ट्राफिक जरिवाना कनेक्ट आईपीएस प्रणालीमार्फत भुक्तानी गर्न सकिने

A+ A A-

काठमाडौंकाे महानगरीय ट्राफिक प्रहरी महाशाखाअन्तर्गत ट्राफिक नियम उल्लङ्घन गरेबापतको कसुरमा बुझाउनुपर्ने जरिवाना अब कनेक्ट आईपीएस प्रणालीमार्फत बैंक खाताबाट अनलान नै भुक्तानी गर्न सकिने भएकाे छ । साे अनलाइन प्रणालीकाे बुधबार महानगरीय ट्राफिक प्रहरी महाशाखाको एक विशेष कार्यक्रममार्फत शुभारम्भ गरिएको हाे ।

साेसम्बन्धी सम्झौतापत्रमा महानगरीय ट्राफिक प्रहरी महाशाखाकाे तर्फबाट प्रहरी वरिष्ठ उपरीक्षक जनक भट्टराई र नेपाल क्लियरिङ हाउस लिमिटेड (एनसीएचएल)का प्रमुख कार्यकारी अधिकृत नीलेश मानसिंह प्रधानले हस्ताक्षर गरेका छन् ।

याे सेवा लिनका लागि सेवाग्राहीले www.connectips.com मा लगइन गरी आफ्नो युजरनेम र पासवर्ड प्रयोग गरी ड्यासबाेर्डमा रहेकाे 'सरकारी भुक्तानी' भित्र 'नेपाल ट्राफिक पुलिस' छनोट गर्नुपर्छ । त्यसपछि भुक्तानी गर्ने आफ्नो बैंक खाता छनोट गरी ट्राफिकले दिएको चिट नम्बर र आर्थिक वर्ष दाखिला गरी सजिलै भुक्तानी गर्न सकिन्छ । यसरी गरिएको भुक्तानी महाशाखाको तोकिएको बैंकमा सिधै जम्मा हुन्छ भने ट्राफिकको सिस्टममा पनि उक्त भुक्तानीको विवरण जान्छ ।

ट्राफिक जरिवानाको भुक्तानी अनलाइनबाट गर्न सकिने भएसँगै अब सेवाग्राहीले बैंक शाखा नै पुगेर जरिवाना रकम जम्मा गर्नुपर्ने बाध्यताको अन्त्य भएको छ ।

याे सेवालाई आगामी दिनमा एनसीएचएलमा आवद्ध बैंक तथा वित्तीय संस्थाका मोबाइल/इन्टरनेट बैंकिङ्ग एवं अन्य आवद्ध पीएसपी वालेटमार्फत पनि भुक्तानी गर्न सकिने गरी बिस्तार गरिने एनसीएचएलले जनाएकाे छ ।

हाल यस प्रणालीमार्फत नेपाल सरकारका विभिन्न निकाय महालेखा परीक्षककाे कार्यालय, आन्तरिक राजस्व कार्यालय, लोक सेवा आयोग, कम्पनी रजिष्ट्रारको कार्यालय, राहदानी विभाग, नेपाल राष्ट्र बैंकको परीक्षाको आवेदन शुल्क, नागरिक लगानी कोष, कर्मचारी सञ्चय कोष, सामाजिक सुरक्षा कोषलगायत निकायहरूको भुक्तानीका कारोबारहरू हुँदै आएका छन् ।

प्रकाशित मिति: बुधबार, माघ २१, २०७७ १४:४६