प्रचण्ड-नेपाल समूहलाई प्रधानमन्त्री ओलीको प्रश्न- के निर्वाचनमा जानु प्रतिगमन हो ?

प्रचण्ड-नेपाल समूहलाई प्रधानमन्त्री ओलीको प्रश्न- के निर्वाचनमा जानु प्रतिगमन हो ?

A+ A A-

प्रधानमन्त्री केपी शर्मा ओलीले ताजा जनादेशका लागि जनतासामु जानु अलोकतान्त्रिक र प्रतिगमन नभएको बताएका छन् ।

सोमबार प्रधानमन्त्री तथा मन्त्रिपरिषद्को कार्यालयको उद्घाटन गर्दै प्रधानमन्त्री ओलीले नयाँ जनादेशका लागि जनतासामु जानु प्रतिगमन नभएको बताएका हुन् ।

नेकपाको प्रचण्ड–नेपाल समूहप्रति इंकित गर्दै प्रधानमन्त्री ओलीले प्रश्न गरे, ‘ के हो प्रतिगमन भनेको ? निर्वाचनमा जानु प्रतिगमन हो ? बहुदलीय प्रतिस्पर्धामा निर्वाचनमा जाँदा राजनीतिक प्रणाली समाप्त हुन्छ ? हामीले रोजेको बहुदलीय प्रतिस्पर्धा यही होइन ? ’

प्रधानमन्त्री ओलीले ताजा जनादेशका लागि जनातामा जानु जनादेशप्रतिको अपमान नभएको बताए । ‘जनताले दिएको मत अनुसार काम गर्न सकिनँ, काम गर्न दिइएन त्यसैले फेरि जनतामा जाने निर्णय गर्नु जनादेशप्रतिको अपमान होइन सम्मान हो,’ उनले भने ।

प्रधानमन्त्री ओलीले निर्वाचन पद प्राप्तीका लागि अवाञ्छित कदम नभएको पनि बताए । जनतासामु नयाँ जनादेशका लागि जाँदा प्रतिगमन हुन्छ भन्नु मूर्खता भएको उनले बताए ।

‘जनतासामु जनादेशका लागि जाँदा प्रतिगमन हुन्छ भने प्रतिनिधिसभा विघटन नभएको अवस्थामा पनि दुई वर्षपछि त निर्वाचन हुन्थ्यो? के त्यो पनि प्रतिगमन नै हुन्थ्यो होला नि ?’ उनले भने ।

उनले आफूहरू संविधानले कोरेका सीमाभन्दा बाहिर नगएको पनि बताए । ‘निर्वाचनलाई प्रतिगमन भन्नुभएको हो ? के हामी संविधानले कोरेका सीमाभन्दा बाहिर गएका छौं ? त्यसभन्दा हामी के पछाडि हटेका छौं ?,’ प्रचण्ड–नेपाल समूहतर्फ इंकित गर्दै प्रधानमन्त्री ओलीले भने ।

उनले आफूले चुनाव गराउँदिनँ र सधैँ शासनमा बसिराख्छु भनेर नभनेको पनि बताए । ‘के मैले अब चुनाव गराउँदिनँ, अब म शासनमा बसिराख्छु भनेको छु र ?,’ उनले भने, ‘निर्वाचन आयोग चुनावको तयारीमा लागेको छ । चुनाव हुन्छ । ’

उनले आफूहरू कोही पनि उल्टो बाटोतर्फ नफर्किएको बताए । ‘ हामी कोही पनि उल्टो बाटोतर्फ फर्केका छैनौं । उहाँहरू राजनीति गर्नु हुन्छ कि ज्योतिषशास्त्र पढ्नुहुन्छ ?,’ प्रधानमन्त्री ओलीले प्रश्न गरे ।

प्रकाशित मिति: सोमबार, फागुन ३, २०७७ ११:५८