यस्ताे छ स्ट्यान्डर्ड चार्टर्ड र लक्ष्मी बैंकको वित्तीय स्थिति

A+ A A-

स्ट्यान्डर्ड चार्टर्ड र लक्ष्मी बैंकले चालू आर्थिक वर्षको तेस्रो त्रयमास (चैत मसान्त)सम्मको आयव्यय विवरण सार्वजनिक गरेक छन् ।

स्ट्यान्डर्ड चार्टर्ड बैंक

निक्षेप र कर्जा

स्ट्यान्डर्ड चार्टर्ड बैंकले चालू अवधि (चैत मसान्त) सम्ममा ७० अर्ब ८१ करोड रुपैयाँ निक्षेप संकलन गरेर ५३ अर्ब ४६ करोड रुपैयाँ कर्जा लगानी गरेको छ । निक्षेप र कर्जा क्रमशः १७ र १८ प्रतिशत बढेको छ ।

खुद ब्याज आम्दानी

कर्जा लगानीबाट ४ अर्ब ६५ करोड रुपैयाँ ब्याज आम्दानी गरेको छ । ब्याज खर्च रकम २ अर्ब ९ करोड रुपैयाँ पछि २ अर्ब ५५ करोड रुपैयाँ खुद ब्याज आम्दानी गरेको छ । ब्याज आम्दानी ३४ प्रतिशत, ब्याज खर्च ९५ प्रतिशत र खुद ब्याज आम्दानी ७ प्रतिशत बढेको छ ।

अन्य आम्दानीपछिको खुद आम्दानी

शुल्क तथा कमिसनबाट हुने खुद आम्दानी अघिल्लो वर्षको यही अवधिभन्दा २० प्रतिशतले बढेर ५३ करोड १ लाख रुपैयाँ पुगेको छ ।

खुद शुल्क, कमिसन र ब्याज आम्दानी रकम ३ अर्ब ८ करोड रुपैयाँ छ । अघिल्लो वर्षभन्दा यस्तो आम्दानी यस वर्ष ९ प्रतिशत बढेको छ ।

ट्रेडिङ र अन्य सञ्चालन आम्दानीपछिको कुल सञ्चालन आम्दानी ३ अर्ब ७४ करोड रुपैयाँ छ । अघिल्लो वर्षभन्दा यस्तो आम्दानी यस वर्ष ९ प्रतिशत बढेको छ ।

नोक्सानी व्यवस्थापछिको खुद सञ्चालन आम्दानी ३ अर्ब ६४ करोड रुपैयाँ छ । यस्तो आम्दानी अघिल्लो वर्षभन्दा ९ प्रतिशत बढेको छ । करिब १० करोड रुपैयाँ नोक्सानी व्यवस्थामा राखेको छ ।

कर्मचारी खर्च (बोनससहित), सञ्चालन खर्च र ह्रास कट्टी व्यवस्थापछिको सञ्चालन आम्दानी २ अर्ब ४६ करोड रुपैयाँ छ । यस्तो आम्दानी अघिल्लो वर्षभन्दा ११.५ प्रतिशत बढी हो ।

गैरसञ्चालन आम्दानी तथा खर्च र आयकरपछि १ अर्ब ७३ करोड रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा ११.६ प्रतिशत बढेको छ ।

नाफा–नोक्सान बाँडफाँट

चालू अवधि (चैत मसान्त) सम्मको खुद नाफाअनुसार वैधानिक कोषलगायत विभिन्न कोषमा नियमकीय प्रावधानअनुरुप रकम व्यवस्था गरेपछि चालू अवधिको आम्दानीबाट १ अर्ब १० करोड रुपैयाँ बचत (सञ्चित नाफा) मा सारेको छ । बचत वा सञ्चित रकम वितरणयोग्य रकम हो । तर, बचत वा सञ्चितको अंकमा देखिए जति सबै रकम सेयरधनीलाई नाफा बाँडिन्छ भन्ने हुन्न । त्यसबाट पनि केही रकम सर्वसञ्चित कोषमा रहन सक्छ ।

चैत मसान्तको सञ्चित नाफा रकमलाई आधार मान्दा असार मसान्तसम्ममा यस्तो रकम १ अर्ब ४६ करोड रुपैयाँ हुने अनुमान गर्न सकिन्छ । चुक्ता पुँजीलाई भाग लगाउँदा १८ प्रतिशत हुन आउँछ । तर, यसको अर्थ आगामी वर्ष बैंकले १८ प्रतिशत लाभांश घोषणा गर्छ भन्ने होइन ।

पुँजी र कोषहरु

बैंकको पुँजी ८ अर्ब १ करोड रुपैयाँ छ । अघिल्लो वर्ष नाफा बाँडेर सम्भवतः बाँकी रहेको सर्वसञ्चित जगेडा रकम ५७ करोड रुपैयाँ र चैत मसान्तसम्मको सञ्चित नाफासहित १ अर्ब ६७ करोड रुपैयाँ सञ्चित नाफा देखिन्छ ।

वैधानिक जगेडा, अन्य जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत गरी बैंकको जगेडा कोषमा ४ अर्ब ५१ करोड रुपैयाँ देखिन्छ ।

सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न । चुक्ता पुँजी विभिन्न कोषसहित सेयरधनीको कोष १४ अर्ब १९ करोड रुपैयाँ पुगेको छ । पुँजी कोष अनुपात १८.८९ प्रतिशत छ ।

अन्य महत्त्वपूर्ण सूचक

खराब कर्जा ०.२० प्रतिशत, कोषको लागत ५.४१ प्रतिशत, कर्जा निक्षेप अनुपात ७८ प्रतिशत, आधार दर ७.७४ प्रतिशत, ब्याज अन्तर ४.७५ प्रतिशत, प्रतिसेयर आम्दानी २८ रुपैयाँ ८७ पैसा (वार्षिकीकरण गरिएको) र नेटवर्थ १७७ रुपैयाँ छ ।

बैंकको लगानी

बैंकको कर्जाबाहेकको लगानीतर्फ ६ अर्ब ८४ करोड रुपैयाँ छ । यस्तो किसिमको लगानी अघिल्लो वर्षको तुलनामा झन्डै ५० प्रतिशत बढेको छ ।

लक्ष्मी बैंकः निक्षेप बढ्न सकेन

निक्षेप र कर्जा

लक्ष्मी बैंकले चालू अवधि (चैत मसान्त) सम्ममा ७८ अर्ब ६६ करोड रुपैयाँ निक्षेप संकलन गरेर ७३ अर्ब ९६ करोड रुपैयाँ कर्जा लगानी गरेको छ । निक्षेप र कर्जा क्रमशः १.५ र ५ प्रतिशत बढेको छ ।

खुद ब्याज आम्दानी

कर्जा लगानीबाट ६ अर्ब ४१ करोड रुपैयाँ ब्याज आम्दानी गरेको छ । ब्याज खर्च रकम ४ अर्ब २१ करोड रुपैयाँ पछि २ अर्ब १९ करोड रुपैयाँ खुद ब्याज आम्दानी गरेको छ । ब्याज आम्दानी २७ प्रतिशत, ब्याज खर्च २४ प्रतिशत र खुद ब्याज आम्दानी ३४ प्रतिशत बढेको छ ।

अन्य आम्दानीपछिको खुद आम्दानी

शुल्क तथा कमिसनबाट हुने खुद आम्दानी अघिल्लो वर्षको यही अवधिभन्दा २६ प्रतिशतले बढेर ४४ करोड ६८ लाख रुपैयाँ पुगेको छ ।

खुद शुल्क, कमिसन र ब्याज आम्दानी रकम २ अर्ब ६४ करोड रुपैयाँ छ । अघिल्लो वर्षभन्दा यस्तो आम्दानी यस वर्ष ३३ प्रतिशत बढेको छ ।

ट्रेडिङ र अन्य सञ्चालन आम्दानीपछिको कुल सञ्चालन आम्दानी ३ अर्ब ३ करोड रुपैयाँ छ । अघिल्लो वर्षभन्दा यस्तो आम्दानी यस वर्ष २९ प्रतिशत बढेको छ ।

नोक्सानी व्यवस्थापछिको खुद सञ्चालन आम्दानी २ अर्ब ७४ करोड रुपैयाँ छ । यस्तो आम्दानी अघिल्लो वर्षभन्दा २६ प्रतिशत बढेको छ । नोक्सानी व्यवस्थामा २८ करोड ९२ लाख रुपैयाँ राखेको छ ।

कर्मचारी खर्च (बोनससहित), सञ्चालन खर्च र ह्रास कट्टी व्यवस्थापछिको सञ्चालन आम्दानी १ अर्ब ५२ करोड रुपैयाँ छ । यस्तो आम्दानी अघिल्लो वर्षभन्दा १९ प्रतिशत बढी हो ।

गैरसञ्चालन आम्दानी तथा खर्च र आयकरपछि १ अर्ब २ करोड रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा १८ प्रतिशत बढेको छ ।

नाफा–नोक्सान बाँडफाँट

चालू अवधि (चैत मसान्त) सम्मको खुद नाफाअनुसार वैधानिक कोष, पुँजी फिर्ता जगेडा कोषलगायत विभिन्न कोषमा नियमकीय प्रावधानअनुरुप रकम व्यवस्था गरेपछि चालू अवधिको नाफाबाट ७० करोड ५५ लाख रुपैयाँ (सञ्चित नाफा) मा सारेको छ । बचत वा सञ्चित रकम नाफा वितरणयोग्य रकम हो । तर, बचत वा सञ्चितको अंकमा देखिए जति सबै रकम सेयरधनीलाई नाफा बाँडिन्छ भन्ने हुन्न । त्यसबाट पनि केही रकम सर्वसञ्चित कोषमा रहन सक्छ ।

चैत मसान्तको सञ्चित नाफा रकमलाई आधार मान्दा असार मसान्तसम्ममा यस्तो रकम ९४ करोड रुपैयाँ हुने अनुमान गर्न सकिन्छ । बाँडफाँटका लागि यस रकम चुक्ता पुँजीलाई भाग लगाउँदा १० प्रतिशत हुन आउँछ । तर, यसको अर्थ आगामी वर्ष बैंकले १० प्रतिशत लाभांश घोषणा गर्ने सामर्थ्य राख्छ भन्ने होइन ।

पुँजी र कोषहरु

बैंकको पुँजी ८ अर्ब ९२ करोड रुपैयाँ छ । अघिल्लो वर्ष नाफा बाँडेर सम्भवतः बाँकी रहेको सर्वसञ्चित जगेडा २६ करोड रुपैयाँ र चैत मसान्तसम्मको सञ्चित नाफासहित ९६ करोड रुपैयाँ सञ्चित नाफा (जगेडा) देखिन्छ । वैधानिक जगेडा, अन्य जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत गरी बैंकको जगेडा कोष ४ अर्ब ५१ करोड रुपैयाँ देखिन्छ ।

सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न । चुक्ता पुँजी विभिन्न कोषहरुसहित सेयरधनीको कोष १४ अर्ब १९ करोड रुपैयाँ पुगेको छ । पुँजीकोष अनुपात ११.६० प्रतिशत छ ।

बैंकले ४० करोड ९० लाख रुपैयाँ ऋणपत्र लिएको छ । यो भनेको बैंकले लिएको ऋण हो । ऋणपत्र निश्चित अवधिका लागि निश्चित ब्याज तिर्ने गरी लिइएको हुन्छ । यसलाई पनि पुँजी नै मानिन्छ । अवधि पुगेपछि यस्तो रकम एकमुष्ट फिर्ता गर्नुपर्छ । त्यतिबेलासम्म यस्तो ऋण तिर्न हरेक वर्षको खूद आम्दानीबाट रकम व्यवस्था गर्दै जानुपर्छ । यसलाई पुँजी फिर्ता जगेडा कोष भनिन्छ ।

अन्य महत्त्वपूर्ण सूचक

खराब कर्जा १.२० प्रतिशत, कोषको लागत ७.३२ प्रतिशत, कर्जा निक्षेप अनुपात ७८ प्रतिशत, आधार दर १०.२६ प्रतिशत, ब्याज अन्तर ४.१९ प्रतिशत, प्रतिशेयर आम्दानी १५ रुपैयाँ ३९ पैसा (वार्षिकीकरण गरिएको) र नेटवर्थ १३५ रुपैयाँ छ ।

बैंकको लगानी र सहायक कम्पनी

बैंकले कर्जाबाहेकको लगानीतर्फ ५ अर्ब ८६ करोड रुपैयाँ छ । यस्तो किसिमको लगानी अघिल्लो वर्षको तुलनामा झन्डै २१ प्रतिशत घटेको छ । बैंकको पूर्ण स्वामित्वको लक्ष्मी क्यापिटल मार्केट्स र ७० प्रतिशत स्वामित्वको लक्ष्मी लघुवित्त सहायक कम्पनीका रुपमा रहेका छन् ।

प्रकाशित मिति: बुधबार, वैशाख २५, २०७६ ०१:४३