टुर प्याकेजले खप्तडमा बढ्यो आन्तरिक पर्यटकको चहलपहल

A+ A A-

हेलिकप्टरमार्फत खप्तड घुम्ने प्याकेजको व्यवस्था भएपछि यस वर्ष हिउँदे सिजनमा खप्तडमा पर्यटकको हलपहल बढेको छ । हिँउदमा भारी हिमपात हुने भएकाले पैदल र सडक मार्ग हुँदै खप्तड जाने अवस्था नभएपछि खप्तड होमस्टे झिग्राना डोटीले हेलिकोप्टरमार्फत खप्तड पुर्‍याउने र त्यहाँ रमाउने प्याकेज ल्याएको थियो ।

होमस्टे धनगढी, दिपायल र झिग्रानाबाट हेलिकप्टरमार्फत खप्तड घुम्ने प्याकेज ल्याएपछि पर्यटकको संख्यामा वृद्धि भएको हो । प्याकेज ल्याएसँगै उच्च पदस्थ व्यक्तिदेखि सर्वसाधारणसमेत खप्तड पुग्न थालेका छन् । माघको दोस्रो साताबाट सुरु भएको टुर प्याकेजबाट अहिलेसम्म १ सय ३५ जनाले खप्तड भ्रमण गरिसकेको खप्तड होमस्टे झिग्रानाका सञ्चालक दीपकबहादुर खड्काले बताए ।

सुदूरपश्चिम प्रदेशको पर्यटनलाई नयाँ तरिकाले प्रवर्द्धन गर्ने उद्देश्यले टुर प्याकेजको कार्यक्रम ल्याइएको खड्काको भनाइ छ । 'लामो समयदेखि खप्तडको नाम चर्चामा मात्र आउने तर भौगोलिक कठिनाइका कारण सम्भावना हुँदाहुँदै पनि ओझेलमा परेपछि हेली टुर प्याकेज ल्याएका हौँ । हेली टुरमा आन्तरिक पर्यटकको राम्रो आकर्षण देखियो । प्याकेज कार्यक्रम ल्याउँदा यति धेरै मानिसहरू आउलान् भन्ने हामीले सोचेका थिएनौँ । तर यो प्याकेजले खप्तडको पर्यटकीय महत्त्वलाई प्रचारप्रसार गर्न पनि सहयोग पुगेको छ,' उनले भने ।

तराईमा हुस्सु लागेका कारण हेलिकोप्टर उडानमा समस्या भए पनि दिपायल र झिग्रानाबाट उडाइएको उनको भनाइ छ । हिँउदको सिजनमा यहाँ पर्यटक नै नआउने गरेकोमा हेली प्याकेज ल्याएसँगै पैदलबाट खप्तड आउनेको संख्या पनि बढेको खप्तडमा होटल सञ्चालन गरिरहेका बाजुराका लोक रावलको भनाइ छ । 'पहिले हिँउदमा मानिस आउँथेनन् । हिँउदका महिनामा त करिब शून्य नै हुन्थे । अहिले दिनमा १०–१५ जना त आएकै हुन्छन्,' उनले भने ।

हिँउद लागेसँगै अहिलेसम्म २ सयको हाराहारी पर्यटक खप्तड पुगेको उनको भनाइ छ । १४ देखि १८ माघसम्मको प्याकेज घोषणा भए पनि पर्यटकको चाप बढेपछि प्याकेजलाई २५ माघसम्म लम्ब्याइएको थियो ।

खप्तड पुग्नका लागि दिपायलबाट प्रतिव्यक्ति १० हजार, झिंग्रानाबाट आठ हजार, अछामको साफेगर र बझाङको चैनपुरबाट १२ हजार तथा धनगडीबाट ३० हजारको प्याकेज थियो ।

टुर प्याकेज ल्याएसँगै सुदूरपश्चिम प्रदेशका मुख्यमन्त्री त्रिलोचन भट्ट, आन्तरिक मामिला तथा कानुनमन्त्री प्रकाश शाह र उद्योग, पर्यटन, वन तथा वातावरणमन्त्री माया भट्ट, नेपाल पर्यटन बोर्डका प्रमुख कार्यकारी अधिकृत धनञ्जय रेग्मी, बोर्ड सदस्य कृष्णबहादुर महरा, नाटाका केन्द्रीय अध्यक्ष अच्युत गुरागाईं, खप्तड क्षेत्र पर्यटन विकास समितिका कार्यकारी निर्देशक भीम खड्कालगायतले खप्तड क्षेत्रको भ्रमण गरेका छन् ।

खप्तड भ्रमणपछि पर्यटन बोर्डका प्रमुख कार्यकारी अधिकृत रेग्मीले खप्तड क्षेत्र प्राकृतिक सुन्दरताका साथै अलौकिक र दर्शनीय भएकाले सबैले एकचोटि पुग्नै पर्ने गन्तव्य भएको बताए ।

'यसको प्रवर्द्धन गरेर प्रदेशले फाइदा लिन सक्ने अथाहा सम्भावना छ । सबै मिलेर यसको विकास र प्रवर्द्धन गर्नुपर्छ । यसमा मेरो अथक प्रयास रहनेछ । खप्तड क्षेत्रको प्रचार भएको भए पनि पर्यटकलाई थप आर्कषणका लागि पूर्वाधारको कमी छ,' उनले भने । आवश्यक पूर्वाधारका लागि पहल गर्ने उनको भनाइ छ ।

खप्तडका पाटनसम्म मोटरबाटो पुर्‍याउने, पाटनभित्र बाटोघाटो, संकेत चिह्नको व्यवस्था गर्ने, पर्यटकलाई सुविधा दिने हिसाबले होटलहरू स्थापना गर्न जग्गा भाडामा दिने र स्किलगायतका खेलकुद गतिविधि पनि प्राथमिकता दिनुपर्ने पर्यटन अभियन्ता किशोर खडका बताउँछन् । उनले भने, 'खप्तड प्रकृतिको खजना हो भन्ने थाहा हुँदा हुँदै पनि उपयोगमा ल्याउन नसक्नु हाम्रो प्रदेशको दुभार्ग्य हो । मनमा भएका अशान्ति हटाउनु र प्रकृतिसँग रमाउनु छ भने एक पटक खप्तड घुम्नै पर्छ ।'

खप्तड राष्ट्रिय निकुञ्जलाई प्राकृतिक सौन्दर्यताको खानी मानिन्छ । बझाङ, बाजुरा, अछाम तथा डोटी जिल्लाको सीमानामा पर्ने खप्तडमा २२ वटा घाँसे मैदान अर्थात् पाटन रहेका छन् । सुन्दर घाँसे मैदानमा पुग्नेवित्तिकै यात्रीको थकान मेटिन्छ । खप्तडको मुख्य आर्कषण भनेको त्यहाँका घाँसै मैदान, खप्तड दह, नाग ढुंगा, केदार ढुंगा, खप्तड बाबा आश्रम, शिव मन्दिर हुन् । यो ५० वर्ष पहिले खप्तड बाबाले तपस्या गरेको एक पवित्र ठाउँ पनि हो ।

यसका साथै खप्तड राष्ट्रिय निकुञ्जमा पाईने १ सय ३५ प्रजातीका फूल २ सय २४ प्रजातिका जडीबुटी, ५ सय ३७ प्रजातीका बनस्पती र २ सय ७० जातका चराचुरुङ्गी पनि पर्यटन मुख्य आर्कषणका मुख्य केन्द्र हुन् । खप्तड घुम्नका लागि जेठ, असारदेखि मङ्सिरसम्मको समय उपयुक्त मानिन्छ । चैत वैशाखमा खप्तड घुम्न गएमा रङ्गीविरङ्गी लालीगुराँस फुलेको देख्न पाइन्छ भने अहिलेको समयमा हिउँदे यामको दृश्य अवलोकन गर्न सकिन्छ ।

खप्तडको सबैभन्दा आकर्षक पक्ष हो गंगा दशहरा मेला । प्रत्येक वर्षको जेठमा यहाँ भव्य मेला लाग्ने गर्छ । प्रकृति प्रेमीलाई मात्र नभई, धार्मिक पर्यटकलाई समेत उपयुक्त गन्तव्यका रूपमा रहेको जानकारहरू बताउँछन् ।