संसदलाई जनताको जवाफः बैंकलाई ब्रोकर बनाएर सेयर बजार सुध्रन्न

A+ A A-

बैंकलाई सेयर ब्रोकरको लाइसेन्स दिएपछि पुँजी बजारको विकास हुन्छ भन्ने धितोपत्र बोर्डको मान्यता छ । सोही कारण धितोपत्र बोर्डले गत वर्षको आफ्नो वार्षिक कार्यक्रममा बैंकलाई ब्रोकर लाइसेन्स दिने विषय नै समावेश गर्यो ।

पुँजी बजारको नियामक निकायले बैंकलाई ब्रोकर लाइसेन्स दिएपछि मात्रै पुँजी बजारको विकास हुन्छ भनेर गरेको ठहरलाई अर्थ मन्त्रालयले पनि स्वीकृति दियो । बैंकिङ क्षेत्रको नियामक निकाय नेपाल राष्ट्र बैंकले मौद्रिक नीतिमा बैंकलाई ब्रोकर लाइसेन्स दिने विषय नै उल्लेख गर्यो ।

तर, अर्थसमितिले गरेको सर्वेक्षणले नियामक निकायको बुझाइ उल्टो रहेको तथ्य सार्वजनिक गर्यो । समितिले पूर्वअर्थमन्त्रीहरु ज्ञानेन्द्रबहादुर कार्की र पूर्वअर्थमनत्री सुरेन्द्र पाण्डे संयोजक रहेको २ टोली बनाएर गरेको सर्वेक्षणले बैंकहरुलाई ब्रोकर लाइसेन्स दिँदैमा पुँजी बजारको विकास नहुने देखाएको छ ।

समितिको गत २५ चैतमा बसेको बैठकले पूर्वी र पश्चिम गरी २ टोली बनाएर उपसमिति गठन गरेको थियो । पूर्वी टोलीको संयोजक पूर्वअर्थमन्त्री कार्की थिए भने पश्चिम टोलीको संयोजक पूर्वअर्थमन्त्री पाण्डे थिए ।

सो दुबै टोलीले देशका सातै प्रदेशको प्रमुख १० स्थानमा पूर्व बजेट छलफल कार्यक्रम सञ्चालन गरेको थियो । सबै ठाउँका लागि विभिन्न ६१ वटा प्रश्न तयार पारेर छलफलमा सहभागी भएकालाई मौखिक र लिखित रुपमा जवाफ दिन भनिएको थियो ।

छलफलमा पुँजी बजारको विकासका लागि के गर्नुपर्ला भन्ने प्रश्न पनि राखिएको थियो । सो सर्वेक्षणमा सहभागी ४८६ जनामध्ये जम्मा १४ जनाले मात्रै बैंकलाई ब्रोकर लाइसेन्स दिँदा पुँजी बजारको विकास हुने धारणा राखेका थिए ।

अर्थसमितिका अनुसार सहभागी २३३ जनाले बैंक तथा वित्तीय संस्थाको ब्याजदर घटाए मात्रै पुँजी बजारको विकास हुने धारणा राखेका थिए । हालका ब्रोकरको क्षमता बढाए पुँजी बजारको विकास हुन्छ भन्ने सहभागीको संख्या १०२ जना थियो । यस्तै, १३७ जना सहभागीले अनलाइन सेयर कारोबार सुरु गरेपछि पुँजी बजारको विकास हुन्छ भन्ने जवाफ संसदीय उपसमितिलाई दिएका थिए ।

प्रकाशित मिति: बिहीबार, वैशाख २६, २०७६ ०५:२७