५ वर्षमा ९ को ज्यान गयो तर भेटिएन काठे पुल हटाउने सरकार

A+ A A-

बझाङ सदरमुकाम चैनपुरबाट तीन दिनको पैदलयात्रापछि पुगिन्छ, साइपाल गाउँपालिका । गाउँपालिकाका वडा–२ र ३ को बीचमा छ थरुनी खोला । जहाँ आवतजावत गर्न गाउँलेले बनाएका छन्, अस्थायी काठे पुल ।

यही खोला हो, जसले ५ वर्षको अवधिमा सुत्केरीसहित नौजनाको ज्यान लियो ।

स्थानीय तहको निर्वाचनमा प्रतिस्पर्धामा उत्रिएका उम्मेदवारको मुख्य एजेन्डा थियो, थरुनी खोलामा कम्तीमा झोलुंगे पुल बनाउने ।

चुनाव जितेर जनप्रतिनिधि आएको लामो समय बितिसक्दा पनि साइपाल गाउँलाई जोड्ने थरुनी खोलामा पुल हालिदिने सरकार भेटिएन ।

जोखिमपूर्ण काठे पुल तर्दा तर्दै २२ असार २०७४ मा थरुनी खोलाले साइपाल गाउँपालिका–२ की कक्षा १० मा अध्ययनरत १७ वर्षीय धीरेन्द्र बोहरा, कक्षा ८ मा अध्यनरत १५ वर्षीय उज्ज्वल बोहरा र कक्षा ८ मा अध्ययनरत १४ वर्षीय लोकेन्द्र बोहरालाई बेपत्ता भए । उनीहरुको शव आजसम्म भेटिएको छैन ।

दिदीलाई माइतीघर पुर्याएर फर्किएका उनीहरु थरुनी खोलाको जोखिमपूर्ण काठेपुल तर्दा तर्दै बगेका थिए ।

२०७१ साल असारमा यार्सागुम्मा संकलन गरेर घर फर्कने क्रममा जयपृथ्वी नगरपालिका–१ कैलाशका २९ वर्षीय सुवन सिंह, २८ वर्षीय महेश सिंह र ४२ वर्षीइ सुन्त शाही थरुनी खोलामै बगेर बेपत्ता भए ।

महिना दिनसम्म खोजी गर्दा पनि उनीहरुको लास नभेटिएको स्थानीय सत्य सिंह बताउँछन् । गत ९ वैशाखमा गाउँपालिकाभित्रको राम खोलाले बगाएर साइपाल गाउँपालिकाकी २१ वर्षीया भिक्कु बोहरा पनि मृत्यु भयो ।

गत वर्ष साइपाल गाउँपालिका–५ की महिला स्वास्थ्य स्वयंसेविका बाटु बोहरालाई समेत थरुनी खोलाले बगायो । सुत्केरी व्यथा लागेकी कन्थुदेवी बोहराको खोला तर्न नसकी समयमै उपचार हुन नसकेकाले ज्यान गयो । खोला तर्ने क्रममै ५ वर्षअघि तल्कोट गाउँपालिकाका तीनजनाको पनि ज्यान गएको स्थानीय बताउँछन् ।

जिल्ला प्रहरी कार्यालय बझाङका अनुसार साइपाल गाउँपालिका जिल्लाकै सबैभन्दा विकट गाउँ हो । विकट गाउँ भएका कारण कतिपय घटना त प्रहरीले समेत थाहा पाइरहेका छैनन् ।

बझाङबाट निर्वाचित जनप्रतिनिधिले गाउँमा भोट माग्न जाँदा मुख्य एजेन्डा चैनपुर ताक्लोकोट सडकखण्ड र यहाँका खोलामा झोलुंगे पुल निर्माण गर्ने प्रतिबद्धता जनाए । तर, चुनाव जितेपछि गाउँमा फर्किएरसम्म नआएको गाउँलेको गुनासो छ ।

साइपाल हिमाल चढ्ने पर्यटन सदरमुकाम आवतजावत गर्नेले थरुनी खोला तर्नुपर्ने बाध्यता छ ।

स्थानीयले घाँस, दाउरा गर्ने, पशु चौपाया चराउनेदेखि सदरमुकाम पुग्नसमेत यो खोला तर्नैपर्छ । तर, यहाँ पुल निर्माणका लागि कसैले चासो दिएका छैनन् ।

साइपाल गाउँपालिका अध्यक्ष राजेन्द्र धामी खोलामा झोलुंगे पुल अति आवश्यक भए पनि गाउँपालिकाको एक्लो बजेटले नभ्याउने बताउँछन् । उनका अनुसार प्रदेश र केन्द्रीय सरकारसँग पटक–पटक गरिएका अनुरोधसमेत सुनवाइ भएको छैन ।

सडक सञ्जालसँग गाउँपालिका जोडिएको छैन । खच्चड र भेडामा सामान ढुवानी गर्नुपर्ने स्थानीयको वाध्यता छ ।

झन्डै चार हजारभन्दा बढी जनसंख्या भएको यो गाउँपालिकाका लागि थरुनी र राम खोला अभिशाप बन्दासमेत कसैले चासो नदेखाएकोमा स्थानीय निराश छन् ।

प्रकाशित मिति: शनिबार, वैशाख २८, २०७६ ०१:१०