प्रचण्डलाई ओलीको कटाक्ष : तिल्के गोरुको सिङ भाँच्चिइसक्यो, फाँ–फू नगरे हुन्छ

प्रचण्डलाई ओलीको कटाक्ष : तिल्के गोरुको सिङ भाँच्चिइसक्यो, फाँ–फू नगरे हुन्छ

A+ A A-

प्रधानमन्त्री केपी ओलीले शाकाहारी आन्दोलनले पुगेन भन्दै अशान्तिको धाकधक्कु नदेखाउन नेकपा प्रचण्ड–नेपाल समूहलाई चेतावनी दिएका छन् ।

दाङ देउखुरीमा ओली समूहको सभालाई सम्बोधन गर्दै उनले अर्को समूहका अध्यक्ष पुष्पकमल दाहाल ‘प्रचण्ड’ले अदालतले आफ्नो पक्षमा फैसला नगरे अशान्ति र अराजकता मच्याउने धाकधक्कु नलगाउन आग्रह गरे । काठमाडाैंमा ९ माघको विरोधसभामा प्रचण्डले ओलीको कदमलाई प्रोत्साहन पुग्नेगरी अदालतको निर्णय आए शान्ति प्रक्रिया संकटमा पर्ने चिन्ता व्यक्त गरेका थिए ।

प्रधानमन्त्री ओलीले तिल्के गोरुको कथा भनेर प्रचण्डमाथि कटाक्ष गरे । उनले भने, ‘एउटा तिल्के गोरु थियो । अर्को गोरु देख्नै नहुने । झम्टी हाल्ने, सिंघुरी खेल्ने, भुइँ खोस्रिने । फाँ-फू गरेर डराउने । एउटा नटर्ने बहरको फेला परेछ, ठोक्किँदा बुढो तिल्केको सिंग भाँच्चिएछ । रिस त उठेको थियो, तर के गर्ने सिङ भाँच्चिएको छ । यी तिल्के पनि यस्तै हुन् । फाँ–फू गर्दै गर्छन् सिङ फुक्लिसके ।’

उनले सिङ भाँच्चिएको तिल्के गोरुझै प्रचण्डसँग अशान्ति मच्चाउने क्षमता र दम दुवै नभएको टिप्पणी गरे । ‘जनता सचेत भइसके । अब यिनले केही पनि गर्न सक्दैनन् । धाकधक्कु नलगाए हुन्छ, तिघ्रा नटठाए हुन्छ’ ओलीले भने ।

उनले पार्टीको औपचारिक बैठकमा नआएर चौतारीमा बसेर अध्यक्ष घोषणा गर्दै हिँडेको भन्दै माधव नेपालको पनि आलोचना गरे । ‘केही मानिस बैठक नआएर चौतारीमा बसेर म अध्यक्ष बनें भनेर घोषणा गर्दै हिँडेका छन् । आयोगले त्यो पनि खत्तम पारिदियो । अध्यक्ष कोही बनेका छैनौं भनिदियो’ ओलीले भने ।

प्रचण्ड–नेपाल समूहले निर्वाचनका गतिविधि रोक्न आयोगमा गएको विषयमा पनि उनले टिप्पणी गर्न भ्याए । आफूले काम गर्न खोज्दा खुट्टा तानेर रोकिएको दाबी गर्दै उनले प्रश्न गरे, ‘जनताका बिचमा जाने तानाशाह हुन्छ कि चुनावको विरोध गर्ने ?’

प्रधानमन्त्री ओलीले भने, ‘मेरो तरिका जनतामा जाने, संगठित पार्ने र जनतालाई साथै लिएर चल्ने हो । दुई ठाउँबाट हारेपछि प्रधानमन्त्री हुने जस्केलाको बाटो मेरो होइन। हारेपछि पनि मलाई नै अध्यक्ष चाहियो भन्ने होइन ।’

प्रकाशित मिति: सोमबार, माघ १२, २०७७ १८:५५