क्रेडिट एन्ड कमर्स बैंक: व्यवसाय सामान्य बृद्धि

A+ A A-

निक्षेप र कर्जा

विवादास्पद नेपाल क्रेडिट एन्ड कमर्स बैंकले चैत मसान्तसम्ममा ६१ अर्ब ४५ करोड रुपैयाँ निक्षेप संकलन गरेर ५६ अर्ब ८० करोड रुपैयाँ कर्जा लगानी गरेको छ । निक्षेप र कर्जा क्रमशः ७ र १० प्रतिशत बढेको छ ।

खुद ब्याज आम्दानी

कर्जा लगानीबाट ५५ अर्ब ८६ करोड रुपैयाँ ब्याज आम्दानी गरेको छ । ब्याज खर्च रकम ३ अर्ब ६३ करोड रुपैयाँपछि २ अर्ब २३ करोड रुपैयाँ खुद ब्याज आम्दानी गरेको छ । ब्याज आम्दानी १२ प्रतिशत बढेको छ भने ब्याज खर्च ४ प्रतिशत घटेको छ । खुद ब्याज आम्दानी ५५ प्रतिशत बढेको छ ।

अन्य आम्दानीपछिको खुद आम्दानी

शुल्क तथा कमिसनबाट हुने खुद आम्दानी अघिल्लो वर्षको यही अवधिभन्दा २५ प्रतिशतले बढेर ४१ करोड ६३ लाख रुपैयाँ पुगेको छ ।

शुल्क, कमिसन र ब्याज आम्दानी रकम २ अर्ब ६४ करोड रुपैयाँ छ । अघिल्लो वर्षभन्दा यस्तो आम्दानी यस वर्ष ५० प्रतिशत बढेको छ ।

शुल्क, कमिसन र ब्याज, ट्रेडिङ र अन्य सञ्चालन आम्दानीपछिको कुल सञ्चालन आम्दानी २ अर्ब ७४ करोड रुपैयाँ छ । अघिल्लो वर्षभन्दा यस्तो आम्दानी यस वर्ष ४७ प्रतिशत बढेको छ ।

नोक्सानी व्यवस्था राखिएको रकमभन्दा १२ करोड ५१ लाख रुपैयाँ रकम बढी नोक्सानी व्यवस्थाबाट फिर्ता आएको छ । नोक्सानी व्यवस्थाबाट फिर्ता आएको रकमसमेत गरी २ अर्ब ८७ करोड रुपैयाँ खुद सञ्चालन आम्दानी गरेको छ । यस्तो आम्दानी अघिल्लो वर्षभन्दा २५ प्रतिशत बढेको छ ।

कर्मचारी खर्च (बोनससहित), सञ्चालन खर्च र ह्रास कट्टी व्यवस्थापछिको सञ्चालन आम्दानी १ अर्ब ६३ करोड रुपैयाँ छ । यस्तो आम्दानी अघिल्लो वर्षभन्दा ३१ प्रतिशत बढी हो ।

गैरसञ्चालन आम्दानी तथा खर्च र आयकरपछि १अर्ब १६ करोड रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा ३२ प्रतिशत बढेको छ ।

नाफा-नोक्सान बाँडफाँट

चैत मसान्तसम्मको खुद नाफाअनुसार वैधानिक कोषलगायत विभिन्न कोषमा नियमकीय प्रावधानअनुरुप रकम व्यवस्था गरेपछि चालू अवधिको आम्दानीबाट करिब एक करोड रुपैयाँ बचत (सञ्चित नाफा) मा सारेको छ । बचत वा सञ्चित नाफा वितरणयोग्य रकम हो । तर, बचत वा सञ्चितीको अंकमा देखिए जति सबै रकम सेयरधनीलाई नाफा बाँडिन्छ भन्ने हुन्न । त्यसबाट पनि केही रकम सर्वसञ्चित कोषमा रहन सक्छ ।

चैत मसान्तको सञ्चित नाफा रकमलाई आधार मान्दा असार मसान्तसम्ममा यस्तो रकम १ अर्ब १२ करोड रुपैयाँ हुने अनुमान गर्न सकिन्छ ।

पुँजी र कोषहरु

बैंकको पुँजी ७ अर्ब १ करोड रुपैयाँ छ । विभिन्न वर्षको नाफाबाट सञ्चित हुँदै आएको रकम र चैत मसान्तसम्मको सञ्चित नाफासहित १ अर्ब ७८ करोड रुपैयाँ सञ्चित नाफा देखिन्छ ।

वैधानिक जगेडा, अन्य जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत गरी बैंकको जगेडा कोष ३ अर्ब २७ करोड रुपैयाँ देखिन्छ । सेयर प्रिमियम रकम १७ करोड २४ लाख रुपैयाँ छ ।

सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न । चुक्ता पुँजी र विभिन्न कोषसहित सेयरधनीको कोष १२ अर्ब २५ करोड रुपैयाँ पुगेको छ । पुँजीकोष अनुपात १४.८४ प्रतिशत छ ।

अन्य महत्त्वपूर्ण सूचक

खराब कर्जा ३.२६ प्रतिशत, कोषको लागत ७.९४ प्रतिशत, कर्जा निक्षेप अनुपात ७६ प्रतिशत, आधार दर १०.८६ प्रतिशत, ब्याज अन्तर ३.१७ प्रतिशत, प्रतिसेयर आम्दानी २४ रुपैयाँ ७० पैसा (वार्षिकीकरण गरिएको) र प्रतिशेयर नेटवर्थ १ सय ७४ रुपैयाँ छ ।

विशेष टिप्पणी

नेपाल क्रेडिट एन्ड कमर्स बैंकले आव २०७३/७४ देखि साधारणसभा गरेको छैन । चारवटा विकास बैंक (इन्फ्रास्ट्रक्चर, इन्टरनेसनल, एपेक्स र सुप्रिम)लाई गाभेपछि २०७२/७३ को साधारणसभा गरेको थियो । त्यसपछि विभिन्न मुद्दामा फस्दै गएपछि बैंकले साधारणसभा गर्न समेत सकेको छैन । केन्द्रीय बैंकले चुक्ता पुँजी वृद्धि गर्न दिएको समय सकिए पनि पुँजी वृद्धिसमेत गर्न सकेको छैन ।

बैंकले सार्वजनिक गरेको चैत मसान्तसम्मको बासेल खुलासा र वित्तीय प्रतिवेदन स्थिति एकआपसमा बाझिने खालका छन् । चैतको वित्तीय प्रतिवेदनमा सञ्चित नाफा १ अर्ब ७८ करोड रुपैयाँ देखाएको छ । तर, चैतको बासेल खुलासामा लेखापरीक्षण नभएको चालू वर्षको सञ्चित नाफा रकम १ अर्ब ८ करोड रुपैयाँ देखाएको छ ।

त्यस्तै, अन्य स्वतन्त्र कोष शीर्षकमा २ करोड ८० लाख रुपैयाँ देखाएको छ । इक्विटी सेयर प्रिमियम शीर्षकमा १७ करोड २४ करोड रुपैयाँ देखाएको छ । यो रकम सम्भवतः सेयर लिलामीबाट प्राप्त प्रिमियम हुन सक्छ । वैधानिक जगेडामा १ अर्ब ४५ करोड रुपैयाँ देखाएको छ । सञ्चित नाफा शीर्षकमा ३१ करोड ८० लाख रुपैयाँ देखिन्छ । पुँजीगत समायोजन कोष शीर्षकमा १ अर्ब ५१ लाख रुपैयाँ छ । यो रकम सम्भवतः चारवटा विकास बैंक गाभ्ने क्रममा प्राप्त भएको स्वाप रकम हुन सक्छ । चैतको वित्तीय प्रतिवेदन र बासेलका अंक एकअर्कासँग मेल खाँदैन ।

बैंकले प्रतिसेयर आम्दानी हिसाब गलत देखाएको छ । २२ रुपैयाँ ११ पैसा (वार्षिकीकरण गरिएको) हुनुपर्नेमा २४ रुपैयाँ ७० पैसा (वार्षिकीकरण गरिएको) देखाएको छ ।

दुई वर्षसम्म साधारणसभा नभएको हुँदा नगद प्रवाह विवरण कस्तो छ, देखिएके छैन । मुद्द्दा चलिरहेको छ तर मुद्दा परेको कुरा खुलासा गरेको छैन । साधारणसभा कहिले हुने हो, टुंगो छैन । साधारणसभा नहुँदासम्म वास्तविक स्थिति थाहा हुन्न । त्रैमासिक वित्तीय विवरणले मात्र समग्र स्थिति प्रस्तुत गर्दैन । अलिकति केही देखिने बासेल पनि प्रस्ट छैन । यो बैंकलाई कर्पोरेट भाषामा रोगी भन्न सकिन्छ ।

प्रकाशित मिति: शनिबार, वैशाख २८, २०७६ ००:५८