प्रदेश १ : नेकपा विवादमा कांग्रेसको इन्ट्री, देउवा समूह कमजोर, पौडेल पक्ष मुख्यमन्त्री राईको विपक्षमा

प्रदेश १ : नेकपा विवादमा कांग्रेसको इन्ट्री, देउवा समूह कमजोर, पौडेल पक्ष मुख्यमन्त्री राईको विपक्षमा

A+ A A-

कांग्रेस वरिष्ठ नेता रामचन्द्र पौडेलले १० माघमा विराटनगर ‌ओर्लेर भने, 'कांग्रेस अविश्वासको प्रस्तावको पक्षमा उभिन्छ । त्यसकाे प्रष्ट सन्देश हाे- प्रदेश १ मा मुख्यमन्त्री शेरधन राईविरुद्धकाे अविश्वासकाे प्रस्तावको पक्षमा मतदान गर्ने ।'

पौडेलले विराटनगरमा प्रदेश सरकारको भावी सत्ता समीकरणबारे त्यही अभिव्यक्ति दिए, जुन अघिल्लो दिन सभापति शेरबहादुर देउवालाई बूढानीलकण्ठमा भनेका थिए । पाैडेलले त्यस्ताे मत राख्नुमा पार्टीभित्रकाे समीकरण मात्र हाेइन, प्रदेशसभामा पाैडेलका पक्षमा देखिएकाे बहुमत संख्याले पनि बल दिइरहेकाे छ ।

पौडेल निरन्तर त्यही मत दोहोर्‍याइरहेका छन् । तर, पौडेलको यो प्रस्तावमा सभापति देउवा सहमत छैनन् । ७ माघमा प्रदेश १ का केन्द्रीय सदस्यसँग सभापति देउवाले अविश्वासको प्रस्तावबारे मत बुझेका थिए ।

केन्द्रीय सदस्य शेखर कोइराला, मीनेन्द्र रिजाल, विश्वप्रकाश शर्मा, भीष्म आङदाम्वे, गुरुराज घिमिरेसहितको पंक्तिले देउवालाई प्रष्ट भनेका थिए, 'सडकमा ओलीविरुद्ध आन्दोलित हुने अनि प्रदेशमा ओलीलाई समर्थन गर्नु हुँदैन । त्यही मत बागमती प्रदेश सरकारको सन्दर्भमा पनि देउवालाई त्यस क्षेत्रका केन्द्रीय सदस्यहरूले राखेका थिए ।'

पौडेलले विराटनगरमा प्रदेश सरकारमा मुख्यमन्त्रीविरुद्ध मत दिने प्रष्ट धारणा राख्नुले महत्त्व राख्ने देखिन्छ । किनकि प्रदेश १ मा पौडेल पक्षको बहुमत छ । प्रदेश १ को कांग्रेस संसदीय दलमा जम्माजम्मी पाँच जना मात्रै देउवाको पक्षमा खुलेका छन् ।

देउवा समूहका एक सांसदका अनुसार अहिलेसम्म हिमाल कार्की, शेखरचन्द्र, थापा, ओमप्रकाश सरावगी, मोहम्मद ताहिर मियाँ र विन्दिया देउवा पक्षमा खुलेका छन् । प्रदेश १ मा कंग्रेस संसदीय दलको नेता राजीव कोइराला र प्रमुख सचेतक केदार कार्की दुवै वरिष्ठ नेता पौडेल पक्षमा खुलेका छन् ।

२१ जना सांसदमध्ये १३ जना शेखर कोइरालाको पक्षमा छन् । कोइरालासमेत रहेको पौडेल समूहमा १६ जना सांसद देखिएपछि देउवा दबाबमा छन् ।सचेतक सुयरमाराज राईले पनि स्वीकार गरे- पाैडेल पक्ष बहुमतमा छ । शिलापत्रसँग भने, 'संख्या त भन्न सक्दिनँ तर बहुमत पाैडेल समूहकै छ ।'

सभापति देउवा भने प्रदेश १ मा ओली समूहका मुख्यमन्त्री राईको पक्षमा छन् । राष्ट्रपति विद्यादेवी भण्डारी र प्रधानमन्त्री केपी ओलीको प्रयासमा कांग्रेस सभापति देउवा र केन्द्रीय सदस्य ज्ञानेन्द्रबहादुर कार्की राईको पक्षमा देखिएका छन् । तर, प्रदेश १ का केन्द्रीय सदस्य मात्र होइन प्रदेश सांसदसमेत राईको विपक्षमा उभिएपछि देउवा धरमरमा छन् ।

देउवा अहिले प्रधानमन्त्री केपी ओलीसँगै मिलेर जानुपर्ने पक्षमा छन् । त्यसैले प्रतिनिधिसभा पुनःस्थापनाभन्दा निर्वाचनमा उनको जोड छ । त्यसै अनुसार आन्दोलनलाई केन्द्रीकरण गरेका छन् । उता पौडेलसहित कांग्रेसको ठूलो पंक्ति प्रतिनिधिसभा पुनःस्थापनाको पक्षमा छन् ।

प्रकाशित मिति: आइतबार, माघ ११, २०७७ १४:२०