‘टुँडिखेलको काँडे तार हटाएर सभा गर्दै नयाँ जनआन्दोलनको उभार ल्याउँछौँ’

A+ A A-

हाम्रा महान् चार सहिदको स्मृतिमा कार्यक्रम गरिरहँदा आज हामीले चार सहिदको सहादत र हजारौँहजार जनताको बगावत प्राप्त प्रजातन्त्र ७० वर्षपछि फेरि मनाउनुपर्ने भएको छ ।

जुन दिन हामीले रैती रहेनन् भनेर घोषणा गरेका थियौँ, अब हामी त्यसलाई प्रजातन्त्र दिवस भनेर मनाउन गइरहेका छौँ । प्रजातन्त्र दिवस भनेर मनाउन गइरहँदा हामीले सोध्नुपर्नेछ– हामी कसरी रैती रहेनौँ र कसरी प्रजा भयौँ या नागरिक भयौँ ?

अब हामीले ७० वर्षपछिको इतिहास, प्रजातन्त्रको इतिहास फेरि पुनर्व्याख्या गर्दै कहाँ–कहाँ नागरिक अधिकारमाथि कुण्ठित गरियो, दमन गरियो, हमला गरियो, संकुचन गरियो, त्यसबारे फेरि पुनर्प्रश्न गर्ने भएका छौँ । नेपाल मण्डल आफैँमा समृद्ध थियो, प्राकृत नेपाल मण्डल विकासको नाममा विकृत भयो । कसले गर्‍यो ? कुन नीतिले गर्‍यो ? के प्रजातन्त्रले गरेको हो ?

प्रजातन्त्रले गरेको हो भने त्यो शासक को हो ? त्यसलाई अब नंग्याउनुपर्छ । हामीले सही विकास नीति लिएनौँ भने त्यो कसरी राजनीति भयो ? राणा शासनजस्तै अहिले निषेधाज्ञा छ, फरक कहाँ छ ? महत्त्वपूर्ण ठाउँमा काँडे तार छ । फरक कहाँ छ ? हिजो हामी गयौँ खोकना, खोकनाको फेद खाली छ । राजकुलो काटेपछि के हुन्छ ? खाली हुन्छ कि हुँदैन ? राजकुलोको विकल्पमा के आयो ? राजकुलोको विकल्पमा प्रहरीको भ्यान आयो, पानी प्रहरीको भ्यानमा छ ।

त्यसैले २००७ सालपछिको इतिहासलाई पुनर्व्याख्या गर्दै हाम्रा हरेक शासकले कुन गलत काम गरे, कुन गलत नीति लिए भनेर एक–एक हिसाब माग्न अब हामी ७ फागुनमा टुँडिखेलमा भेला हुनुपर्छ । टुँडिखेलमा भेला भएर पहिलो बृहत् नागरिक भेलाले ७० वर्षदेखिकोे एक–एक हिसाब माग्नुपर्ने भएको छ । शासकहरू हिजो सिंहदरबार कसले बनायो ? त्यो माटो केले बनेको थियो सिंहदरबारको ? नेपाली जनताको गाँसबास, चामल र त्यो मास घर–घरबाट खोसेर ल्याएर बनाएको थियो ।

र, छ महिनासम्म पहाडमा अनिकाल पर्‍यो । भक्तपुर र काठमाडौंमा पनि अनिकाल पर्‍यो र हाम्रा बालबच्चा कुपोषणको सिकार भए । त्यो सिंहदरबार, ती शासकहरूको आज के भयो ? शासकहरू सेवक हुन्छन् भनेर सोचेको फेरि शोषक कसरी भए ?

कसरी भए भन्दा राज्यकोषको १ अर्ब रुपैयाँ सुनको जलहरी शिवलिङ्गमाथि हाल्दा राज्यकोषको लुट भयो । कुन मानेमा फरक भयो ? त्यसैले खोप लगाउने राज्यकोषको पैसामा तोप लगाउने शासकहरूसँग एक–एक हिसाब माग्नुपर्छ । गलत नीतिको चिरफार गरेर नयाँ आन्दोलनको उभार ल्याउन ७ फागुनमा टुँडिखेलमा जम्मा हुन म आह्वान गर्छु ।

राजनीतिक दलको मातहत होइन, राजनीतिक दललाई अब मुनि ल्याएर, नागरिकको उभारमा नयाँ उचाइ दिन आवश्यक छ । टुँडिखेलको जुन ठाउँबाट प्रजातन्त्रको पहिलो घोषणा भएको थियो, त्यहाँ लगाएको काँडे तार हटाएर ७ फागुनमा नागरिक सभा गर्ने हक हामीसँग छ । त्यही सभामा हामीले नागरिक आन्दोलनको घोषणापत्र सार्वजनिक गर्नुका साथै नयाँ जनआन्दोलनको उभार ल्याउनेछौँ ।

-बृहत् नागरिक आन्दोलनले शोभा भगवतीमा आयोजना गरेको विरोध प्रदर्शनमा वाग्लेले व्यक्त गरेको विचारको सम्पादित अंश ।

प्रकाशित मिति: मंगलबार, माघ २०, २०७७ १९:०५