बजेट अभावले रोकियो सप्तरीमा शित भण्डार निर्माणको काम

A+ A A-

कृषि उपज खेर जाने समस्या सामाधान गर्न सप्तरीको राजविराज नगरपालिका–१५, देउरी भरुवामा निर्माण सुरु भएको सहकारी शित भण्डार (कोल्ड स्टोर) निर्माणको काम रोकिएको छ ।

कुल ३१ करोड ५ लाख ३६ हजार ७७५ रुपैयाँको लगानीमा कोल्ड स्टोर निर्माणका लागि २०७५ मंसिर २४ मा टेन्डर भएकोमा २०७५ पुस १६ मा आशिष र ओम साई राम जेभी सातदोबाटो ललितपुरले निर्माणको जिम्मा पाएकव थियो ।

२५ करोड ४४ लाख ४३ हजार ९ सय ५९ रुपैयाँमा ठेक्का लिएर कम्पनीले निर्माण कार्य सुरु गरेको थियो । सम्झौताअनुसार दुई वर्ष (२०७७ जेष्ठ १८) मा कोल्ड स्टोर निर्माण सम्पन्न हुनुपर्ने थियो । तर, तोकिएको समयभित्र निर्माणको काम पूरा हुन सकेन ।

भुक्तानी दिन आलटाल गरिएपछि समयमै निर्माणको काम पूरा हुन नसकेको निर्माण कम्पनीको भनाइ छ । ‘हामीले सम्झौता अनुसार निर्धारित समयमै काम सक्ने गरी लागेका थियौं । तर, समयमा भुक्तानी पाइएन,’ कम्पनीका साइड इन्जिनियर धनश्याम साहले भने ।

उनका अनुसार पहिलो किस्ता (२०७५-०७६) बापत ५२ लाख रुपैयाँ सहकारीले अझै भुक्तानी दिएको छैन । यसैगरी तेस्रो रनिङ्ग बिल (२०७६-०७७) मा पनि तीन वटै पक्षले ३ करोड ६८ लाख रुपैयाँ भुक्तानी बाँकी नै राखेको उनले बताए ।

‘भुक्तानीका लागि पटक-पटक जिल्ला सहकारी संघ र नगरपालिकालाई आग्रह गर्दा पनि अझै भुक्तानी उपलब्ध गराएको छैन,’ उनले भने, ‘३-४ महिना कोरोनापछि गरिएको बन्दाबन्दी (लकडाउन) ले पनि काम प्रभावित भएको हो ।’

तोकिएको समयभित्र निर्माण सम्पन्न नभएपछि सरकारले थप एक वर्ष (२०७८ जेठ १८) को समय दिएको छ । तर, भुक्तानी उपलब्ध गराउनेतर्फ भने सरकारको ध्यान नगएको उनले बताए ।

निर्माण कार्य रोकिएपछि निर्माणस्थलमा थुपारिएका सामग्रीमा पनि खिया लागेर बिग्रिन लाग्दा समेत जिल्ला सहकारी संघ, नगरपालिका, प्रदेश र संघीय सरकारको ध्यान नपुगेको उनले गुनासो गरे ।

भुक्तानी उपलब्ध गराउन नगरपालिकाले ध्यान दिएन

जिल्ला सहकारी संघ सप्तरी राजविराजका प्रमुख रमेशकुमार गुप्ताले बाँकी रकम भुक्तानीका लागि राजविराज नगरपालिकामा बिल पठाइसकेको बताए ।

‘हाम्रो काम हामीले गरेकै हो, निर्माण कम्पनीबाट आएका बिलहरु भुक्तानी गर्न नगरपालिका कार्यालयमा पठाइसक्यौं,’ उनले भने, ‘संघीय र प्रदेश सरकारबाट नगरपालिकाकै खातामा रकम आएर भुक्तानी हुन्छ, अब नगरपालिकामा पैसा आयो वा आएन भन्ने विषयमा नगरपालिकाले पनि चासो देखाउनुपर्ने हो ।’

उनले नगरपालिकाले ध्यान नदिँदा भुक्तानी गर्न ढिलाइ भइरहेको बताए । ‘

संघीय सरकारले पैसा नपठाउँदा समस्या भयो : नगरपालिका

राजविराज नगरपालिकाका मेयर शम्भुप्रसाद यादवले भुक्तानी उपलब्ध गराउन आफू प्रयासरत रहेको बताए । ‘निर्माण कम्पनीलाई भुक्तानी उपलब्ध गराउने सवालमा हामीले पटक-पटक संघीय सरकारलाई आग्रह गर्दै आइरहेका छौँ,’ उनले भने ।

निर्माणको काम सुरु गर्न कम्पनीसँग कुरा भइरहेको मेयर यादवले बताए ।

प्रकाशित मिति: आइतबार, माघ १८, २०७७ ११:२०