प्राइम बैंक : निक्षेप घटे पनि लगानी र नाफा बढ्यो

A+ A A-

निक्षेप र कर्जा

प्राइम बैंकले चैत मसान्तसम्ममा ६८ अर्ब ६५ करोड रुपैयाँ निक्षेप संकलन गरेर ६९ अर्ब ८६ करोड रुपैयाँ कर्जा लगानी गरेको छ । गत वर्षभन्दा झन्डै ६ प्रतिशत निक्षेप घटेको छ । गत वर्ष यही अवधिमा निक्षेप ७२ अर्ब रुपैयाँ थियो । निक्षेप बाहिरिए पनि कर्जा रकम भने ४ प्रतिशत बढेको छ ।

खुद ब्याज आम्दानी

कर्जा लगानीबाट ७ अर्ब २० करोड रुपैयाँ ब्याज आम्दानी गरेको छ । ब्याज खर्च रकम ४ अर्ब ६० करोड रुपैयाँ पछि २ अर्ब ६० करोड रुपैयाँ खुद ब्याज आम्दानी गरेको छ । ब्याज आम्दानी १८ प्रतिशत बढेको छ भने ब्याज खर्च ७ प्रतिशत बढेको छ । खुद ब्याज आम्दानी ४२ प्रतिशत बढेको छ ।

अन्य आम्दानीपछिको खुद आम्दानी

शुल्क तथा कमिसनबाट हुने खुद आम्दानी अघिल्लो वर्षको यही अवधिभन्दा १६ प्रतिशतले बढेर ५८ करोड ८० लाख रुपैयाँ पुगेको छ । शुल्क, कमिसन र ब्याज आम्दानी रकम ३ अर्ब १८ करोड रुपैयाँ छ । अघिल्लो वर्षभन्दा यस्तो आम्दानी यस वर्ष ३६ प्रतिशत बढेको छ । शुल्क, कमिसन र ब्याज, ट्रेडिङ र अन्य सञ्चालन आम्दानीपछिको कुल सञ्चालन आम्दानी ३ अर्ब ४१करोड रुपैयाँ छ । अघिल्लो वर्षभन्दा यस्तो आम्दानी यस वर्ष ३३ प्रतिशत बढेको छ ।

सम्भावित नोक्सानी व्यवस्थापछि ३ अर्ब ६ करोड रुपैयाँ खुद सञ्चालन आम्दानी गरेको छ । यस्तो आम्दानी अघिल्लो वर्षभन्दा २५ प्रतिशत बढेको छ । सम्भावित नोक्सानीबाट फिर्ता आएको रकमभन्दा बढी रकम नोक्सानी व्यवस्थामा राख्नुपरेको छ । यस्तो रकमको अंक ३४ करोड २३ लाख रुपैयाँ छ ।

कर्मचारी खर्च (बोनससहित), सञ्चालन खर्च र ह्रास कट्टी व्यवस्थापछिको सञ्चालन आम्दानी २ अर्ब १९ करोड रुपैयाँ छ । यस्तो आम्दानी अघिल्लो वर्षभन्दा २९ प्रतिशत बढी हो । गैरसञ्चालनबाट आम्दानी तथा खर्च भएको छैन । आयकरपछि १ अर्ब ५४ करोड रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा ३२ प्रतिशत बढेको छ ।

नाफा-नोक्सान बाँडफाँट

चैत मसान्तसम्मको सम्भावित खुद नाफा बाँडफाँट हिसाबअनुसार वैधानिक कोषमा ३० करोड ९५ लाख रुपैयाँ, विनियम घटबढ कोषमा १० लाख ३७ हजार रुपैयाँ, संस्थागत सामाजिक दायित्वमा १ करोड ५४ लाख रुपैयाँ, कर्मचारी क्षमता अभिवृद्धि कोषमा ९ लाख ११ हजार रुपैयाँ र नियमकीय जगेडामा २१ करोड २९ लाख रुपैयाँ व्यवस्थापछिको बचत सञ्चित नाफा रकम १ अर्ब ७९ लाख रुपैयाँ छ ।

सञ्चित भनेर देखिएको रकम सबै नाफा वितरणका लागि योग्य नहुन पनि सक्छ । अन्तिम प्रतिवेदन नआएसम्म यसलाई आधार लिएर नाफा यति बाँडन सक्छ भनेर अहिले अड्कल काट्दा अलि हतार हुन सक्छ । लगानी भएको तर प्राप्त नभएको रकमलाई पनि आम्दानीमा देखाइने लेखा प्रणाली भएको हुँदा सालतमामीसम्म रकम प्राप्त हुन सक्ने समयावधि पर्खनुपर्ने हुन्छ । कतिपय लगानीबाट ब्याज प्राप्त नहुने पनि हुन्छ । तर, ब्याज आम्दानी भनेर लेखांकन गरिन्छ । कथं कागजी आम्दानी बाँधिएको सबै रकम प्राप्त भएमा पनि बचत वा सञ्चितिको अंकमा देखिए जति सबै रकम सेयरधनीलाई नाफा बाँडिन्छ भन्ने हुन्न । त्यसबाट पनि केही रकम सर्वसञ्चित कोषमा रहन सक्छ ।

चैत मसान्तको सञ्चित नाफा रकमलाई आधार मान्दा असार मसान्तसम्ममा यस्तो रकम १ अर्ब ३३ करोड रुपैयाँ हुने अनुमान गर्न सकिन्छ ।

पुँजी र कोषहरु

बैंकको पुँजी ८ अर्ब ३करोड रुपैयाँ छ । विभिन्न वर्षको नाफाबाट सञ्चित हुँदै आएको रकम र चैत मसान्तसम्मको सञ्चित नाफासहित २ अर्ब ३६ करोड रुपैयाँ सञ्चित नाफा देखिन्छ ।

वैधानिक जगेडा, अन्य जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत गरी बैंकको जगेडा कोष २ अर्ब ३३ करोड रुपैयाँ देखिन्छ । सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न । चुक्ता पुँजी र विभिन्न कोषसहित सेयरधनीको कोष १२ अर्ब ७३ करोड रुपैयाँ पुगेको छ । पुँजीकोष अनुपात १२.१३ प्रतिशत छ ।

अन्य महत्त्वपूर्ण सूचक

खराब कर्जा १.५८ प्रतिशत, कोषको लागत ८.२९ प्रतिशत, कर्जा निक्षेप अनुपात ७८ प्रतिशत, आधार दर १०.२० प्रतिशत, ब्याज अन्तर ३.७१ प्रतिशत र प्रतिसेयर आम्दानी २५ रुपैयाँ ६९ पैसा (वार्षिकीकरण गरिएको) र प्रतिसेयर नेटवर्थ १ सय ५८ रुपैयाँ छ ।

विशेष टिप्पणी

प्राइम बैंकको एउटा उल्लेखनीय पक्षका रुपमा सञ्चालन र कर्मचारी खर्च न्यून हुने गरेको छ । त्यो क्रमले अहिले पनि निरन्तरता पाएको छ । चैतसम्ममा कर्मचारी र सञ्चालनमा कुल सञ्चालन आम्दानीको २६ प्रतिशत मात्र खर्च गरेको छ । कर्मचारी खर्चमा बोनससमेत समावेश गरिएको छ ।

खराब कर्जा बढेको छ । कोषको लागत घटेको छ यसको प्रभाव ब्याज खर्चमा न्यून वृद्धि देखिएको छ । ब्याज अन्तर उल्लेख्य रुपमा कमी देखिएको छ । कम ब्याज अन्तरमा पनि नाफाको अंक उल्लेख्य देखिन्छ । बैंकले १६ प्रतिशत पुँजी बढाउन केन्द्रीय बैंकबाट स्वीकृति पाएको छ । १६ प्रतिशत पुँजी वृद्धिपछि बैंकको प्रतिसेयर आम्दानी करिब २१ रुपैयाँ कायम हुनेछ ।

बैंकले आव २०७४/७५ को साधारणसभा गरेको छैन । राष्ट्रियस्तरको ओम डेभलपमेन्ट बैंकलाई विलय गर्ने प्रयास असफल भएको छ ।

प्रकाशित मिति: शनिबार, वैशाख २८, २०७६ ०१:५८