प्रदेश १ मा नेकपा विवाद : जसपालाई फकाउँदै नेकपाका दुवै समूह

A+ A A-

प्रदेश १ को प्रदेशसभा बैठक नजिकिँदै गर्दा विभाजित नेकपाका दुवै समूहले दौडधुप तीव्र पारेका छन् । नेकपा प्रचण्ड–माधव समूहका भीम आचार्य र ओली समूहका मुख्यमन्त्री शेरधन राई पक्षले आफ्नो पक्षमा समर्थन जुटाउन दौडधुप बढाएका हुन् ।

नेकपामा एक समूहले अर्काे समूहलाई गरेको कारबाहीको विवादका कारण २५ माघमा डाकिएको प्रदेशसभा बैठक स्थगित भएको थियो । सभामुख प्रदीपकुमार भण्डारीले आगामी ९ फागुनमा प्रदेशसभा बैठक डाकेका छन् ।

२५ माघमा डाकिएको प्रदेशसभा बैठकअघि कार्यसूची तय गर्ने विषयमा कार्य व्यवस्था परामर्श समितिको बैठक बसेको थियो । सो बैठकमा कार्यसूचीका सम्बन्धमा सहमति नभएपछि सभामुख भण्डारीले अविश्वासको प्रस्ताव टेबुल गराउने कार्यसूची बनाउँदै बैठक सुरु गराउन खोजेका थिए ।

तर, कारबाहीको टुंगो नलागी प्रदेशसभा बैठक अघि बढ्न नसक्ने भन्दै सत्तापक्षले अवरोध गरेपछि ९ फागुनसम्म प्रदेशसभा बैठक स्थगित भएको छ । मुख्यमन्त्री राई पक्षले प्रचण्ड–माधव समूहका १६ जना सांसदलाई कारबाही गरेको विवाद टुंगो नलागेका कारण ७ माघमा प्रदेश प्रमुख सोमनाथ अधिकारी ‘प्यासी’ले पठाएको हिउँदे अधिवेशन आह्वानको पत्र पढेर २५ माघसम्म प्रदेशसभा स्थगित गरिएको थियो ।

मुख्यमन्त्री राई पक्ष दल विभाजनको टुंगो नलागेसम्म बैठक अघि बढ्न नदिने अडानमा छ भने प्रमुख प्रतिपक्षी नेपाली कांग्रेससहित प्रचण्ड–माधव समूह प्रदेशसभालाई बन्धक बनाउन नहुने पक्षमा छ । अविश्वास प्रस्ताव अघि बढाउनुपर्ने उनीहरुको माग छ ।

प्रदेशसभाबाट अविश्वास प्रस्ताव पारित गराएर राईले नेतृत्व गरेको प्रदेश सरकार ढाल्ने रणनीतिमा प्रचण्ड–माधव समूहका भीम आचार्य लागेका छन् ।

राईविरुद्धको अविश्वास प्रस्ताव पारित गराउन वा मुख्यमन्त्री राईले विश्वासको मत लिन ४७ सांसदको मत आवश्यक हुन्छ । उक्त संख्या नेकपाका दुवै समूहसँग छैन । त्यसैले कांग्रेस निर्णायक शक्तिका रूपमा रहेको छ । यद्यपि कुन पक्षलाई सहयोग गर्ने भन्ने विषयमा अहिलेसम्म कांग्रेसले निर्णय लिएको छैन ।

जयराम यादव/जनता समाजवादी पार्टी संसदीय दलका नेता

कांग्रेस अनिर्णित हुँदा नेकपाका दुवै समूह अन्य साना दलको समर्थन जुटाउन दौडधुप गरिरहेका छन् । नेकपाका दुवै समूहले समर्थन लागि पार्टीलाई आग्रह गरिरहेको जनता समाजवादी पार्टीका संसदीय दलका नेता जयराम यादवले बताए ।

‘सहयोग गर्नका लागि दुवै पक्षले हामीलाई मौखिक रूपमा प्रस्ताव गरिरहनु भएको छ,’ उनले शिलापत्रसँग भने, ‘सदनमा अविश्वास प्रस्ताव टेबुल हुन्छ अनि मात्र केही हुन्छ । त्यसपछि मात्र हामीले के गर्ने भन्ने निर्णयमा पुग्छौँ भन्ने जवाफ दिएका छौँ ।’

स्रोतका अनुसार संसद् बैठक सुरु गराई अविश्वासको प्रस्ताव अघि बढाउन सभामुखलाई दबाब सिर्जना गर्न मुख्यरूपमा आचार्य पक्षले जसपालाई पनि जोड गरिरहेको छ ।

चौतर्फी दबाबपछि सत्तापक्षलाई पेलेरै भए पनि संसद बैठक सुरु गराई अविश्वास प्रस्ताव टेबुल गराउने र पारित गर्ने आकलनसहित आचार्य पक्षले जसपाको पनि समर्थन खोजेको हो । उता मुख्यमन्त्री राई पक्षले पनि सहज परिस्थिति सिर्जनाका लागि जसपालाई आफ्नै पक्षमा उभिन आग्रह गरिरहेको छ ।

नेकपा विभाजनपछि प्रचण्ड–माधव समूहमा लागेका आर्थिक मामिला तथा योजनामन्त्री ईन्द्रबहादुर आङ्बोलाई ओली समूहमा रहेका मुख्यमन्त्री राईले पदबाट हटाएपछि प्रदेशमा विवाद सुरु भएको हो ।

आङ्बोलाई मन्त्रीबाट बर्खास्त गरेपछि प्रचण्ड–माधव समूहले पनि मुख्यमन्त्री राईविरुद्ध प्रदेशसभा सचिवालयमा ३७ जना सांसदको हस्ताक्षरसहित अविश्वास प्रस्ताव दर्ता गराएको थियो । त्यसमध्ये पाँच जना सांसदले हस्ताक्षर फिर्ता लिइसकेका छन् । अविश्वास प्रस्ताव दर्ता पछि नेकपाका दुवै समूहले एकले अर्कालाई कारबाही गरेको छन् । सोही विवादका कारण प्रदेशसभा बैठक सञ्चालन हुन सकेको छैन ।

प्रकाशित मिति: बुधबार, फागुन ५, २०७७ ०९:१०