शिलापत्र रिभ्यु : अखबारको स्पेसमा यस्तो देखियो बालुवाटार घेर्ने नागरिक आन्दोलन

शिलापत्र रिभ्यु : अखबारको स्पेसमा यस्तो देखियो बालुवाटार घेर्ने नागरिक आन्दोलन

A+ A A-

हुन त मल्टिमिडियाले अक्सर सबै समाचार अघिल्लै दिन चर्चा गरिसकेका हुन्छन् । तैपनि खासखास बेलामा अखबारहरूको पोजिसनले अर्थ राख्ने गरेकै छ । जस्तो कि, हिजो सोमबार राजधानीमा देखिएका परिदृश्य र तिनले अखबारमा पाएका स्पेस । शिलापत्रले यसलाई सरसर्ती केलाउने जमर्को गरेको छ ।
०००

प्रधानमन्त्री केपी ओलीको गैरसंवैधानिक संसद विघटनविरुद्ध नागरिक समाज आन्दोलित छ । प्रतिनिधिसभा विघटनसँगै लोकतन्त्र नै संकटमा पर्दै गएको चिन्ता नागरिक अगुवाहरूको छ । त्यसैले चरणबद्ध कार्यक्रम लिएर सडकमा उत्रिएका छन् उनीहरू ।

यसै क्रममा हिजो (सोमबार) नागरिक समाजले प्रधानमन्त्री निवास बालुवाटारमा गरेको प्रदर्शनमा प्रहरीले सक्दो दमन गर्‍यो । प्रहरीकै व्यवहारले शान्तिपूर्ण आन्दोलन ढुंगा हानाहानमा बदलियो ।

‘लोकतन्त्रका लागि’ १४ वर्ष जेल बसेको बताउने प्रधानमन्त्री ओलीकै निर्देशनमा लोकतन्त्रको रक्षा खातिर सडकमा उत्रिएका अगुवाहरूमाथि पानीको फोहरा, अश्रुग्यास र लाठी बर्साइयो । प्रहरी गाडीले खेदीखेदी प्रदर्शनकारीमाथि फोहरा र लाठीचार्ज गर्‍यो । केही घाइते भए । कतिपय पक्राउ परे ।

यसपछि केपी ओलीका ‘साइबर सेना’ले नागरिक अगुवामाथि कटाक्ष मात्र गरिरहेका छैनन्, भ्रमसमेत छर्ने प्रयास गरिरहेका छन् । आन्दोलनका अगुवा पत्रकार नारायण वाग्लेले आफू र नागरिक आन्दोलनबारे छरिएका भ्रममा नपर्न आग्रह गरेका छन् । शान्तिपूर्ण आन्दोलनमा प्रहरीले दमन गरेपछि उनले हिजो बालुवाटारछेवैबाट तेस्रो जनआन्दोलन सुरु भएको बताएका थिए ।

हिजोको बालुवाटार घेराउ आन्दोलन र यसपछि उत्पन्न परिस्थितिलाई सञ्चारमाध्यमले आ–आफ्नै कोणबाट समेटेका छन् ।

कान्तिपुरले पहिलो पृष्ठमा ‘नागरिक आन्दोलनमाथि निर्मम दमन’ शीर्षकमा मुख्य समाचार छापेको छ । प्रदर्शनकारीमाथि प्रहरीले धरपकड गर्दै गरेको तस्वीरसहितको समाचारमा बृहत् नागरिक आन्दोलन र मानव अधिकारकर्मीको छुट्टाछुट्टै कार्यक्रममा सरकारले अत्यधिक बल प्रयोग गरेको उल्लेख छ । ‘बृहत् नागरिक आन्दोलनको कमलपोखरी–बालुवाटार मार्चपासमा सहभागी कवि, कलाकार, लेखक, पत्रकार, कानुन व्यवसायी, बुद्धिजीवीलगायतलाई प्रहरीले प्रधानमन्त्री निवास बालुवाटारको करिब पाँच सय मिटरवरै रोकेर अन्धाधुन्ध लाठी बर्साउनुका साथै पानीका फोहरा प्रहार गरेको थियो’, समाचारमा जनाइएको छ । पहिलो पृष्ठबाट बाँकी समाचार पृष्ठ ५ मा राखिएको छ, जहाँ मानवअधिकारकर्मी तथा शान्ति समाजका पूर्वसभापति कृष्ण पहाडीलगायतलाई प्रहरीले पक्राउ गर्दै गरेको तस्वीर छ ।

नयाँ पत्रिकाले नागरिक आन्दोलनको समाचारलाई ‘ब्यानर’ बनाएको छ । उसलेचाहिँ प्रधानमन्त्री केपी ओलीको ‘पशुपति यात्रा’ जोडेर समाचारलाई फरक कोणबाट प्रस्तुत गरेको छ । ‘जनताको अमूल्य मतबाट निर्वाचित संसद् विघटन गरेका प्रधानमन्त्री ओलीले देश, जनता र चराचर जगतको शान्तिका लागि भन्दै पशुपतिनाथमा पूजा गरेका छन्’, ‘जनमत कुल्चिएर पशुपतिको पाउमा’ शीर्षकको समाचारमा उल्लेख छ ।

ओलीले पशुपतिमा २५ हजार बत्ती बालेर अर्चना गरेको केही घण्टापछि शान्तिपूर्ण मार्चमा निस्किएका नागरिक अभियन्तालाई लाठी र पानीको फोहरा हानेर घाइते बनाइएको समाचारमा जनाइएको छ ।

नयाँ पत्रिकाको ब्यानर न्युजमा लेखक एवम् पत्रकार नारायण वाग्लेमाथि प्रहरीले पानीको फोहरा हान्दै गरेको फोटो छापेको छ । यसैगरी, अगुवाहरूको भनाइ समेटिएको छ । नागरिक आन्दोलनकै सेरोफेरोमा रहेर दोस्रो पेजमा अधिकारकर्मी मोहना अन्सारीको अन्तर्वार्ता छ । पहिलो पृष्ठमै छापिएको कार्टुनमा प्रधानमन्त्री ओलीको प्रहारबाट संविधान कोमामा गएको र संसदको हत्या भएकाे चित्र देखाइएको छ ।

नागरिकले पनि बालुवाटार आन्दोलनको समाचारलाई प्राथमिकता दिएको छ । फ्रन्ट पेजमा छापिएको ‘नागरिक आन्दोलनमा दमन’ शीर्षकको समाचारमा सरकारले नागरिक आन्दोलनमाथि दमन गरेको उल्लेख छ । सँगै प्रहरीले प्रदर्शनकारीमाथि पानीको फोहरा हान्दै गरेको तस्वीर पनि छापिएको छ ।

अन्नपूर्ण पोस्टले भने नागरिक आन्दोलनको समाचार छापेको छैन । पृष्ठ ४ मा एउटा सानो फोटोमै नागरिक आन्दोलनको समाचारलाई सीमित गरिदिएको अन्नपूर्णले फ्रन्ट पेजमा प्रधानमन्त्री ओलीको भाषण छापेको छ । अन्नपूर्णले दुई साताअघि ‘सर्वोच्चलाई सरकारको अडानयुक्त जवाफ’ भनी सात कोलममा फस्ट पेज समाचार हाल्दा पत्रकारिता वृत्तमा आलोचना भएको थियो ।

राजधानीले पनि नागरिक आन्दोलनको समाचारलाई प्राथमिकता दिएको छैन । दोसो पृष्ठमा प्रदर्शनकारीमाथि प्रहरीले पानीको फोहरा हान्दै गरेको एउटा फोटो राखेको राजधानीले पहिलो पृष्ठमा भने प्रधानमन्त्री ओलीकाे भाषणको समाचारलाई प्राथमिकताका साथ छापेको छ ।

यद्यपि, उसले नागरिक आन्दोलनको समाचारलाई फरक कोणमा प्रस्तुत गरेको छ । दोस्रो पृष्ठमा ‘कमलपोखरी संरक्षण माग गर्दै सडकमा स्रष्टा’ शीर्षकमा छापिएको समाचारमा नारायण वाग्ले, खगेन्द्र संग्रौला, दयाहाङ राईलगायत सहभागी सांस्कृतिक बाजागाजासहित कमलपोखरीबाट र्‍याली टंगालस्थित भाटभटेनी मन्दिर अघिको चौतारीमा पुगेर कोणसभामा परिणत भएको उल्लेख गरेको छ । तर, प्रतिगमनविरुद्ध प्रदर्शन गर्दा नागरिक अगुवा र मानवअधिकारकर्मीमाथि भएको दमनबारे समाचार छैन ।

प्रधानमन्त्री भाषणको समाचारलाई पहिलो पृष्ठमा छापेको गोरखापत्रले दोस्रो पृष्ठमा करिब सय शब्दमा नागरिक आन्दोलनको समाचारलाई समेटेको छ । उसले तेस्रो पृष्ठमा जनमुक्ति सेनाका कमाण्डरहरूसँगको भेटमा गरेको सम्बोधनको सम्पादित अंश भन्दै प्रधानमन्त्रीको भाषण छापेको छ ।

प्रकाशित मिति: मंगलबार, माघ १३, २०७७ १२:३४