यस्ताे छ कृषि विकास बैंककाे वित्तीय स्थिति

A+ A A-

निक्षेप र कर्जा

कृषि विकास बैंकले चैत मसान्तसम्ममा १ खर्ब १२ अर्ब रुपैयाँ निक्षेप संकलन गरेर १ खर्ब ९ अर्ब रुपैयाँ कर्जा लगानी गरेको छ । निक्षेप र कर्जा क्रमशः ८ र ९ प्रतिशत बढेको छ ।

खुद ब्याज आम्दानी

कर्जा लगानीबाट ११ अर्ब ९ करोड रुपैयाँ ब्याज आम्दानी गरेको छ । ब्याज खर्च रकम ५ अर्ब ७० करोड रुपैयाँ पछि ५ अर्ब ३० करोड रुपैयाँ खुद ब्याज आम्दानी गरेको छ । ब्याज आम्दानी १५ प्रतिशत, ब्याज खर्च १० प्रतिशत र खुद ब्याज आम्दानी २० प्रतिशत बढेको छ ।

अन्य आम्दानीपछिको खुद आम्दानी

शुल्क तथा कमिसनबाट हुने खुद आम्दानी अघिल्लो वर्षको यही अवधिभन्दा १७ प्रतिशतले बढेर २७ करोड ४७ लाख रुपैयाँ पुगेको छ ।

शुल्क, कमिसन र ब्याज आम्दानी रकम ५ अर्ब ५७ करोड रुपैयाँ छ । अघिल्लो वर्षभन्दा यस्तो आम्दानी यस वर्ष २० प्रतिशत बढेको छ ।

शुल्क, कमिसन र ब्याज, ट्रेडिङ र अन्य सञ्चालन आम्दानीपछिको कुल सञ्चालन आम्दानी ६ अर्ब ३५ करोड रुपैयाँ छ । अघिल्लो वर्षभन्दा यस्तो आम्दानी यस वर्ष १६ प्रतिशत बढेको छ ।

नोक्सानी व्यवस्थापछिको खुद सञ्चालन आम्दानी ५ अर्ब ८१ करोड रुपैयाँ छ । यस्तो आम्दानी अघिल्लो वर्षभन्दा ८ प्रतिशत बढेको छ । नोक्सानी व्यवस्थामा ५४ करोड ७ लाख रुपैयाँ राखेको छ ।

कर्मचारी खर्च (बोनससहित), सञ्चालन खर्च र ह्रास कट्टी व्यवस्थापछिको सञ्चालन आम्दानी २ अर्ब ७६ करोड रुपैयाँ छ । यस्तो आम्दानी अघिल्लो वर्षभन्दा २२ प्रतिशत बढी हो ।

गैरसञ्चालन आम्दानी तथा खर्च र आयकरपछि २ अर्ब २१ करोड रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा २३ प्रतिशत बढेको छ ।

नाफा-नोक्सान बाँडफाँट

चैत मसान्तसम्मको खुद नाफाअनुसार वैधानिक कोषलगायत विभिन्न कोषमा नियमकीय प्रावधानअनुरुप रकम व्यवस्था गरेपछि चालू अवधिको आम्दानीबाट १ अर्ब ३२ करोड रुपैयाँ बचत (सञ्चित नाफा) मा सारेको छ । बचत वा सञ्चित नाफा वितरणयोग्य रकम हो । तर, बचत वा सञ्चितीको अंकमा देखिए जति सबै रकम सेयरधनीलाई नाफा बाँडिन्छ भन्ने हुन्न । त्यसबाट पनि केही रकम सर्वसञ्चित कोषमा रहन सक्छ ।

चैत मसान्तको सञ्चित नाफा रकमलाई आधार मान्दा असार मसान्तसम्ममा यस्तो रकम १ अर्ब ७६ करोड रुपैयाँ हुने अनुमान गर्न सकिन्छ ।

पुँजी र कोषहरु

बैंकको पुँजी १४ अर्ब ४४ करोड रुपैयाँ छ । विभिन्न वर्षको नाफाबाट सञ्चित हुँदै आएको रकम र चैत मसान्तसम्मको सञ्चित नाफासहित २ अर्ब ७९ करोड रुपैयाँ सञ्चित नाफा देखिन्छ ।

वैधानिक जगेडा, अन्य जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत गरी बैंकको जगेडा कोष ९ अर्ब ८६ करोड रुपैयाँ देखिन्छ । कुनै पनि प्रकारको प्रिमियम रकम देखिन्न ।

सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न । चुक्ता पुँजी र विभिन्न कोषसहित सेयरधनीको कोष २७ अर्ब १ करोड रुपैयाँ पुगेको छ । पुँजीकोष अनुपात १९.७४ प्रतिशत छ ।

अन्य महत्त्वपूर्ण सूचक

खराब कर्जा ४.२२ प्रतिशत, कोषको लागत ७.३६ प्रतिशत, कर्जा निक्षेप अनुपात ७८ प्रतिशत, आधार दर ११.१६ प्रतिशत, ब्याज अन्तर ५.२० प्रतिशत र प्रतिसेयर आम्दानी २९ रुपैयाँ १० पैसा (वार्षिकीकरण गरिएको) छ ।

बैंकको लगानी र सहायक कम्पनी

बैंकको कर्जाबाहेकको लगानीतर्फ ११ अर्ब ७७ करोड रुपैयाँ छ । यस्तो किसिमको लगानी अघिल्लो वर्षको तुलनामा ४ प्रतिशत घटेको छ । साना किसान लघुवित्त, कोष व्यवस्थापन कम्पनी र गोबर ग्यास कम्पनीमा बैंकको लगानी छ ।

विशेष टिप्पणी

कृषि विकास बैंकको चुक्ता पुँजी कति भन्ने विवाद देखिने भएको छ। बैंकले अपरिवर्त्य, अविमोच्य र असञ्चित अग्राधिकार सेयरलाई पनि पुँजीमा गणना गरेको छ । बैंकले प्रतिसेयर आम्दानी र प्रतिसेयर खुद सम्पत्ति गणना गर्दा भने चुक्ता पुँजीलाई मात्र आधार लिएको देखिन्छ ।बैंकको वास्तविक चुक्ता पुँजी कति हो भन्ने खुल्ने कुनै विवरण भेटिन्न । पुसको बासेल प्रकटीकरणमा चुक्ता पुँजी ८ अर्ब ५० करोड रुपैयाँ देखाएको छ । तर, अग्राधिकार सेयर कति छ भन्ने देखाएको छैन ।

प्रकाशित मिति: शनिबार, वैशाख २८, २०७६ ००:४८