जनसेवी लघुवित्तको आईपीओ विश्लेषण: यो वर्ष लाभांश दिन सक्छ

A+ A A-

जनसेवी लघुवित्त १० जिल्ला कार्यक्षेत्र भएको क्षेत्रीयस्तरको लघुवित्त हो । पर्वत, बाग्लुङ, म्याग्दी, गुल्मी, रुकुम, रोल्पा, कास्की, तनहुँ, लमजुङ र गोरखा गरी १० जिल्लाका २५ वटा शाखा कार्यालयमार्फत लघुवित्त सेवा दिइरहेको छ । बैंक तथा वित्तीय संस्थासम्बन्धी ऐन २०७३ अनुसार कम्तीमा ३० प्रतिशत सेयर सर्वसाधारण रहनुपर्ने व्यवस्थाअनुरुप लघुवित्तले जारी पुँजीको ३२.१० प्रतिशत प्राथमिक सेयर (आईपीओ) जारी गर्न लागेको छ।

नेपाल राष्ट्र बैंकबाट ६ असोज २०७२ सालमा ‘घ’ वर्गको वित्तीय कारोबार गर्न स्वीकृति पाएर ६ असोज २०७२ बाट औपचारिक कारोबार सुरू गरेको हो । कम्पनीको रजिस्टर्ड (केन्द्रीय) कार्यालय कुश्मा नगरपालिका–५, पर्वतमा छ ।

कम्पनीको जारी पुँजी र आवेदन मागिएको सेयर कित्तासम्बन्धी विस्तृत विवरण तालिकामा उल्लेख गरिएको छ ।

आधारभूत जानकारी

विषय	विवरण
अधिकृत पुँजी	३० करोड रुपैयाँ
जारी पुँजी	१४ करोड ४३लाख ३० हजार रुपैयाँ
जारी हुने कित्ता	४ लाख ६३ हजार ३ सय
कर्मचारी आरक्षित (१.५४ प्रतिशत)	७हजार १सय ४५ कित्ता
सामूहिक लगानी कोष (५ प्रतिशत)	२३ हजार १ सय ६५ कित्ता
सर्वसाधारणमा आउने वास्तविक संख्या	४ लाख ३२ हजार ९ सय ९०कित्ता
प्रतिसेयर नेटवर्थ (आव २०७४/७५)	१ सय ४ रुपैयाँ ३० पैसा
प्रतिसेयर आम्दानी (आव २०७४/७५)	३ रुपैयाँ ९५ पैसा
आवेदन खुल्ने मिति	२०७६ वैशाख २७ गते
आवेदन दिने अन्तिम मिति	छिटोमा वैशाख ३१ गते
न्यूनतम आवेदन गर्न सकिने कित्ता	१० कित्ता
रेटिङ	इक्रा एनपी आईपीओ ग्रेड ४

पुँजी उपयोग

कम्पनीले जारी गरेको प्राथमिक निष्कासनबाट प्राप्त हुने रकमलाई निम्न शीर्षकमा उपयोग गर्ने भएको छ :

शीर्षक	रकम (रुपैयाँ)
पशुपालन तथा कृषि कर्जा	२ करोड १५ लाख
खुद्रा व्यापार र सेवा कर्जा	१ करोड ६५ लाख
साना तथा घरेलु उद्योग कर्जा	८३ लाख ३० हजार
जम्मा	४ करोड ६३ लाख ३० हजार

नाफा-नोक्सान

कम्पनीले गत आर्थिक वर्ष २०७४/७५ को वित्तीय विवरणअनुसार ३८ लाख ७० हजार रुपैयाँ खुद नाफा गरेको छ । नाफा नोक्सान बाँडफाँट हिसाबअनुसार ३२ लाख ७९ हजार रुपैयाँ सञ्चित नाफा छ ।

ब्याज आम्दानी ६ करोड १ लाख र ब्याज खर्च ३ करोड ३७ लाख रुपैयाँपछि २ करोड ६३ लाख खुद ब्याज आम्दानी गरेको छ ।

ब्याजबाहेक कमिसन तथा अन्य सञ्चालन आम्दानी १ करोड ५३ लाख रुपैयाँसमेत गरी ४ करोड १६ लाख रुपैयाँ कुलसञ्चालन आम्दानी गरेको छ ।

कर्मचारी, सञ्चालन खर्च, सम्भावित नोक्सानी व्यवस्था र सम्भावित नोक्सानी व्यवस्थाबाट आएको फिर्तापछिको सञ्चालन नाफा ६० लाख ४८ हजार रुपैयाँ रहेको छ ।

नगद प्रवाहसम्बन्धी विवरण

आर्थिक वर्ष २०७४/७५ को वित्तीय नगद प्रवाह विवरणअनुसार कर्जा लगानीबाट ६ करोड रुपैयाँभन्दा बढी ब्याज आम्दानी हिसाब नाफा नोक्सान हिसाबमा देखिए पनि वास्तविक ब्याज (नगद) प्राप्ति ५ करोड ९५ लाख रुपैयाँ मात्र रहेको छ । त्यस्तै, कमिसन र अन्य सञ्चालन आम्दानी नाफा नोक्सान हिसाब खातामा देखाएअनुरुप नै प्राप्ति भएको छ । यस हिसाबले ७ करोड ४९ लाख रुपैयाँ नगद प्राप्ति भएको छ ।

ब्याज, कर्मचारी, सञ्चालन, आयकर, अन्य खर्च भुक्तानीमा ६ करोड ४६ लाख रुपैयाँ नगद भुक्तानी भएको छ ।

२०७५ चैतको नाफा–नोक्सान

२०७५ चैतसम्म ३० करोड ७५ लाख रुपैयाँ सापट र १७ करोड ४९ लाख रुपैयाँ सदस्यको बचत निक्षेप लिएर ५७ करोड २६ लाख रुपैयाँ कर्जा लगानी गरेको छ ।

यस अवधिमा ६ करोड ५५ लाख रुपैयाँ ब्याज आम्दानी गरी ३ करोड २४ लाख रुपैयाँ ब्याज खर्च भएको छ । ३ करोड ३० लाख रुपैयाँ खुद ब्याज आम्दानी गरेको छ ।

कमिसन तथा अन्य सञ्चालन आम्दानी १ करोड ६० लाख रुपैयाँसहित ४ करोड ९१ लाख रुपैयाँ सञ्चालन नाफा गरेको छ । सबै खर्च र आयकरपछिको खुद नाफा ८७ लाख ५९ हजार रुपैयाँ छ ।

प्रक्षेपित नाफा-नोक्सान

चालू आव २०७५/७६ को अन्त्यसम्म १ करोड २० लाख खुद नाफा हुने अनुमान गरेको छ । त्यस्तै, आव २०७६/७७ मा १ करोड ९८ लाख रुपैयाँ र आव २०७७/७८ मा २ करोड ४८ लाख रुपैयाँ खुद नाफा हुने अनुमान गरेको छ ।

आगामी वर्षको प्रक्षेपित विवरण

कम्पनीले चालू आवको असारसम्ममा १२ करोड १५ लाख रुपैयाँ ब्याज आम्दानी गरी ६ करोड ११ लाख रुपैयाँ ब्याज खर्च भइ ६ करोड ४ लाख रुपैयाँ खुद ब्याज आम्दानी हुने प्रक्षेपण गरेका छ । चालू आवमा १ करोड ९९ लाख रुपैयाँ खुद नाफा हुने अनुमान गरेको छ ।

त्यस्तै, आव २०७६/७७ मा पनि सामान्य हिसाबले ब्याज आम्दानी बढेर करिब १६ करोड रुपैयाँ र आव २०७७/७८ मा १९ करोड रुपैयाँ हुने अनुमान गरेको छ ।यी दुई आवमा क्रमशः ३ करोड २० लाख रुपैयाँ र ५ करोड ५१ लाख रुपैयाँ खुद नाफा हुने अनुमान गरेको छ । कम्पनीले आगामी दुई आव २०७६/७७ र २०७७/७८ सम्म लाभांश प्रस्ताव गरेको छैन । चालू आवको अन्त्यसम्ममा १ करोड ८८ लाख रुपैयाँ सञ्चित नाफा हुने अनुमान गरेको छ । चुक्ता पुँजीअनुसार यो सञ्चित नाफा भाग लगाउँदा प्रतिसेयर १३ रुपैयाँ हुन आउँछ ।

लाभांशको अनुमान

कम्पनी आव २०७४/७५ मा सञ्चित नाफामा रहेको हुँदा चालू आवको अन्त्यसम्ममा १ करोड ८८ लाख रुपैयाँ सञ्चित नाफा हुने प्रक्षेपणअनुसार यसै आवबाट पनि केही लाभांश बाँड्न सक्ने अनुमान गर्न सकिन्छ । कम्पनीले आव २०७७/७८ सम्म पुँजी बढ्ने प्रक्षेपण गरेको छैन ।

लगानी निर्णय

यो विश्लेषण कम्पनीले प्रकाशन गरेको विवरणपत्र, कम्पनीको वेबसाइट, अनौपचारिक जानकारी र अन्य प्रकाशित समाचारलाई आधार मानेर तयार पारिएको हो । यसले लगानी गर्न वा नगर्न केही भन्दैन । यो विशुद्ध अवधारणा मात्र हो । लगानी गर्नुअघि आफैंले थप अध्ययन गर्न आवश्यक हुन्छ ।

प्रकाशित मिति: बुधबार, वैशाख २५, २०७६ २२:०२