विराटनगरबाट प्रचण्ड–नेपाल समूहको सन्देश : जनता जागे चुट्कीका भरमा ढल्छ ओलीको प्रतिगमन

विराटनगरबाट प्रचण्ड–नेपाल समूहको सन्देश : जनता जागे चुट्कीका भरमा ढल्छ ओलीको प्रतिगमन

A+ A A-

प्रधानमन्त्री केपी शर्मा ओलीको सिफासिमा राष्ट्रपति विद्यादेवी भण्डारीले संसद विघटन गरेपछि नेकपा दुई समूहमा विभाजित छ । नेकपाको एउटा समूहको नेतृत्व ओलीले गरेका छन् भने अर्को समूहको नेतृत्व प्रचण्ड-माधव नेपाल छन् ।

प्रचण्ड–नेपाल समूहले प्रधानमन्त्री ओलीले गरेको प्रतिनिधिसभा विघटनविरुद्ध देशव्यापी प्रदर्शन, विरोधसभा जारी राखेको छ भने ओली समूहले पनि आफ्नो समर्थन जुटाउन देशव्यापी शक्ति प्रदर्शनसहित सभाहरू गरिरहेको छ । आफ्नो समूहले आयोजना गरेका कार्यक्रममा ओलीले सम्बोधन गर्दा अधिकांश समय प्रचण्ड-नेपाल समूहलाई गाली गर्नमै समय खर्चिने गरेका छन् भने प्रचण्ड-नेपाल पक्षले पनि ओलीविरुद्ध आक्रोश पोख्ने गरेको छ ।

कानुनी रूपमा नेकपा विभाजन नभए पनि दुई समूहमा विभाजित भएका नेकपाका नेताहरू एक अर्काबीच आरोपप्रत्यारोपमा उत्रिँदै आएका छन् । शुक्रबार विराटनगरमा पनि यस्तै दृष्य देखियो । नेकपा प्रचण्ड–नेपाल समूहको प्रदेश- १ कमिटीले प्रदेशको राजधानी विराटनगरमा शक्ति प्रदर्शनसहितको विरोधसभा आयोजना गर्‍यो ।

६० हजार कार्यकर्ता उतार्ने दाबी गरिएको विरोधसभामा सम्बोधन गर्ने सबै शीर्ष नेताहरूले अधिकांश समय ओलीलाई आरोप लगाउनमै खर्चिए । शीर्षस्थ नेताहरूमध्ये सबैभन्दा पहिले बोलेका अध्यक्ष माधवकुमार नेपालले ओलीलाई गणतन्त्रविरोधी भएको आरोप लगाए ।

उनले ओलीलाई लोकतन्त्र र गणतन्त्रसँग एलर्जी भएको र ओली समूहले तमासा मात्र गरिरहेको आरोप लगाए । ओलीले विकास नभई बिगार्ने मात्र काम गरेको उनको दाबी थियो । उनले अहिलेको लडाइँ कुर्चीको नभइ विचारको लडाइँ भएको समेत बताए ।

उनले निर्वाचन आयोगको पछिल्लो निर्णयले ओलीको सिङ–जुरो भाँचिदिएको टिप्पणी गरे । उनले पूर्वएमालेका शीर्षस्थ नेताहरू आफ्नै समूहमा भएको दाबी गर्दै आधिकारीक नेकपा पनि आफूहरू नै रहेको ठोकुवा गरे ।

'एमालेको पहिल्यै शीर्ष नेता भइसक्नुभएका नेता झलनाथ र म यतै छौँ, त्यसैले एमाले पनि हामी नै हौँ । ३ सय केन्द्रीय सदस्य भएको पार्टी नै मूल पार्टी हो,’ उनको दाबी थियो, ‘पार्टी ओलीको पेवा होइन, देशभरी भएको प्रदर्शनले पनि जनमत हाम्रो पक्षमा छ भन्ने स्पष्ट हुन्छ ।’

अध्यक्ष नेपालपछि बोल्न आएका स्थायी कमिटी सदस्य तथा पूर्वमन्त्री योगेश भट्टराईले ओलीप्रति लक्षित गर्दै केही मानिसहरूको सनकमा संविधानमाथि हस्तक्षेप भएको भन्दै प्रतिगमनविरुद्धमा एकजुट हुनुपर्ने बताए । ‘हिजो राजा ज्ञानेन्द्रको प्रतिगमन टिकेन, महेन्द्रको तानाशाही टिकेन, पञ्चायती व्यवस्था टिकेन र भर्खरै अमेरिकाजस्तो समृद्ध मुलुकमा ट्रम्पजस्तो सन्काहा शासकको शासन पनि टिकेन भने केही मानिसहरूको उत्तेजनामा, सनकमा जसरी प्रजातन्त्र, लोकतन्त्र र संविधानमाथि हस्तक्षेप भएको छ यो कदम पनि टिक्दैन,’ उनले भने, ‘नेपाली जनताले अरिङ्गाल खाए, बिच्छी खाए, यो मुला तिते बारुला केही पनि होइन ।’

उनले अहिले संविधान मान्ने र नमान्नेबीच र लोकतान्त्रिक र तानाशाहीबीच लडाइँ भइरहेको बताए । 'यो लडाइँ संविधान मान्ने र नमान्ने बीचको लडाइँ हो, हाम्रो लडाइँ लोकतान्त्रिक र तानाशाहीबीचको लडाइँ हो’ उनले भने ।

भट्टराईपछि बोलेका वरिष्ठ नेता झलनाथ खनालले प्रधानमन्त्री ओली एक नम्बरको ठग भएको आरोप लगाए । खनालले प्रधानमन्त्री ओली कम्युनिस्ट पार्टीमा प्रतिगामी भएर जन्मिएको बताए । उनले प्रतिनिधिसभा विघटन गरेर प्रधानमन्त्री ओलीले जनताको आशा र भरोसामाथि ठूलो कुठाराघात घात गरेको टिप्पणी गरे ।

खनालले ओलीले जेलमा बस्दा मार्क्सवाद नभएर रामायण र महाभारत पढेर बसेको ब्यंग्य कसे । ‘ओली जेलमा बस्दा रामायण र महाभारत पढेर बसे । त्यहाँ उनले शकुनीजस्तो व्यवहार सिके । शकुनी अहिले कथामा सीमित छ, ओली पनि कथा बन्नेछन्,’ उनले भने ।

खनालपछि सम्बोधन गर्न आएका अध्यक्ष पुष्पकमल दाहाल 'प्रचण्ड'ले प्रधानमन्त्री ओली प्रतिक्रियावादीहरूको गोटी भएको र दलाल पुँजीपतीहरूको घेराबन्दी बसेर देशको सार्वभौमिकतालाई नै विघटन गर्ने प्रयास गरिरहेको आरोप लगाए ।

‘यो सार्वभौम नेपाललाई विघटन गर्ने षड्यन्त्र हो,’ अध्यक्ष प्रचण्डले भने, ‘नेपालको सार्वभौमिकतालाई विघटन गर्न संविधान विघटनको प्रयत्नस्वरूप प्रतिनिधिसभा विघटन गरिएको हो । तर, जनता जागेपछि उनी चुट्कीका भरमा ढल्नेछन् ।’

जनताका प्रतिनिधिले इतिहासमा पहिलो पटक बनाएको संविधान विघटन गर्ने उद्देश्यबाट प्रधानमन्त्रीले संविधानको मर्म र भावनाविपरीत प्रतिनिधिसभा विघटन गरेको भन्दै अध्यक्ष प्रचण्डले जनताले प्रधानमन्त्री उक्त प्रयत्न असफल बनाउने चेतावनी दिए ।

प्रधानमन्त्री ओली नेपाली कम्युनिस्ट आन्दोलनका बेइमान, ठग र धुर्त पात्र भएको भन्दै अध्यक्ष प्रचण्डले केपी ओलीले प्रतिनिधिसभा विघटन नहुने जिकिर पनि गरे । उनले प्रतिनिधिसभा जीवितै रहेको दोहोर्‍याउँदै आवश्यक परेको खण्डमा प्रतिनिधिसभाको बैठक बसेर ओलीलाई कारबाही गर्ने चेतावनी पनि दिए ।

‘आवश्यक पर्‍यो भने सभामुखले प्रतिनिधिसभाको बैठक आह्वान गर्नुहुनेछ र हामी सबै बैठकमा सहभागी हुनेछौँ,’ प्रचण्डले भने ‘त्यो बैठकले प्रधानमन्त्रीलाई कारबाही गर्ने र प्रधानमन्त्रीबाट हटाउने छ । म यो उद्घोष गर्न चाहन्छु ।’

प्रधानमन्त्री ओलीले प्रचण्डमा परिवारवाद हावी भएको र छोरीज्वाईंलाई मात्र हेर्ने गरेको आरोप लगाउने गरेको भन्दै उनले छोराछोरी हुनु आफ्नो दोष नभएको बताए । ‘ममा नपुंशकता भएन, छोराछोरी भए त मेरो के दोष भयो ?’ प्रचण्डले प्रश्‍न गर्दै भने ‘मैले छोराछोरीलाई अमेरिका पढ्न पठाइन रोल्पामा लड्न पठाएँ के त्यो मेरो दोष हो ?’

उनले आफूले छोराछोरीका लागि केही गरेको भन्दै आलोचना गर्नेले धर्म छोराछोरीको नाममा कोचाउने कामलाई जनताले हेरिरहेको टिप्पणी पनि गरे । नेकपालाई एकजुट बनाएर देशका सर्वहारा मजदुर किसानका लागि काम गर्ने तयारी गर्दागर्दै छोरी र छोराको मृत्यु भएको तर पनि अभियान नरोकेको उनको भनाइ थियो ।

अध्यक्ष प्रचण्डले अब देशका सबै युवा आफ्ना भएको भन्दै देशका लागि केही गरेर मर्ने चाहना राखेको र व्यक्तिगत लाभका लागि केही गर्न जरुरी नभएको भन्दै प्रतिगमनका विरुद्धमा सशक्त भएर उभिन आग्रह गरे । शुक्रबार आयोजित सभामा ६० हजार कार्यकर्ता उतार्ने अपेक्षाअनुसार भने सभामा कार्यकर्ताको सहभागिता हुन सकेन ।

प्रकाशित मिति: शुक्रबार, माघ १६, २०७७ २१:४९