आमहडताल : प्रचण्ड-नेपाल समूहले गर्‍यो चिया पसलदेखि सवारी साधनसम्ममा तोडफोड

आमहडताल : प्रचण्ड-नेपाल समूहले गर्‍यो चिया पसलदेखि सवारी साधनसम्ममा तोडफोड

A+ A A-

संवैधानिक परिषद्का पदाधिकारीको नियुक्तिको विरोधमा नेकपा प्रचण्ड-नेपाल समूहले आह्वान गरेको बन्दका क्रममा विभिन्न ठाउँमा तोडफोड भएको छ । शान्तिपूर्ण बन्द भनिए पनि आन्दोलनकारीले विराटनगरसहित प्रदेश १ का विभिन्न स्थानमा दर्जनौँ सवारी साधन र पसलमा तोडफोड गरेका छन् ।

प्रचण्ड-नेपाल समूहले बिहीबारका लागि आह्वान गरेको आमहडताल शान्तिपूर्ण हुने भनिए पनि व्यवहारमा त्यस्तो देखिएन । आन्दोलनकारीले बन्दको अवज्ञा गरेको भन्दै सवारी साधनका साथै चिया पसलमा समेत तोडफोड गरेका छन् ।

आमहडताललाई सफल बनाउन भन्दै सो पार्टीका नेताहरू एकाबिहानैदेखि झण्डा र लाठीसहित प्रदर्शनमा उत्रिएका थिए । तीनपैनीस्थित पूर्वमाओवादीको पार्टी कार्यालयबाट नेकपा केन्द्रीय सदस्य एवं विघटित प्रतिनिधिसभाका सांसद शिवकुमार मण्डलको नेतृत्वमा निस्किएको समूहले विराटनगर महानगरपालिका अगाडिको चिया-नास्ता पसलमा तोडफोड गरेको थियो ।

आन्दोलनकारीले समोसा, तेल, चिया, तरकारी, दूध फ्यालिदिएका थिए । उनीहरूले पसलको सोकेसको सिसासमेत फुटाइदिएका थिए । त्यस क्रममा पसलका सञ्चालक प्रमोद सहनीको गालामा चोटसमेत लागेको थियो । सहनीले आफूमाथि लाठी र लात्तीले कुटपिट भएको बताएका छन् ।

आन्दोलनकारीले पार्टी कार्यालय सामुन्ने टायर बालेर प्रदर्शन गरेका थिए । नगरक्षेत्रका मुख्य चौकमा उनीहरूले प्रधानमन्त्री केपी शर्मा ओलीविरुद्ध चर्का नाराबाजीसमेत गरेका थिए । बाँसको भाटा नचाउँदै सडकमा नाराबाजी गर्दै बजारतर्फ लागेका उनीहरूको प्रस्तुतिका कारण स्थानीय सर्वसाधारण त्रसित भएका थिए ।

त्यसक्षेत्रबाट निस्किएको आन्दोलनकारीको समूहमा केन्द्रीय सदस्य मण्डलसहित जिल्ला संघर्ष समितिका संयोजक गणेश उप्रेती, प्रदेश सांसदसमेत रहेका नेकपा नेता कुशल लिम्बू साम्बा, भोगेन्द्र यादवलगायतका नेताहरूले नेतृत्व गरेका थिए । बरगाछी चोकमा भने सोही पार्टीका नेताहरू पारुल क्षेत्री, महिला नेतृ नमिता न्यौपाने र मोहम्मद आजम परवेजलगायतका प्रदेशस्तरीय नेताहरूले प्रतिनिधित्व गरिरहेका थिए ।

बन्दका कारण सर्वसाधारणले सास्ती झेल्नु परेको भए पनि बाध्यताका कारण बन्दको आह्वान गरिएको प्रचण्ड–नेपाल समूहका नेताहरूको भनाइ छ । ‘बन्द-हडताल पक्कै पनि राम्रो कुरा होइन तर बाध्यताका कारण यसो गरिएको हो’ नेता मृत्युञ्जयकुमार झाले भने, ‘केपी सरकारले संसद विघटन गरेर संविधान 'कू' गरेकै थियो त्यसमा पनि संवैधानिक निकायमा संविधानविपरीत नियुक्त गरेपछि बाध्य भएर बन्द हडतालमा उत्रनु परेको हो ।’

देशमा राजनीतिक तरलता सुरु भएसँगै बन्द-हडतालको राजनीतिक कुसंस्कारले फेरि निरन्तरता पाएको छ । सबै राजनीतिक दलहरूले जनताकै लागि भन्दै बन्द गर्दै आए पनि अन्ततः जनतालाई नै सास्ती दिँदै आएका छन् । यस्तो परम्परालाई अब भने रोक्ने बेला आएको सर्वसाधारणले बताएका छन् ।

आफ्ना माग र अभिष्ट पूरा गर्न जनतालाई दुःख दिनेभन्दा पनि वैकल्पिक उपाय अपनाएर आफ्ना मागहरू राख्न यस क्षेत्रका उद्योगी व्यवसायीले पनि माग गरेका छन् । नेपाल घरेलु तथा साना उद्योग महासंघ मोरङका महासचिव एकराज ढकालले उद्योग व्यवसाय कोरोना महामारीका कारण थिलोथिलो भएको अवस्थामा गरिएको बन्द-हडतालले ठूलो क्षति पुगेको बताए । उनले आन्दोलनका अन्य थुप्रै विकल्प हुन सक्ने बताउँदै बन्द-हडताल बाहेकको आन्दोलन हुनुपर्ने बताए ।

‘विरोध र आन्दोलनका अन्य थुप्रै तरिका हुन सक्छन् । महामारिले थिलोथिलो भएको व्यवसाय बन्द-हडतालले झन् समस्यामा पारेको छ । आफ्ना मागहरू पूरा गराउने बहानामा जनतालाई दुःख दिनुहुँदैन,’ उनले भने, ‘हामी उद्योगी व्यवसायी जहिल्यै बन्दका विरुद्धमा छौँ । बन्दले कसैलाई पनि फाइदा गर्दैन, त्यसैले बन्द-हडताल कसैले पनि नगरोस भन्ने हाम्रो माग छ ।’

नेकपाको प्रचण्ड–माधव नेपाल समूहले बिहीबार गरेको देशव्यापी आम-हडतालले उद्योग, व्यवसायलगायत सबै वर्ग र समूह प्रभावित भए पनि सबैभन्दा बढी मारमा दैनिक ज्यालादारी काम गरेर गुजारा गर्ने श्रमिक वर्ग मारमा परेका छन् । आफूलाई सर्वहारा वर्गको नेतृत्व गर्ने कम्युनिस्ट पार्टी भने पनि सो पार्टीको बन्दका कारण सर्वहारा वर्ग नै सबैभन्दा बढी मारमा पारेका हुन् ।

दैनिक ज्यालादारी काम गर्दै आएका विराटनगरका मुकुन्द बाग्लेले आज बन्द हुँदा समस्या भएको बताए । ‘हामी बिहान काम गरेर बेलुका खान्छौँ । बन्द-हडताल हुँदा कसैले भोकै सुत्नुपर्छ भन्ने नेताहरूले सोचिदिए हुन्थ्यो,’ उनले गुनासो गरे ।

आज गरिएको बन्दमा विराटनगरमा मात्र बन्दकर्ताले तीनवटा सवारी साधनमा तोडफोड गरेको जिल्ला प्रहरी कार्यालय मोरङका प्रवक्त प्रहरी नायब उपरीक्षक मानबहादुर राईले बताए । बन्दकर्ताले विराटनगरको तीनपैनी, महेन्द्रचोक र देवकोटा चोकमा सवारी साधनमा तोडफोड गरेको उनले जानकारी दिए । उनका अनुसार तोडफोडमा संलग्न ६ जनालाई पक्राउ गरिएको छ ।

बन्दको प्रदेश राजधानी विराटनगरमा मात्र नभई प्रदेशका सबै जिल्लामा प्रभाव परेको छ । कतै आंशिक मात्र प्रभाव छ भने कतै जनजीवन सामान्य बन्यो ।

प्रकाशित मिति: बिहीबार, माघ २२, २०७७ १९:४०