नेपालमा सवारीसाधन महँगिए, कसकाे मूल्य कति बढ्यो ?

A+ A A-

नेपालमा दुईपाङ्ग्रे तथा चारपाङ्ग्रे सवारीसाधन महँगिएका छन् । बिक्रेता कम्पनीहरूले नयाँ मूल्यसूची सार्वजनिक गर्दै धमाधम मूल्यवृद्धि गरेको जानकारी दिइरहेका छन् ।

मूल्य बढ्नेमा अधिकांश दुईपाङ्ग्रे सवारीसाधन छन् । नेपालमा अत्यधिक खपत हुने गरेको दुईपाङ्ग्रे सवारीअन्तर्गत यमाहा, होण्डा, बजाज, टीभीएसलगायत ब्राण्डका मोटरसाइकल तथा स्कुटरको मूल्य प्रतियुनिट १ हजारदेखि २५ हजार रुपैयाँसम्मले बढेको छ ।

लामो समय कोरोना संक्रमणको कारण देखाउँदै लकडाउन हुनु र त्यसपश्चात् पनि आयात सहज नबन्दा सवारीको मूल्य बढेको बिक्रेता कम्पनीहरूकाे भनाइ छ । दसैँयता आयात सहज नबन्दा पनि सवारीसाधन महँगिएकाे हाे । कोरोना संक्रमणलाई ध्यानमा राख्दै दुईपाङ्ग्रे सवारी किन्नेकाे संख्या बढ्दै गएपछि बिक्रेता कम्पनीहरूले आपूर्ति बढेसँगै मूल्य पनि बढाएका छन् ।

मूल्य वृद्धिको विषयमा नाडा अटोमोबाइल एसाेसिएसनका सदस्य तथा अटो व्यवसायी ध्रुव थापा विश्वव्यापी रूपमा नै सवारीसाधनको मूल्य बढेपछि नेपालमा पनि त्यसको असर देखिएको बताउँछन् । उनी भन्छन्, ‘उत्पादन कोरोनापछि खस्केको छ । माग अझै बढिरहेको छ । यस कारण पनि महँगो पर्न गएको हो । त्यसमा पनि अहिले उत्पादनकर्ताले पनि खर्च बढेको भन्दै सवारीको मूल्य बढाएपछि नेपालमा पनि मूल्य बढेको हो ।’

थापाले नयाँ वर्षमा मूल्य फेरबदल हुने भए पनि यसपटक मूल्य बढेर आउँदा नयाँ आउने लट महँगिएको बताए ।

यता, होण्डाका मोटरसाइकल तथा स्कुटर बिक्री गर्दै आएको स्याकार ट्रेडिङले पनि आयात खर्चसँगै नयाँ मोडलका माेटरसाइकल तथा स्कुटरकाे मूल्य विश्वव्यापी रूपमा बढेका कारण सवारीको मूल्य महँगिएको बताएको छ । टीभीएस, बजाजजस्ता ब्राण्डका बिक्रेता कम्पनीले पनि सोही कारण देखाउँदै बढेको मूल्य सार्वजनिक गरिसकेका छन् ।

कुन कम्पनीले कति बढायाे मूल्य ?

बजाज

नेपालमा सर्वाधिक खपत हुने सवारीमध्ये बजाज ब्राण्ड एक हो । नेपालका लागि आधिकारिक बिक्रेता कम्पनी एचएच बजाजले मोटरसाइकल तथा स्कुटर बिक्री गर्दै आएको छ । कम्पनीले सामान्य मूल्यभन्दा प्रतियुनिट १० हजार रुपैयाँले मोटरसाइकल तथा स्कुटरको मूल्य बढाएको छ ।

कोरोनाकालमा मोटरसाइकल अभाव भएसँगै व्यवसाय केही खस्किएको थियो । लकडाउन खुलेपछि आपूर्ति हुन थाले पनि ग्राहकको भीड बढसँगै कम्पनीले मूल्य पनि बढाएको हो । बजाजले यस वर्ष मात्रै दुई पटकसम्म मूल्य वृद्धि गरेको छ ।

कम्पनीले साउनदेखि हालसम्ममा बजाजको प्लाटिनो १०० सीसीको मोटरसाइकलमा १२ हजार रुपैयाँ बढाएर कुल मूल्य १ लाख ७९ हजार नौ सय रुपैयाँ तोकेको छ भने पल्सर १२५ सीसीकोमा ९ हजार मूल्य बढाएर २ लाख ३३ हजार ९ सय रुपैयाँ, पल्सर १५० सीसीमा ८ हजार मूल्य बढाएर २ लाख ६५ हजार ९ सय रुपैयाँ, पल्सर १५० टीडिमा ७ हजार बढाएर २ लाख ७५ हजार ९ सय रुपैयाँ तोकेको छ । यसबाहेक स्कुटरमा पनि कम्पनीले मूल्य बढाएको छ ।

टीभीएस

त्यसो त यस वर्ष सबैभन्दा बढी ग्राहकको नजरमा पर्न सफल टीभीएसले पनि ग्राहकको संख्या बढ्नासाथै मूल्य पनि बढाएको छ । टीभीएसले पनि प्रतियुनिट थोरैमा १ हजारदेखि धेरैमा २१ हजारसम्म मूल्य बढाएको हो ।

नेपालमा टीभीएसको अधिकांश सवारीसाधन भारतबाट आयात हुन्छ, जसमा भारतीय उत्पादन गर्ने कम्पनीले नै उत्पादन खर्च धेरै भएकाले मूल्य बढाएको कारण देखाउँदै नेपालका लागि बिक्रेता कम्पनी जगदम्बा मोटर्सले नेपाली बजारमा मूल्य बढाएको छ ।

कम्पनीले बजारमा उपलब्ध टीभीएस अपाचे आरटीआर २०० मोटरसाइकलको मूल्य ३ लाख २४ हजार ९ सयबाट बढाएर ३ लाख ४५ हजार ९ सय रुपैयाँ पुर्‍याएको छ ।

त्यस्तै, साउनअगाडि २ लाख ८९ हजार ९ सय पाउने टीभीएस अपाचे आरटीआर १६०४ भीको मूल्य बढाएर अहिले २ लाख ९० हजार ९ सय तोकिएको छ । साथै, टीभीएस अपाचे आरटीआर १६०४ भी एफडी १६० को २ लाख ७२ हजार ९ सय रहेकोमा मूल्य बढाएर २ लाख ७७ हजार ९ सय, टीभीएस अपाचे आरटीआर १६०२ भी एफडी २ लाख ५८ हजार ९ सय रुपैयाँ रहेकोमा मूल्य बढाएर २ लाख ६३ हजार रुपैयाँ र साउनअघि टीभीएस रेडियनको मूल्य १ लाख ८५ हजार ९ सय रुपैयाँ रहेकोमा मूल्य बढाएर १ लाख ८६ हजार ९ सय पुर्‍याएको छ ।

होण्डा

सर्वाधिक रुचाइएको होण्डा ब्राण्डका मोटरसाइकलकाे मूल्य पनि अहिले महँगिएको छ । बिक्रेता कम्पनी स्याकार ट्रेडिङले अन्तर्राष्ट्रिय बजारमा कोभिडका कारण आपूर्तीमा समस्या तथा उत्पादन खर्च पनि बढेको कारण देखाउँदै मूल्य बढाएको छ । कम्पनीले चालु आर्थिक वर्षयता १४ वटा मोडलका सवारीमा मूल्य बढाएको छ ।

कम्पनीले थोरैमा १ हजारदेखि धेरैमा ४ हजारसम्म मूल्य बढाएको छ, जसमा होन्डाको एभिएटर एलईडी ११० स्कुटरको मूल्य १ हजार रुपैयाँले बढेर २ लाख १५ हजार ९ सय रुपैयाँ पुगेको छ । सीडी ड्रिम डीएलएक्स ११० को मूल्य ४ हजारले बढेर १ लाख ८८ हजार ९ सय रुपैयाँ, एक्टिभा एसटीडी १२५ को मूल्य ४ हजार रुपैयाँले बढेर २ लाख १८ हजार ९ सय रुपैयाँ, एक्टिभा डीएलएक्स १२५ को मूल्य ४ हजार रुपैयाँले बढेर २ लाख ३१ हजार ९ सय रुपैयाँ पुगेको छ ।

त्यसैगरी, ग्राजिया एसटीडी १२५ को मूल्य २ हजार रुपैयाँले बढेर २ लाख २१ हजार ९ सय रुपैयाँ र ग्राजिया डीएलएक्स १२५ को मूल्य २ हजारले बढेर २ लाख ४१ हजार ९ सय रुपैयाँ पुगेको छ । यीसहित कम्पनीले १४ वटा मोडलका स्कुटर तथा मोटरसाइकलको मूल्य बढाएको छ ।

यमाहा

यमाहा ब्राण्डका मोटरसाइकल तथा स्कुटरको मूल्य पनि बढेको छ । यमाहाका लागि नेपाली बिक्रेता कम्पनी एमडब्लू इन्टरप्राइजेजले नयाँ मूल्य सार्वजनिक गर्दै मूल्य बढेको जानकारी दिएको हो ।

कम्पनीले मूल्य सार्वजनिक गर्दै यमाहा एमटी १५ र आर १५ भी ३ को मूल्य ८ हजार रुपैयाँले बढाएको छ । त्यस्तै, एफजेडएस भी ३ को मूल्य पनि १ हजार रुपैयाँले बढाएको छ ।

योसँगै यमाहा रेजेडआर १२५ एफआई स्कुटरको स्ट्रिट र्‍यालीमा ७ हजार र रेजेडआर १२५ एफआईको मूल्यमा ५ हजार रुपैयाँले बढाइएको छ । फसिनो १२५, सलुटो, एसजेडआरआर, एफजेडएस भी २, भी ३, एमटी १५ एफजेडएस २५ लगायतको मूल्य पनि बढाएको छ ।

मोटरहेड

नेपाली बजारमा उपलब्ध मोटरहेडको स्पोर्ट्स ब्राण्डको मूल्य पनि वृद्धि भएको छ । नेपालका लागि आधिकारिक बिक्रेता कम्पनी एसएलआर टेक्नो एण्ड ट्रेण्डले यो बाइकको मूल्यवृद्धि भएको जानकारी दिएको हो ।

अफरोड र रोड गरी दुई भर्सनमा उपलब्ध मोटरहेड बाइकको मूल्यमा ८ हजार र ५ हजार रुपैयाँले वृद्धि गरेको छ । अब अफरोड टायरयुक्त स्पोर्ट्स मोडलको मूल्य ३ लाख ६८ हजार र रोड टायरयुक्त मोडलको मूल्य ३ लाख ७० हजार तोकेको छ ।

नेपाली बजारमा मोटरहेडका विभिन्न ७ मोडलका बाइक उपलब्ध छन् । तीमध्ये टेक्कन २५० को मूल्य ३ लाख ९५ हजार, एमएच २०० एक्सको मूल्य ३ लाख ७५ हजार र स्क्र्याम्बलर २५० को मूल्य ४ लाख ५५ हजार रुपैयाँ छ । त्यसैगरी, एक्स टर्क र एमएच १५० आरको मूल्य क्रमशः ३ लाख ८० हजार र २ लाख ८८ हजार रुपैयाँ पुगेकाे छ ।

प्रकाशित मिति: बुधबार, माघ २८, २०७७ १३:३५