लुम्बिनीका कुन जिल्लामा कति जनालाई दिइँदै छ कोरोनाविरुद्धको खोप ?

A+ A A-

अग्रपंक्तिमा खटिएका चिकित्सक, स्वास्थ्यकर्मी, एम्बुलेन्स चालकलगायतलाई पहिलो चरणमा दिनका लागि बुटवल प्रदेशमा आइपगेको कोरोना भाइरस (कोभिड–१९) विरुद्धको खोप प्रदेशका १२ वटै जिल्लामा पुर्‍याउन थालिएको छ । सोमबार आइपुगेको कोरोनाविरुद्धको खोप आज साँझसम्म प्रदेशका सबै जिल्लामा पुर्‍याइने र १४ देखि १८ माघसम्म खोप लगाइने सामाजिक विकास मन्त्रालयले जनाएको छ ।

लुम्बिनीमा कुन जिल्लामा कति जनालाई खोप लगाउने भन्नेबारे स्थानीय तहसँगको समन्वयमा निर्क्यौल गरी सामाजिक विकास मन्त्रालयले नामावलीसमेत तयार गरिसकेको सामाजिक विकासमन्त्री सुर्दशन बरालले बताए । अग्रपंक्तिमा खटिने स्वाथ्यकर्मी, चिकित्सक, शव वहानकर्मीलगायत गरी ३९ हजार ४ सय ९५ जनालाई खोप लगाइने उनको भनाइ छ । ‘स्थानीय तह र सम्बन्धित अस्पतालबाट लागत संकलन गरी पहिलो चरणको खोप दिन लागिएको हो,’ उनले भने ।

लुम्बिनीमा रहेका १२ वटै जिल्लामा खोप पुर्‍याउने जिम्मा प्रदेश स्वास्थ्य आपूर्ति व्यवस्थापन केन्द्रले मिलाएको छ । यसअघि नै विभिन्न खोप जिल्लामा पठाइरहेकाले कोरोनाविरुद्धको खोप आपूर्ति र ढुवानीमा कुनै समस्या नरहेको प्रदेश स्वास्थ्य आपूर्ति व्यवस्थापन केन्द्रका सूचना अधिकारी हरी प्रसाद आचार्यले बताए ।

३९ हजार ४ सय ९५ लाई २ डोज पुग्ने गरी ८ हजार ७ सय ६८ भाइल खोप प्राप्त भएको र यसलाई प्रदेशका सबै जिल्ला पुर्‍याइन थालिएको उनले बताए । रूपन्देही र नवलपरासीबाहेक सबै जिल्लामा खोप पुर्‍याइसकिएको जानकारी दिँदै आचार्यले आज साँझसम्ममा यी दुवै जिल्लाका सम्बन्धित स्थानमा खोप पुग्ने बताए ।

व्यवस्थापन केन्द्रका अनुसार बर्दियामा १ हजार ९ सय ६२ जनालाई पुग्ने ४ सय ३६ भाइल, बाँकेमा ७ हजार ७ सय जनालाई पुग्ने १ हजार ७ सय ९ भाइल, दाङमा २ हजार ९ सय ७० जनालाई पुग्ने ६ सय ५९ भाइल, कपिलवस्तुमा २ हजार ४३ जनालाई पुग्ने ४ सय ५४ भाइल र पाल्पामा २ हजार ४ सय ६० जनालाई पुग्ने ५ सय ४६ भाइल खोप पुर्‍याएको छ ।

त्यसैगरी, प्युठानमा १ हजार ६३ जनालाई पुग्ने २ सय ३६ भाइल, अर्घाखाँचीमा १ हजार ७ सय ३४ जनालाई पुग्ने ३ सय ८५ भाइल, रूकुम पूर्वमा ४ सय ६७ जनालाई पुग्ने १ सय ४ भाइल, गुल्मीमा १ हजार ८ सय ८२ जनालाई पुग्ने ४ सय १८ भाइल र रोल्पामा १ हजार ८९ जनालाई पुग्ने २ सय ४२ भाइल पुर्‍याएको व्यवस्थापन केन्द्रले जानकारी दिएको छ ।

त्यस्तै, रूपन्देहीमा १५ हजार ५३ जनालाई पुग्ने ३ हजार ३ सय ४२ भाइल र नवलपरासीमा १ हजार ७२ जनालाई पुग्ने २ सय ३८ भाइल आज साँझसम्म पुर्‍याउन केन्द्रको तयारी छ ।

प्रकाशित मिति: मंगलबार, माघ १३, २०७७ १३:४४