सानिमा माई हाइड्रोपावरकाे वित्तीय विवरण सार्वजनिक

A+ A A-

सानिमा माई हाइड्रोपावरले आर्थिक वर्ष २०७५/७६ को तेस्रो त्रैमासिक वित्तीय विवरण सार्वजनिक गरेको छ ।

बिक्री तथा अन्य आम्दानी

सानिमा माईले चैत मसान्तसम्म ६० करोड २८ लाख रुपैयाँ बराबरको बिजुली बेचेको छ । बिक्री आम्दानी अघिल्लो वर्षको यही अवधिमा भन्दा करिब ६.३६ प्रतिशत बढी हो । त्यस्तै, अन्य आम्दानी शीर्षकबाट ४ करोड १२ लाख रुपैयाँ आम्दानी गरेको छ |

यस्तो आम्दानी गत वर्षको तुलनामा ५.३७ प्रतिशत घटेको छ । अन्य आम्दानीको अंक ४ लाख ६९ हजार रुपैयाँ छ । मूल आम्दानी बिजुली बिक्री र अन्य आम्दानी (ब्याज आम्दानी)समेत गरी ६४ करोड ४० लाख रुपैयाँ कुल आम्दानी गरेको छ |

खुद नाफा

आयोजना सञ्चालन (बिजुली बिक्री), प्रशासकीय, वित्तीय खर्च (सम्भवतः किस्ता र ब्याज) र आयकरपछि २२ करोड ९३ लाख रुपैयाँ खुद नाफा गरेको छ | गत वर्षको यही अवधिमा खुद नाफा २० करोड २ लाख रुपैयाँ थियो । गत वर्षको तुलनामा खुद नाफा १३ प्रतिशत बढेको छ ।

पुँजी, कोषहरु र अन्य सूचक

कम्पनीको चुक्ता पुँजी २ अर्ब ३२ करोड रुपैयाँ र अन्य जगेडा शीर्षकमा ६ करोड ९६ लाख रुपैयाँ देखाएको छ | सञ्चित शीर्षक जगेडामा ४६ करोड ३५ लाख रुपैयाँ देखाएको छ | अन्य जगेडा के हो, प्रस्ट छैन | सेयरधनीको कोष २ अर्ब ८५ करोड रुपैयाँ पुगेको छ । प्रतिसेयर आम्दानी ९ रुपैयाँ ८८ पैसा (चैत मसान्तसम्म)र प्रतिसेयर नेटवर्थ १ सय २२ रुपैयाँ छ ।

प्रवर्द्धित कम्पनीमा लगानी

कम्पनीले विभिन्न कम्पनीमा १ अर्ब ८ करोड रुपैयाँ लगानी र लगानी गर्ने प्रतिबद्धता गरेको छ | लगानी प्रतिबद्धता जनाएका कम्पनीमा श्वेतगंगा हाइड्रोपावर, सानिमा मिडल तमोर, माथिल्लो मैलुंग खोला जलविद्युत् कम्पनी, बाभेरी कन्स्ट्रक्सन र तमोर सानिमा इनर्जी छन् |

त्यसमध्ये श्वेतगंगा हाइड्रोपावरबाहेक कम्पनीमा १४ करोड रुपैयाँ लगानी गरिसकेको छ | श्वेतगंगालगायत कम्पनीमा ६५ करोड ३२ लाख रुपैयाँ लगानी गर्ने प्रतिबद्धता जनाएको छ | सबैभन्दा धेरै श्वेतगंगामा ४५ करोड रुपैयाँ लगानी प्रतिबद्धता जनाएको छ |

प्रतिबद्धताअनुरुप रकम भुक्तानी गरेका कम्पनीमा सानिमा मिडल तमोर १२ करोड रुपैयाँ, माथिल्लो मैलुंग खोला जलविद्युत् कम्पनीमा डेढ करोड रुपैयाँ र बाभेरी कन्स्ट्रक्सन कम्पनीमा ५० लाख रुपैयाँ गरी १४ करोड रुपैयाँ लगानी गरिसकेको छ |

विशेष टिप्पणी

जलविद्युतको आम्दानीलाई कुनै पनि त्रैमासिकका आधारमा वार्षिकीकरण गरेर हेर्न सकिन्न | सामान्यतया साउनदेखि असोजसम्म लगभग समान दरमा बिजुली उत्पादन हुन्छ । तर, कार्तिकदेखि क्रमशः घट्दै जान्छ । पुस, माघ, फागुन र चैतमा सबैभन्दा कम उत्पादन हुन्छ । यो चार महिनालाई हिउँद मानिएको छ ।

यतिबेला उत्पादन कम हुने हुँदा बिक्री दर बढी हुन्छ । वैशाखदेखि उत्पादन बढ्न थाल्छ । जलविद्युतले बढीमा नौपटक प्रतिवर्ष ३ प्रतिशतका दरले मूल्य वृद्धि प्राप्त गर्छन् । त्यसपछि मूल्य वृद्धि हुँदैन । जलविद्युत् स्थिर आय हुने क्षेत्र हो । प्रशासकीय र सञ्चालन खर्च बढ्दै जान्छ । तर, सोही अनुपातमा आम्दानी वृद्धि हुँदैन ।

धेरैको मनमा उठ्ने एउटा प्रश्न के हो भने चिलिमे र सानिमा माईको क्षमता बराबर (२२ मेवा) भए पनि आम्दानी किन बराबर हुन्न भन्ने छ | मेगावाट बराबर भए पनि त्यसबाट निस्कने ऊर्जाको इकाइ कम बढी हुने भएकाले यस्तो भएको हो |

जलाधार क्षेत्रले जल प्रवाहमा तात्त्विक असर पार्छ | जल प्रवाह राम्रो भएमा हिउँदमा हुने उत्पादन बढी हुँदा यसबाट बढी आम्दानी हुन्छ | त्यस्तै, अर्को तत्त्व भनेको बिजुली खरिद र बिक्री दरमा हुने फरक पनि एउटा कारण हो |

प्रकाशित मिति: बिहीबार, वैशाख २६, २०७६ २३:४८