ट्रान्सपरेन्सी इन्टरनेशनल भन्छ- नेपालमा झन् भ्रष्टाचार बढ्दा लोकतन्त्र थप कमजोर

ट्रान्सपरेन्सी इन्टरनेशनल भन्छ- नेपालमा झन् भ्रष्टाचार बढ्दा लोकतन्त्र थप कमजोर

A+ A A-

ट्रान्सपरेन्सी इन्टरनेशलले भ्रष्टचार अवधारणा सूचकांक सार्वजनिक गर्दै नेपालमा भ्रष्टाचार झन् मौलाएको तथ्य सार्वजनिक गरेको छ ।

भ्रष्टाचार हुने मुलुकको सूचीमा १ सय १३ औँ स्थानमा रहेको नेपाल अहिले ११७ औँ स्थानमा परेको ट्रान्सपरेन्सी इन्टरनेशनलले जनाएको छ । १०० अंका गरिने मूल्यांकनमा नेपालले हाल ३३ अंक पाएको छ । गत वर्ष नेपालको अंक ३४ थियो ।

यो प्रतिवेदन विश्व बैंक, वर्ल्ड इकोनोमिक फोरम, ग्लोबल इनसाइट, बर्टेल्सम्यान फाउन्डेशन, वर्ल्ड जस्टिस प्रोजेक्ट र भीडीइएमसमेत गरी ६ वटा संस्थाको सर्वेक्षणका आधारमा तयार भएको हो । जसमा भनिएको छ-‘सरकारको भ्रष्टाचार विरोधी प्रयास पर्याप्त नहुनु, सार्वजनिक क्षेत्रमा भ्रष्टाचार र अधिकारको दुरुपयोग रहनु, सार्वजनिक पदाधिकारीमाथि कारबाहीमा कमी हुनु, व्यापार व्यवसायमा घुसखोरी कायम रहनु, सूचनामा नागरिकको पहुँचमा कमी हुनु जस्ता समस्या कायमै छ ।’

दक्षिण एसियामा भुटानमा कम भ्रष्टाचार, विश्वमै कम भ्रष्टाचार हुने मुलुक डेनमार्क र न्युजिल्याण्ड

दक्षिण एसियामा भुटानमा कम भ्रष्टाचार हुने सर्वेक्षणले देखाएको छ । भुटान ६८ अंकका साथ २४ औं स्थानमा, मालदिभ्स ४३ अंक प्राप्त गर्दै ७५ औं स्थानमा, भारत ४० अंक प्राप्त गरी ८६ औं स्थानमा, श्रीलंका ३८ अंक प्राप्त गरी ९४ औं स्थानमा, पाकिस्तान ३१ अंक प्राप्त गरी १२४ औं स्थानमा छ ।

यस्तै बंगलादेश २६ अंकका साथ १४६ औं स्थानमा र अफगानिस्तान १९ अंक प्राप्त गर्दै १६५ औं स्थानमा रहेका छन् । यस वर्षको सूचकांकमा समावेश १८० देशमध्ये डेनमार्क र न्युजिल्याण्डले बराबरी अंक पाएका छन्। ८८ अंक प्राप्त गरी दुवै मुलुक भ्रष्टाचार कम हुने मुलुकको सूचीमा दर्ज भएका छन् ।

दक्षिण सुडान र सोमालिया १२ अंक प्राप्त गरी सबैभन्दा बढी भ्रष्टाचार हुने मुलुकको सूचीमा सुचिकृत भएका छन्। ट्रान्सपरेन्सी इन्टरनेशनलले २५ वर्षदेखि भ्रष्टाचारको सूचकांक सार्वजनिक गर्दै आएको छ । नेपाललाई सन् २००४ देखि समावेश गरिएको थियो ।