आजबाट कार्यान्वयमा आयो शेयर राफसाफमा टि प्लस टू नीति

A+ A A-

शेयरबजारमा आइतबारबाट राफसाफका लागि टि प्लस टू नीति लागू गरिएको छ । नियामक निकाय धितोपत्र बोर्डले २४ पुसमा टि प्लस टूको अनुमति दिएसगै आइतबारबाट कार्यन्वयमा आएको हो ।

सीडीएससीले यसअघि धितोपत्र कारोबारको राफसाफ तथा फर्छ्योट चक्रलाई दुई कार्य दिनभित्र सम्पन्न गर्ने उद्देश्यले धितोपत्र कारोबार राफसाफ तथा फर्छ्योट विनियमावली, २०६९ को उपविनियम १३ लाई संशोधन गरेर कार्यान्वयनका लागि बोर्डसँग अनुमति मागेको थियो ।

अनुमति पाएसँगै सीडीएससीले आजबाटै काम सुरु गरेको छ । अब प्रत्येक दिनको कारोबारको राफसाफ लगानीकर्ताले धेरै दिन कुर्नुपर्ने छैन । टि प्लस टू अनुसार कारोबारको राफसाफ तथा फर्छ्योटको काम कारोबार भएको २ दिनभित्र भइसक्ने छ ।

अब भने धितोपत्रको बिक्री गरिसकेपछि लगानीकर्ताहरूले आफूले बिक्री गरेको धितोपत्रको भारित औसत लागत गणना गर्ने र बिक्री गरेको धितोपत्र कारोबार भएको दिनबाहेक थप एक कार्यदिनमा कार्यालय समयभित्र सम्बधित दलाल व्यवसायीको पुल खातामा धितोपत्र हस्तान्तरण गर्नुपर्ने छ ।

यसरी लगानीकर्ताको धितोपत्र बिक्री भएकोे भोलिपल्ट १२ बजेभित्र दलाल व्यवसायीको पुल खातामा हस्तान्तरण नभएमा धितोपत्र संख्याको बिक्री रकमको २० प्रतिशत रकम क्लोज आउटमा जाने र सो बराबरको बिक्री रकमको २० प्रतिशत रकम जरिवानास्वरूप सम्बन्धित बिक्री गर्ने लगानीकर्ताको खाताबाट कट्टी हुने कानूनी व्यवस्था रहेको छ । बाँकी रकम भने कारोबार राफसाफपश्चात यथाशीघ्र बिक्री रकम लगानीकर्ताको खातामा जम्मा गर्ने दायित्व धितोपत्र व्यवसायीको हुनेछ ।

राफसाफ र पर्छ्योटको झमेलामा पर्दै आएका लगानीकर्ता समय घटेसँगै थप लाभांवित हुने देखिएको छ । यता ब्रोकर एशोसिएसनले टि प्लस टू अनुसार लगानीकर्ताले कारोबार गरेर सहयोग गर्न पनि अनुरोध गरेको छ । टि प्लस टू राफसाफ चक्रको सफल कार्यान्वयनले शेयरबजारलाई अन्तर्राष्ट्रियस्तरको यात्रामा थप अघि बढ्ने, धितोपत्र बजारमा थप तरलता वृद्धि हुने, बजारको उतार चढावबाट लगानीकर्ताले थप लाभ लिन सक्ने र सबैमा थप उत्साह र ऊर्जा मिल्ने बताएको छ ।

प्रकाशित मिति: आइतबार, माघ ११, २०७७ १६:१५