हिमालयन बैंक : सञ्चालन र कर्मचारी खर्च घट्यो, नाफा बढ्यो

A+ A A-

निक्षेप र कर्जा

हिमालयन बैंकले चैत मसान्तसम्ममा १ खर्ब ८ करोड रुपैयाँ निक्षेप संकलन गरेर ९३ अर्ब ७७ करोड रुपैयाँ कर्जा लगानी गरेको छ । निक्षेप रकम गत वर्षभन्दा ९ प्रतिशत बढेको छ | गत वर्ष यही अवधिमा निक्षेप करिब ९९ अर्ब रुपैयाँ थियो । कर्जा लगानी गत वर्षभन्दा ११ अर्ब रुपैयाँ बढेर ९३ अर्ब रुपैयाँ पुगेको छ | कर्जा लगानी झन्डै १४ प्रतिशत बढेको छ ।

खुद ब्याज आम्दानी

कर्जा लगानीबाट ८ अर्ब ५५ करोड रुपैयाँ ब्याज आम्दानी गरेको छ । ब्याज खर्च रकम ४ अर्ब ७९ करोड रुपैयाँपछि ३ अर्ब ७५ करोड रुपैयाँ खुद ब्याज आम्दानी गरेको छ । ब्याज आम्दानी १९ प्रतिशत बढेको छ भने ब्याज खर्च २१ प्रतिशत बढेको छ । खुद ब्याज आम्दानी १७ प्रतिशत बढेको छ ।

अन्य आम्दानीपछिको खुद आम्दानी

शुल्क तथा कमिसनबाट हुने खुद आम्दानी अघिल्लो वर्षको यही अवधिभन्दा ७ प्रतिशतले बढेर ५० करोड १६ लाख रुपैयाँ पुगेको छ ।

शुल्क, कमिसन र ब्याज आम्दानी रकम ४ अर्ब २५ करोड रुपैयाँ छ । अघिल्लो वर्षभन्दा यस्तो आम्दानी यस वर्ष १६ प्रतिशत बढेको छ ।

शुल्क, कमिसन र ब्याज, ट्रेडिङ र अन्य सञ्चालन आम्दानीपछिको कुल सञ्चालन आम्दानी ४ अर्ब ९० करोड रुपैयाँ छ । अघिल्लो वर्षभन्दा यस्तो आम्दानी यस वर्ष १५ प्रतिशत बढेको छ ।

सम्भावित नोक्सानी व्यवस्थापछि ४ अर्ब ६७ करोड रुपैयाँ खुद सञ्चालन आम्दानी गरेको छ । यस्तो आम्दानी अघिल्लो वर्षभन्दा २० प्रतिशत बढेको छ । सम्भावित नोक्सानीबाट फिर्ता आएको रकमभन्दा बढी रकम नोक्सानी व्यवस्थामा राख्नुपरेको छ । यस्तो रकमको अंक २३ करोड १२ लाख रुपैयाँ छ ।

कर्मचारी खर्च (बोनससहित), सञ्चालन खर्च र ह्रास कट्टी व्यवस्थापछिको सञ्चालन आम्दानी २ अर्ब ८६ करोड रुपैयाँ छ । यस्तो आम्दानी अघिल्लो वर्षभन्दा ३२ प्रतिशत बढी हो ।

गैरसञ्चालनबाट आम्दानी र आयकरपछि २ अर्ब १ करोड रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा १० प्रतिशत बढेको छ ।

नाफा-नोक्सान बाँडफाँट

चैत मसान्तसम्मको सम्भावित खुद नाफा बाँडफाँट हिसाबअनुसार वैधानिक कोषमा ४० करोड २८ लाख रुपैयाँ, संस्थागत सामाजिक दायित्वमा २ करोड १ लाख रुपैयाँ, नियमकीय जगेडामा २५ करोड ६८ लाख रुपैयाँ व्यवस्थापछिको बचत सञ्चित नाफा रकम १ अर्ब ३३ लाख रुपैयाँ छ ।

सञ्चित भनेर देखिएको रकम सबै नाफा वितरणका लागि योग्य नहुन पनि सक्छ । अन्तिम प्रतिवेदन नआएसम्म यसलाई आधार लिएर नाफा यति बाँडन सक्छ भनेर अहिले अड्कल काट्दा अलि हतार हुन सक्छ । लगानी भएको तर प्राप्त नभएको रकमलाई पनि आम्दानीमा देखाइने लेखा प्रणाली भएको हुँदा सालतमामीसम्म रकम प्राप्त हुन सक्ने समयावधि पर्खनुपर्ने हुन्छ । कतिपय लगानीबाट ब्याज प्राप्त नहुने पनि हुन्छ । तर, ब्याज आम्दानी भनेर लेखांकन गरिन्छ । कथं कागजी आम्दानी बाँधिएको सबै रकम प्राप्त भएमा पनि बचत वा सञ्चितिको अंकमा देखिए जति सबै रकम सेयरधनीलाई नाफा बाँडिन्छ भन्ने हुन्न । त्यसबाट पनि केही रकम सर्वसञ्चित कोषमा रहन सक्छ ।

चैत मसान्तको सञ्चित नाफा रकमलाई आधार मान्दा असार मसान्तसम्ममा यस्तो रकम १ अर्ब ७७ करोड रुपैयाँ हुने अनुमान गर्न सकिन्छ ।

पुँजी र कोषहरु

बैंकको पुँजी ८ अर्ब ५२ करोड रुपैयाँ छ । विभिन्न वर्षको नाफाबाट सञ्चित हुँदै आएको रकम र चैत मसान्तसम्मको सञ्चित नाफासहित १ अर्ब ५५ करोड रुपैयाँ सञ्चित नाफा देखिन्छ ।

वैधानिक जगेडा, अन्य जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत गरी बैंकको जगेडा कोष ५ अर्ब १९ करोड रुपैयाँ देखिन्छ । सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न । चुक्ता पुँजी र विभिन्न कोषसहित सेयरधनीको कोष १५ अर्ब २६ करोड रुपैयाँ पुगेको छ । पुँजीकोष अनुपात ११.८२ प्रतिशत छ ।

अन्य महत्त्वपूर्ण सूचक

खराब कर्जा १.३१ प्रतिशत, कोषको लागत ६.६८ प्रतिशत, कर्जा निक्षेप अनुपात ७९ प्रतिशत, आधार दर ९.१० प्रतिशत, ब्याज अन्तर ४.५ प्रतिशत र प्रतिसेयर आम्दानी ३१ रुपैयाँ ५२ पैसा (वार्षिकीकरण गरिएको), प्रतिसेयर नेटवर्थ १ सय ७९ रुपैयाँ छ ।

विशेष टिप्पणी

सञ्चालन र कर्मचारी खर्च ३६ प्रतिशत देखिन्छ । कर्मचारी खर्चमा बोनससमेत समावेश गरिएको छ । अघिल्लो वर्षभन्दा यस्तो खर्च घटेको छ | अघिल्लो वर्ष कुल सञ्चालन आम्दानीको ४१ प्रतिशत खर्च गरेको थियो । अघिल्लो वर्षको तुलनामा कर्मचारी र सञ्चालन खर्चमा सामान्य वृद्धि आएको छ | यस्तो खर्चमा आएको कमीले पनि खुद नाफा बढाउन मद्दत पुगेको अनुमान गर्न सकिन्छ ।

खराब कर्जा बढेको छ । कोषको लागत बढेको छ । कोषको लागत बढेको कारण ब्याज खर्च बढेको देख्न सकिन्छ । ब्याज अन्तर सामान्य घटेको छ । यसले नाफामा खासै असर पारेको देखिन्न ।

प्रकाशित मिति: शनिबार, वैशाख २८, २०७६ ०३:०४