३ वर्षमा गरेका यी ६ कामले सम्झाउनेछन् केपी ओली

A+ A A-

प्रधानमन्त्री केपी ओलीका लागि बिर्सनलायक 'स्वर्णीम तीन वर्ष'मा आधा दर्जन कामले भने राहत दिन्छन् । राष्ट्रियता, कूटनीतिक क्षेत्र तथा सामाजिक सुरक्षासँग जोडिएका केही निर्णय ओली शासनकालका सकारात्मक काम हुन् । कस्ता छन् त ती निर्णय,जसले प्रधानमन्त्री ओलीलाई राहत महसुस गराउँछन् ?

नयाँ नक्सा प्रकाशन

ओली शासनका लागि नेपालको राजनीतिक इतिहासमा सम्झनलायक काम ७ जेठ ०७७ मा भयो । त्यस दिन भूमि व्यवस्था, सहकारी तथा गरिबी निवारणमन्त्री पद्यमा अर्यालले नेपालको नयाँ राजनीतिक तथा प्रशसनिक नक्सा सार्वजनिक गर्नु ऐतिहासिक घटना थियो ।

नेपालले भारतीय अतिक्रमणको चपेटामा परेको लिम्पियाधुरा, लिपुलेक र कालापानी क्षेत्र समेटेर नयाँ नक्सा जारी गर्‍यो । भारतीय दबाबका बाबजुद नेपालले हिम्मत गरेर नै नयाँ नक्सा जारी गरेको थियो । त्यही नक्साको आधारमा संविधानको निसान छाप संसदबाट सर्वसम्मत संशोधन भयो ।

सगरमाथा नयाँ उचाइ मापन

ओलीको कार्यकालमा सगरमाथाको उचाइ मापन पनि महत्त्वपूर्ण घटना थियो । नापीविज्ञ खिमलाल गौतमको नेतृत्वमा नेपालले सगरमाथाको उचाइ पहिलोपटक नापेको हो । र, चीनसँगको साझेदारीमा २३ मंसिर ०७७ मा नयाँ नाप सार्वजनिक गरियो । दुई सय वर्षको इतिहासमा नेपालले पहिलोपटक नापेको उचाइ ८६ सेन्टिमिटर बढेर ८ हजार ८ सय ४८ मिटर ८६ सेन्टिमिटर कायम भएकाे छ । यो उचाइ नै अहिले विश्वका लागि मान्यताप्राप्त उचाइ हो ।

सिके राउत अवतरण

मधेसमा पृथकतावादी आन्दोलन चलाइरहेका सिके राउतको अवतरण पनि महत्त्वपूर्ण घटना थियो । प्रधानमन्त्री ओलीले सिके राउतसँग रातारात सहमति जुटाएर २४ फागुन ०७५ मा ११ बुँदे सम्झौता गरे । नेपाल बिखण्डनको एजेण्डा बोकेका राउतलाई मूलधारमा अवतरण गराएर ओलीले विखण्डनको मुद्दालाई सामसुम पारिदिए ।

कूटनीतिक विस्तार प्रयास

प्रधानमन्त्रीमा निर्वाचित भएलगत्तै ओलीले कूटनीतिक परिपक्वता देखाउने प्रयास गरेका थिए । त्यसको संकेत निलाम्बर आचार्यलाई भारतका लागि राजदूत नियुक्त गरेर दिएका थिए । यसबीचमा ओलीले नेपाल छिमेकी मुलुकभन्दा पर पनि पुग्नुपर्छ भन्ने मान्यता राखेर विदेश भ्रमणमा जोड दिए । अन्तर्राष्ट्रिय मञ्चमा सहभागिता बढाए ।

देखिने र सुनिने नेपाल बनाउने प्रयासमै थियो ओलीको डाबोस यात्रा । ६ माघ ०७५ मा ओली विश्व आर्थिक मञ्चमा वक्ताको रूपमा स्वीजरल्याण्डको डाबोस उडे । विश्व आर्थिक मञ्चमा नेपालको सहभागिता पहिलोपटक थियो । त्यसैगरी, ओली २५ जेठ ०७६ मा ९ दिने युरोप भ्रमणमा निस्के । बेलायत र फ्रान्सको भ्रमणमा निस्केका ओली ०६२ सालपछि पहिलो पटक युरोप भ्रमण गर्ने प्रधानमन्त्री थिए । अनि बेलायत र फ्रान्स एकसाथ भ्रमण गर्ने जंगबहादुर राणापछि पहिलो प्रधानमन्त्री पनि हुन उनी ।

कूटनीतिक विस्तारकै क्रममा ओली कम्बोडिया र भियतनाम पनि पुगे । अमेरिकासँग सम्बन्ध विस्तारका लागि १७ वर्षपछि परराष्ट्रमन्त्री प्रदीप ज्ञवाली अमेरिका भ्रमणमा निस्के । अमेरिकाको निमन्त्रणमा भएको त्यो भ्रमण सम्बन्ध विस्तारका लागि निकै महत्त्वपूर्ण थियो । र, २५ असोज ०७६ मा चीनको राष्ट्रपति नेपाल भ्रमण पनि निकै महत्त्वपूर्ण थियो । खासमा सी भ्रमण २६ वर्षपछि चिनियाँ राष्ट्रपति स्तरको नेपाल भ्रमण थियो ।

ललितानिवास जग्गा प्रकरणमा छानबिन

बालुवाटारस्थित सरकारी जग्गा व्यक्तिले बाँडफाँड गरेर कब्जा गरेको विषयमा ओलीले छानबिन गराए । तत्कालीन गृहसचिव प्रेम राईको प्रयासमा पूर्वसचिव शारदाप्रसाद त्रितालको नेतृत्वमा छानबिन समिति बनाइएकाे थियाे । तीन सदस्यीय त्यही छानबिन समितिको प्रतिवेदनले पूर्वप्रधानमन्त्री, मन्त्री, न्यायाधीशदेखि अख्तियारका प्रमुख आयुक्तसम्मकाे संलग्नता खुलासा गरिदियाे । ललिता निवासको नाममा चर्चा कमाएको त्यो प्रकरणलाई टुंगोमा भने ओलीले पुर्‍याउन सकेनन् । याे अहिलेकाे निकै विवादित मुद्दा पनि हाे ।

सामाजिक सुरक्षा कोष

ओली सरकारले कर्मचारी र श्रमिकका लागि ल्याएको निकै महत्त्वपूर्ण निर्णय थियो, सामाजिक सुरक्षा कार्यक्रम । ११ मंसिर ०७५ मा सामाजिक सुरक्षा कोष स्थापनाको घोषणा भएको थियो । युग परिवर्तनको नारा नै बनाएर ओलीले उक्त कार्यक्रम घोषणा गरे पनि कार्यान्वयनमा समस्या देखिएको छ । ठूला कर्पोरेट हाउसहरू अहिले पनि सामाजिक सुरक्षा कोषमा जोडिन मानेका छैनन् । ९ लाख कम्पनीमध्ये ३ हजार पनि कोषमा जोडिएका छैनन् ।

प्रकाशित मिति: आइतबार, फागुन २, २०७७ १९:२१