पर्यटन बाेर्डका सीईओ रेग्मी भन्छन्, 'पर्यटनक्षेत्र उकास्न नीति नै परिवर्तन गर्नुपर्छ'

पर्यटन बाेर्डका सीईओ रेग्मी भन्छन्, 'पर्यटनक्षेत्र उकास्न नीति नै परिवर्तन गर्नुपर्छ'

A+ A A-

करिब डेढ खर्ब रुपैयाँ लगानी रहेको पर्यटनक्षेत्रमा ८० अर्ब कर्जा प्रवाह भएको छ । बुधबार पर्यटन बोर्डले आफ्नो वार्षिक कार्यप्रतिवेदन सार्वजनिक गर्दै पर्यटनक्षेत्रमा लगानी मात्रै डेढ खर्ब पुगेको जानकारी दिएको हो ।

कोरोना माहामारीले थलिएको पर्यटनक्षेत्रमा खर्बौंको लगानी मात्रै नभएर १२ लाख जनता समेत पालिएका छन् । बोर्डले गरेको सर्भेमा प्रत्यक्ष र अप्रत्यक्ष रूपमा पर्यटनसँग जोडिएर काम गर्दै आएका १२ लाख जनता कोभिडको मारमा परेको उल्लेख छ ।

व्यवसायीको खर्बौं लगानी कोभिडका कारण जोखिममा पर्दा पनि सरकार भने व्यावसायिक राहतलाई भाषणमा मात्र सीमित राखेको बोर्डका प्रमुख कार्यकारी अधिकृत (सीईओ) धनञ्जय रेग्मीले बताए । वार्षिक विवरण प्रस्तुत गर्ने क्रममा उनले सरकारले दिने राहतस्वरुपको पुनर्कर्जासमेत व्यवसायीले सहज रूपमा पाउन नसकेकाे, साथै नीतिगत व्यवस्था पनि कार्यान्वयन नभएको गुनासो गरे ।

प्रमुख रेग्मीले भनेजस्तै पर्यटनक्षेत्रका करिब ६० प्रतिशत व्यवसायीले सरकारले दिने भनेको व्यावसायिक पुनर्कर्जा नपाएको गुनासो व्यवसायीले गर्दै आएका छन् । व्यवसाय विशेष श्रेष्ठले सरकारले पुनर्कर्जा दिने व्यवस्था गरे पनि व्यवसायीलाई बैंकले झुलाउने गर्दा राहत लिनबाट वञ्चित रहेको बताए ।

कोरोना महामारीले सबैभन्दा बढी प्रभावित भएको पर्यटनक्षेत्रप्रति सरकारले खासै चासो नदिएका कारण पनि याे क्षेत्र माथि उठ्न नसकेकाे प्रमुख रेग्मीको गुनासो थियो । उनले सरकारले नीतिगत व्यवस्था गरे पनि कार्यान्वयनमा चासो नदेखाउँदा व्यवसायी मारमा पर्नुका साथै पर्यटक आवागमनमा पनि सुस्तता आएको बताए ।

‘हाम्रो नीति पर्यटकलाई बोर्डरमा अनावश्यक टर्चर दिने भयो, उनले भने,‘पर्यटकलाई विशेष क्षेत्रमा मात्रै अथवा चरणगत रूपमा मात्रै सोधीखोजी गरौँ तर यहाँ अनावश्यक सोधीखोजी गर्छौं, जसले गर्दा पर्यटक सहज रूपमा भ्रमण गर्न पाउँदैन अनि कसरी आउँछन् पर्यटक ?’ कोभिडले थलिएको पर्यटनक्षेत्र उकास्न नीति नै परिवर्तन गर्नुपर्ने उनको भनाइ थियो ।

बोर्डले बिहीबार कोभिडमा बोर्डको एक वर्षको कार्यप्रगति विवरण पेस गरेको थियो । जसमा प्रमुख तीन काम तल उल्लेख गरिएको छ ।

कोभिडकालमा बोर्डका मुख्य तीन काम

कोरोना माहामारीको समयमा पर्यटनक्षेत्रमा बोर्डले गरेका विशेष तीन काम महत्वपूर्ण रहे । पहिलो प्राविधिक सुधार, दोस्रो तत्काल पर्यटकको उद्धार तथा तेस्रोमा टास्क फोर्स स्थापना ।

प्राविधिक सुधारअन्तर्गत बोर्डले कोरोना माहामारी सुरु हुनासाथ क्राइसिस कम्युनिकेसन एण्ड म्यानेजमेन्ट टिम स्थापना गरेर दैनिक रूपमा पर्यटकीय क्षेत्रहरूको अवस्थाको जानकारी दिने व्यवस्था गर्‍यो । योसँगै स्ट्रान्डेड इन नेपाल नामक वेबसाइट सञ्चालन गरेर नेपाल घुम्न आएका पर्यटकको खोजीकार्य गर्‍यो । सँगै उनीहरूको अवस्थाका बारेमा जानकारी दिने काम गर्‍यो ।

यो वेबसाइटले पर्यटकलाई सुरक्षित महसुस गराउन सफल बनेको प्रमुख रेग्मीले बताए । ६० वटा देशबाट आएका १७ सय २१ जना पर्यटकको उद्धार गरेर सुरक्षित रूपमा स्वदेश फिर्ता गरेको समेत उनले बताए ।एक वर्षमा नेपालका ३३ जिल्लामा रहेका ६० देशका नागरिकको खोजी गर्दै १ हजार ७ सय २१ जना पर्यटकलाई उद्धार गरेर स्वदेश फर्काउन बाेर्ड सफल बनेको थियो ।

कोभिडले विश्वकै पर्यटनक्षेत्र ध्वस्त बनाइरहँदा नेपाली पर्यटनक्षेत्र कसरी उकास्ने भनेर बोर्डले सातै प्रदेशमा १२ वटा टास्कफोर्स स्थापना गरेर पर्यटनलाई चलायमान बनाउने प्रयास गरिरहेको छ । यो पनि बोर्डको कोभिड महामारीबीचका प्रमुख कामको रूपमा लिइएकाे छ ।

यी टास्क फोर्सले पर्यटनक्षेत्रको सम्भाव्यताका बारेमा अध्ययन गरेर विभिन्न काम गर्न बोर्ड तथा पर्यटन व्यवसायीलाई सुझाउने तथा भारत, दक्षिण एसिया, बुद्धिस्ट देशहरू, मध्यपूर्वका देशहरू, युरोप र रसिया, अस्ट्रेलिया र न्युजिल्याण्ड, अफ्रिका, नर्थ अमेरिका, साउथ अमेरिका चीन, नर्थ इस्ट एसियालगायत विश्वका विभिन्न १२ वटा पर्यटन स्रोत बजारहरूको अध्ययन गरेर नेपालमा पर्यटक भित्र्याउने पहल गरिरहेको छ ।

योसँगै बोर्डले कोभिडको समयमा नै डिजिटल तथ्यांक राख्ने काम अगाडि बढाएको छ ।

प्रकाशित मिति: बिहीबार, फागुन ६, २०७७ १७:४१