जयपृथ्वी राजमार्गको स्तरोन्नतिको काम गुणस्तरहीन, दुई महिनामै उप्कियो कालोपत्रे

जयपृथ्वी राजमार्गको स्तरोन्नतिको काम गुणस्तरहीन, दुई महिनामै उप्कियो कालोपत्रे

A+ A A-

बझाङको जयपृथ्वी राजमार्गअन्तर्गत बागथलादेखि चैनपुरसम्मको सडक स्तरोन्नतिको काम गुणस्तरहीन भएको स्थानीयको आरोप छ । सडक स्तरोन्नति गर्ने क्रममा निमार्ण कम्पनीले हातले उप्काउन मिल्नेगरी कालोपत्रे गरेको भन्दै स्थानीयले गुणस्तरीय काम गर्न ठेकेदार कम्पनीलाई काम सुधार्न दबाब दिएका छन् । अहिले राजमार्गको बागथलादेखि चैनपुरसम्मका सडकमा भएका खाल्डा पुर्ने कालोपत्रे गर्ने र मोडहरू फराकिलो गर्ने काम भइरहेको छ ।

जयपृथ्वी राजमार्गका स्तरोन्नतिका लागि जागृति निर्माण सेवा, ग्वाल्लेक निर्माण सेवा र जलजला निर्माण सेवाले ठेक्का लिएका छन् । सडकमा भएका खाल्डा पुर्ने र कालोपत्रे गर्ने ठेक्का जलजला निमार्ण सेवाले लिएको छ । जयपृथ्वी राजमार्गको स्तरोन्नतिका लागि सरकारले पुल निर्माण, सडक पूर्वाधार विकास कार्यक्रम, राजमार्ग स्तरोन्नति तथा पुनर्स्थापना कार्यक्रम र सडक क्षेत्र विकास आयोजनाअन्तर्गतका कार्यक्रमबाट करोडौँ रकम खर्च गरेको छ ।

विकास निर्माणको नाममा नागरिकको आँखामा छारो हालेको भन्दै सरकोकारवाला निकाएबाट यथासिग्र अनुगमन गरी कारबाही नगरे सडक निमार्ण कार्यमा अवरोध गर्ने स्थानीयले चेतावनी दिएका छन् । सडकको स्तरोन्नति गर्ने क्रममा निमार्ण कम्पनीले गरेको कालोपत्रे गुणस्तरहीन भएको स्थानीय नरेन्द्र खडकाले बताए ।

'सडक स्तरोन्नतिको काम गुणस्तरहीन भइरहेको छ भन्ने गुनासो बढेपछि युवा मिलेर सडक कालोपत्रे भएको ठाँउको अवलोकन गरेका थियौँ । निमार्ण कम्पनीले हातले उप्काउन मिल्नेगरी कालोपत्रे गरेको रहेछ । अहिले पनि सडक स्तरोन्नतिको काम चलिरहेको छ,' उनले भने, 'सदरमुकाम चैनपुरनजिकैको सडकखण्डमा गुणस्तरहीन काम भइरहेको भए पनि सरोकारवाला निकाय मौन बसेको छ । दुई महिनाअघि गरिएको कालोपत्रे उप्किन थालेको छ ।'

सडकको गुणस्तर राम्रो बनाउनुभन्दा पनि छिटो काम सकेर मुनाफा र कमिसन कुम्ल्याउन ठेकेदार र आयोजना कार्यालय लागेका कारण यस्तो समस्या भएको खडकाको भनाइ छ । सडकको स्तरोन्नतिका लागि बजेट विनियोजन हुने गरेको भए पनि ठेकेदार कम्पनीको लापरबाहीका कारण समयमै सडकको स्तरोन्नति हुन नसक्दा सर्वसाधारणले सास्ती खेपिरहनु परेको छ । अहिले यात्रुहरूले यो जयपृथ्वी राजमार्ग होकी खाल्डे राजमार्ग हो भनेरसमेत प्रश्न गर्न थालेका छन् ।

विश्व बैंकको आर्थिक सहयोगमा ३० करोडको लागतमा ७ वर्षअघि कालोपत्रे गरिएको बागथला चैनपुर सडकखण्ड हस्तान्तरण नगर्दै बिग्रेको थियो । ओटासिल प्रविधिमा आधारित यस सडकखण्डको कालोपत्रे गुणस्तरहीन भएका कारण छिटो बिग्रिएको स्थानीयको भनाइ छ ।

काम गर्दा केही ठाँउमा प्राविधिक कारणले गल्ती भएको जलजला निर्माण सेवा काठमाडौंका प्रतिनिधि हरिप्रशाद खनालले बताए । 'कम्पनीले सडकमा भएका खाल्डा पुर्ने क्रममा केही त्रुटि देखिएको छ । हामीले बिग्रेको ठाँउमा पुनः काम गरेका छौँ,' उनले भने, 'सडक डिभिजन कार्यालयसँगको सम्झौताअनुसार गत वर्ष नै कालोपत्रेको काम सक्नुपर्ने हो तर गएको चैत मसान्तमा स्तरोन्नतिको काम सक्ने लक्ष्य भए पनि कोरोना महामारीका कारण भएको बन्दाबन्दीले स्तरोन्नतिको काममा समयमै सम्पन्न गर्न सकिएको छैन ।' केही ठाँउमा प्राविधिक कारण त्रुटि भएको भए पनि स्टमेटअनुसारकै काम गरिने उनको भनाइ छ ।

उक्त सडकखण्डको खाल्डा पुर्ने र कालोपत्रेका लागि करिब ६ करोडमा जलजला निमार्ण सेवासँग सम्झौता भएको थियो । निमार्ण कम्पनीले सडक कालोपत्रे गर्ने क्रममा केही ठाँउमा मापदण्डविपरीत गरेको देखिएको डिभिजन सडक कार्यालय बैतडीका प्राविधिक ईन्द्रराज जोशीले बताए ।

'सडक स्तरोन्नतिका लागि बीडीएम २ सेमी बाक्लो बिच्छ्याउनुपर्ने हुन्छ । निमार्ण कम्पनीले केही ठाउँमा मापदण्ड नपुगाएको देखिन्छ । ममर्त गर्ने ठाउँमा एकलट माटो सफा गरेर कोलतारोको झोल प्रयोग गर्नुपर्दछ', उनले भने 'तर, कम्पनीले सीधै कोलतारो र गिट्टी हालेरे कालोपत्रे गरेको देखिन्छ ।' निमार्ण कम्पनीले सडक तत्काल कमसल काम रोकेर मापदण्डबमोजिम काम गराइने र अटेर गरेमा भुक्तानीसमेत रोकिने उनको भनाइ छ ।