प्रधानमन्त्री भन्छन्– सुन तस्करी रोकियो, तथ्यांक भन्छ– १ वर्षमा २ क्विन्टल बरामद

प्रधानमन्त्री भन्छन्– सुन तस्करी रोकियो, तथ्यांक भन्छ– १ वर्षमा २ क्विन्टल बरामद

A+ A A-

प्रधानमन्त्री केपी शर्मा ओलीले सरकारको नीति तथा कार्यक्रममाथि उठेका प्रश्नको मंगलबार प्रतिनिधिसभामा जवाफ दिए ।

उनको सम्बोधनमा राष्ट्रिपति विद्यादेवी भण्डारीले नीति तथा कार्यक्रम प्रस्तुत गर्दा उच्चारण गरेको मेरो सरकारदेखि उनले बोल्दै आएको पानी जहाज र रेलको कुराको चर्चा गरियो ।

त्यही क्रममा ३८ क्विन्टल सुन काण्डको प्रसंगसमेत निकाल्दै उनले भने, ‘सुन कहाँ गयो भनेर सोध्नुहुन्छ, त्यो अहिलेका सरकारको पालामा भएको होइन ।

हामीले सुन तस्करहरुलाई पक्राउ गरेर जेल हालेका छौं । अहिले सुन तस्करी नै हुँदैन सबै रोकिसक्यो ।’

तर, उनले प्रतिनिधिसभामा सम्बोधन गर्दै गर्दा त्रिभुवन विमानस्थलबाट प्रहरीले सुनसहित एकजनालाई पक्राउ गरेको छ ।

पक्राउ पर्नेमा मोरङ पथरी–२ का बालकुमार मगर छन् । उनलाई प्रहरीको अन्तर्राष्ट्रिय उडानतर्फको पार्किङ क्षेत्रबाट पक्राउ गरिएको हो ।

उनको साथबाट प्रहरीले १० लाख बराबरको १ सय ९९ ग्रामको चार थान बाला बरामद गरेको छ । उनीमाथि थप अनुसन्धान भइरहेको विमानस्थल प्रहरीले जनाएको छ ।

यसको दुई दिनअघि आइतबार प्रहरीले ३० तोला अवैध सुनसहित नेपाल एयरलाइन्सका कर्मचारी सिराहा बरापतपाटी–३ का रञ्जितकुमार यादव पक्राउ गर्यो । कतारको दोहाबाट आएको एयरलाइन्सबाट अवैध रूपमा सुन आइरहेको भन्ने सूचनाका आधारमा उनलाई पक्राउ गरिएको थियो ।उनको साथबाट प्रहरी तीन थान सुनको बिस्कुट बरामद गरेको थियो ।

१ वर्षमै करिब २ क्विन्टल बरामद

१७ माग २०७४ मा भएको ३३ किलो सुन तस्करीको घटना चर्चामा थियो । दुबईबाट आएको ३३ किलो सुन विमानस्थलबाट बाहिरिए पनि सम्बन्धित ठाउँमा नपुग्दै लुटिएपछि घटनाले अर्को मोड लियो ।

सोही घटनामा तीनजनाको ज्यानसमेत गयो । दर्जनाैं प्रहरी अधिकारी कारबाहीमा परे । गृह मन्त्रालयका सहसचिव हरि मैनालीको नेतृत्वमा छानबिन समितिसमेत गठन गरियो ।

उक्त समितिको अनुसन्धानबाट २०७४ सालसम्म ३८ क्विन्टल सुन तस्करी भएको निष्कर्ष निकाल्यो । ३३ किलो सुन तस्करका मुख्य अभियुक्त मोरङका चूडामणि उप्रेती ‘गोरे’लगायत केही प्रहरी अधिकारी र अन्य अभियुक्तसमेत हाल थुनामै छन् ।

त्यसयता प्रहरीले निरन्तरजसो सुन बरामद गर्दै आएको छ । एक साताअघि मात्रै रसुवाबाट प्रहरीले ७ किलो सुन बरामद गरेको थियो ।

प्रहरी प्रधान कार्यालयको तथ्यांकअनुसार एक वर्षमा मात्र प्रहरीले ७२ किलो सुन बरामद गरेको हो । २०७५ वैशाखदेखि फागुनसम्म प्रहरीले विभिन्न ठाउँबाट उक्त परिमाणको सुन बरामद गरेको छ । अघिल्लो आव २०७४/०७५ मा भने १ सय ७८ किलो सुन बरामद भएको प्रहरी प्रधान कार्यालयले जनाएको छ ।

तस्करीको नयाँ शैली

प्रधानमन्त्रीले सुन तस्करी रोकिएको बताए पनि तस्करले नयाँनयाँ शैलीबाट सुन तस्करी गरिरहेको प्रहरीको भनाइ छ ।

दुई साताअघि चीनबाट नेपाल आउँदै गरेका तीन चिनियाँ नागरिकले मलद्वारमा लुकाएर सुन ल्याएका थिए । त्यसैगरी, गरगहना र कम्मरमा बाँध्ने पेटीमा बाँधेर समेत सुन तस्कर हँुदै आएको खुलेको छ ।