जनयुद्धसँग साइनो नभएका लीलबहादुर कसरी जनमुक्ति सेनाको नेता ?

A+ A A-

लीलबहादुर थापा पूर्वजनमुक्ति सेनाको नेतृत्व गरेर १० माघको मध्याह्नतिर बालुवाटार छिर्दा धेरैलाई लागेको थियो– उनको लिगेसी जनमुक्ति सेनासँग छ । तर थापा स्वयम् चाँहि माओवादी शान्ति प्रक्रियामा आएपछि भित्रिएका हुन् ।

मोहनविक्रम सिंह नेतृत्वको नेकपा मसालमा राजनीतिक गरेका थापा २०६५ पछि मात्रै माओवादीमा प्रवेश गरेका हुन् । जनयुद्धसँग सम्बन्ध नभएको मात्र होइन बरु प्रतिकारमा भूमिका खेलेका थापाले जनयुद्धमा सहभागी नभएका अर्का लेनिन विष्टलाई लिएर नेकपाको ओली समूहमा प्रवेश गरेका हुन् ।

एकताकेन्द्र मसालको राजनीतिमा सक्रिय थापा रामसिंह श्रीषको नेकपा एकीकृतमा आवद्ध भएका थिए । त्यहीँबाट तत्कालीन नेकपा माओवादीमा प्रवेश गरेका थापा खासमा प्रचण्डसँग खुबै रिसाएका थिए ।

पूर्वएमालेसँग एकता गरेपछि भूमिकाविहीन भएका थापा राजनीतिक नियुक्तिको दौडमा पनि थिए ।

उनी नेकपा विभाजन भएपछि प्रचण्ड–माधव समूहको केन्द्रीय समिति बैठकमा सहभागी हुन कार्की पार्टी प्यालेसमा पुगेका थिए । त्यो बीचमा थापालाई बालुवाटारले आफ्नो पक्षमा ल्याउन खुबै प्रयास गरेको थियो ।

प्रचण्ड–माधव समूहले बाग्लुङका अर्का नेता देवेन्द्र पौडेललाई गण्डकी प्रदेशको इञ्चार्ज बनाएपछि थापा बिच्किएर ओली समूहमा पुगेका हुन् । पार्टी एकतापछि भूमिका नपाएको भन्दै असन्तुष्ट थापाको जिल्लामा खासै पक्कड नभएका कारण जिम्मेवारी पनि दिएको थिएन ।

अझ ०७४ निर्वाचनमा पनि थापाले बाम गठबन्धनलाई धोका दिएर कांग्रेसलाई साथ दिएपछि प्रचण्डसहितका नेताहरु रुष्ट थिए । एकतापछि थापालाई खेलकुद विभागको सहइञ्चार्ज बनाउने भनिएको थियो । योगेश भट्टराईलाई इञ्चार्ज र थापालाई सहइञ्चार्ज बनाउने तयारी भइरहेको थियो । भट्टराई पर्यटनमन्त्री बनेर उनको विभाग पर्यटनतिर परेपछि थापा आफ्नो विभागबारे अन्यौलमै थिए । त्यही बीचमा प्रचण्डले टोपबहादुर रायमाझीलाई इञ्चार्ज बनाए ।

भलिबल संघको उपाध्यक्षसमेत रहेका थापाको रुची खेलकुद विभागमै थियो । तर, त्यहाँ जिम्मेवारी नपाएपछि रुष्ट थापालाई पछि खेलकुद परिषद्को सदस्यसचिव बनाउने आश्वसन पनि थियो । सदस्यसचिवमा रमेश सिलवाल र थापा प्रतिस्पर्धामा थिए । प्रधानमन्त्री केपी ओलीले सिलवाललाई सदस्यसचिव बनाएपछि दोस्रो नम्बरमा सिफारिस भएका थापा त्यहाँ पनि सफल भएनन् ।

२०७० को निर्वाचनमा माओवादीको टिकटमा बाग्लुङबाट चुनाव लडेका थापाले करिब ८ हजार मतमात्रै ल्याएका थिए । थापासँग लामो सहकार्य गरेका बांग्लुङका एक नेताका अनुसार माओवादी जनयुद्धमा थापाको कुनै भूमिका थिएन, बरु बांग्लुङमा माओवादीविरुद्धको अभियानमा भने सक्रिय थिए ।

थापाको समूहले ०४४ सालमा प्रहरी चौकी आक्रमण गरेको थियो । त्यस्तै २०४८ को माघे संक्रान्तिमा इन्स्पेक्टर ज्ञानेश्वर वैद्य नेतृत्वको प्रहरी टोलीमाथि आक्रमण गर्दा वैद्यको निधन भएपछि थापा भूमिगत हुनुपरेको थियो ।

ज्यान मुद्दा खेपेका थापाले २०५१ सालमा प्रधानमन्त्री मनमोहन अधिकारी निर्वाचित भएपछि महान्यायधिवक्ताको कार्यालयमा आत्मसर्पण गरेका थिए । त्यसपछि थापाको ज्यान मुद्दा फिर्ता भएको हो । मुद्दा फिर्तापछि खुला राजनीतिमा आएका थापा ०५४ सालको स्थानीय निर्वाचनमा हुक्दीसिर गाविसको वडाध्यक्ष निर्वाचित भए ।

प्रकाशित मिति: आइतबार, माघ ११, २०७७ ११:४०