निजीक्षेत्रलाई बिनालगानीको पार्टनरको रूपमा स्वीकारे विकास हुन धेरै समय लाग्दैन : वरिष्ठ उपाध्यक्ष ढकाल

निजीक्षेत्रलाई बिनालगानीको पार्टनरको रूपमा स्वीकारे विकास हुन धेरै समय लाग्दैन : वरिष्ठ उपाध्यक्ष ढकाल

A+ A A-

नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले मुलुकभित्र उद्यमशीलताको विकास र बिस्तारको वातावरण निर्माण गर्न राज्य तथा निजीक्षेत्रबीच सहकार्य र साझेदारीको आवश्यकता रहेको बताएका छन् । उनले मेची उद्योग वाणिज्य संघको १७औँ वार्षिक साधारणसभामा त्यस्ताे धारणा राखेका हुन् ।

ढकालले यदि राज्यले व्यावसायिक सहजीकरण गर्ने, लगानीको वातावरण बनाइदिने हो भने र निजीक्षेत्रलाई बिनालगानीको पार्टनरको रूपमा स्वीकार गर्ने हो भने मुलुकको विकास तथा समृद्धिको सपनालाई साकार पार्न धेरै समय नलाग्ने बताए ।

मलेसियामा भएको द्रुत आर्थिक विकासको उदाहरण प्रस्तुत गर्दै वरिष्ठ उपाध्यक्ष ढकालले राज्य र निजीक्षेत्रबीच सहकार्य हुन सकेमा नेपालमा पनि हामीले चाहेको आर्थिक विकास र सम्मृद्धिको सम्भावना रहेको बताए ।

'केही वर्षअगाडि मलेसियाका प्रधानमन्त्री महाथिर मोहम्मद नेपाल आएकाे बेलामा मैले उहाँलाई काठमाडौका केही स्थान घुमाउने अवसर पाएको थिएँ । त्यसबेला मैले उहाँलाई सोधेको थिएँ– प्रधानमन्त्रीज्यू, यति छिटो समयमा मलेसियाले गरेको विकासको रहस्य के हो ? उहाँले भनेको मैले अहिले पनि निकै सम्झिइरहेको छु । उहाँले भन्नुभएको थियो- राज्यले निजीक्षेत्रलाई लगानीका लागि सहजीकरण मात्र गर्दियो भने विकास गर्न समय नै लाग्दैन', ढकालले भने ।

वास्तवमै यदि राज्यले निजीक्षेत्रलाई सहजीकरण गरेर लगानीको वातावरण बनाउन सक्यो भने राज्यले त्यहाँबाट हुने रोजगारी सिर्जना, कर तथा राजस्व संकलन तथा अन्य भौतिक पूर्वाधारको निर्माणबाट पर्याप्त फाइदा लिन सक्ने उनकाे भनाइ थियाे ।

अहिले नेपालमा पनि धेरै स्थानीय तहमा लगानीका लागि एक प्रकारको प्रतिस्पर्धा हुने गरेको बताउँदै उनले रोजगारी सृजना गर्न, राजस्व संकलन गर्न तथा भौतिक पूर्वाधार निर्माणमा राज्य–निजीक्षेत्र साझेदारी गरेर अगाडि बढ्दा धेरै कुरा गर्न सकिने बताए ।

निजीक्षेत्रलाई राज्य तथा यसका निकायहरूबाट हेर्ने परम्परागत दृष्टिकोणले समस्या पारेको बताउँदै ढकालले निजीक्षेत्र व्यावसायिक मात्र हुन्, नाफाका लागि मात्र काम गर्छन्, सामाजिक उत्तरदायित्व लिँदैनन् भन्ने परम्परागत धारणालाई परिवर्तन गर्नुपर्ने बताए ।

उनले महासंघको सशक्तता र सुधार, जिल्ला नगर उद्योग वाणिज्य संघहरूलाई सक्षम र सवलीकरण गर्ने, नेपालमा उद्योगमैत्री वातावरणको निर्माण, व्यवसायीहरूका हकहितका विषयवस्तुहरू, नीति निर्माणमा गरिने पैरवी, हालको कोभिड महामारीका कारण नेपालको उद्योग व्यवसाय क्षेत्रले भोग्नुपरेका समस्या र त्यसको समाधान तथा नेपालमा वैदेशिक लगानी भित्र्याउने वातावरणको निर्माणजस्ता विषयमा आफू निरन्तर क्रियाशील रहने प्रतिवद्धता व्यक्त गरे ।

प्रकाशित मिति: बुधबार, माघ २८, २०७७ १२:०२