विनोद ढकालले शिलापत्रलाई बताए ।

उनका अनुसार जनसभालाई प्रधानमन्त्री ओलीसहित गृहमन्त्री रामबहादुर थापा 'बादल', नेता सुवासचन्द्र नेम्वाङ र प्रदेशका मुख्यमन्त्री शेरधन राईलगायतले सम्बोधन गर्ने कार्यक्रम छ ।

उनले सभामा उपस्थित हुने कार्यकर्ताका लागि विभिन्न स्थानबाट एक हजार पाँच सय सार्वजनिक बसको व्यवस्था गरिएको बताए । समर्थक तथा कार्यकर्ता निजी सवारी र मोटरसाइकलमा पनि आउने ढकालकाे भनाइ छ ।

‘डेढ लाख समर्थककाे सहभागिता जनसभामा रहनेछ’, उनले दाबी गरे ।

उनका अनुसार मध्यान्ह १२ बजेदेखि विराटनगरका विभिन्न छ वटा पाेइन्टबाट जुलुस निकालिने छ । त्यसअघि ११ बजेदेखि नै सभास्थलमा सांस्कृतिक कार्यक्रम सुरु हुने उनले बताए । जुलुस सभास्थलमा पुगेपछि साढे १२ बजेदेखि औपचारिक कार्यक्रम सुरु हुने उनकाे भनाइ छ ।

प्रधानमन्त्री ओली बिहान ११ बजे विराटनगर आइपुग्ने कार्यक्रम छ । उनी सम्बोधनपछि प्रदेश १ मै हुने अन्य कार्यक्रममा सहभागी भएर अपराह्न ४ बजे काठमाडाैं फर्कने छन् । ओलीसहित शीर्ष नेताहरूकाे सम्बोधनलाई दुई ठाउँबाट स्क्रिनमार्फत देखाउने तयारी रहेको ढकालले जानकारी दिए ।

प्रधानमन्त्री ओलीसहित शीर्ष नेताहरू विराटनगर आउने भएपछि विराटनगरलगायत आसपास सुरक्षा व्यवस्था कडा पारिएको छ । विराटनगरमा शुक्रबारबाटै नेपाली सेना, नेपाल र सशस्त्र प्रहरी तथा राष्ट्रिय अनुसन्धानबाट सुरक्षाको प्रबन्ध मिलाइएको छ ।

शनिबार बिहानैदेखि विराटनगरमा ठूलो संख्यामा पोसाक र हतियारसहितका सुरक्षाकर्मी परिचालन गरिएका छन् । ठाउँठाउँमा नेपाल र सशस्त्र प्रहरीको उपस्थिति बाक्लो बनाइएको छ । सादा पोसाकका सुरक्षाकर्मी पनि उत्तिकै संख्यामा खटाइएको सुरक्षा निकायहरूले जनाएका छन् ।

नेपाली सेनाको टोलीसमेत सादा पोसाकमा खटिएको छ । प्रधानमन्त्रीसहित शीर्ष नेतृत्व विराटनगर आउने भएकाले सुरक्षा सतर्कता उच्च बनाइएको जिल्ला प्रहरी कार्यालय मोरङका प्रमुख प्रहरी उपरीक्षक सन्तोष खड्काले जानकारी दिए । ‘प्रधानमन्त्रीज्यूको सुरक्षासँगै जनसभामा सहभागी हुने आम जनसमुदायको सभास्थल जाँदासम्मको सुरक्षा प्रबन्ध गरिएको छ’, उनले भने, ‘व्यवस्थित तरिकाले प्रशस्त र भरपर्दो सुरक्षा व्यवस्था अबलम्बलन गरेका छौँ ।’

जनसभाको पूर्वसन्ध्यामा शुक्रबार ओली समूहले विराटनगरमा शक्ति प्रदर्शनसहित मार्च पास गरेको थियो । जनसभाको प्रचार–प्रसारका लागि भन्दै बिहीबार विराटनगरमा मोटरसाइकल र्‍याली निकालिएकाे थियो ।

प्रधानमन्त्री ओलीको सिफारिसमा राष्ट्रपति विद्यादेवी भण्डारीले ५ पुसमा प्रतिनिधिसभा विघटन गरेपछि नेकपा राजनीतिक रूपमा दुई समूहमा विभाजित छ । यद्यपि, याे फुटले कानुनी मान्यता पाएको छैन । प्रतिनिधिसभा विघटनसम्बन्धी मुद्दा सर्वाेच्च अदालतमा विचाराधीन छ । नेकपाको एउटा समूहको नेतृत्व प्रधानमन्त्री ओलीले गरेका छन् भने अर्को समूहले नेतृत्व प्रचण्ड र माधवकुमार नेपालले गरेका छन् ।

प्रचण्ड–नेपाल समूह प्रतिनिधिसभा विघटनविरुद्ध चरणबद्ध आन्दोलनमा छ । उक्त समूहले शक्ति प्रदर्शनसहित विरोधसभा गरिरहेकाे छ । ओली समूहले आफ्नो शक्ति प्रदर्शनसहित देशभर जनसभा गरिरहेको छ । केही दिनअघि मात्र ओली समूहले लम्बिनी प्रदेशको बुटवलमा जनसभा गरेको थियो ।

प्रकाशित मिति: शनिबार, फागुन ८, २०७७ ०९:००