सडकको स्तरोन्नति गुणस्तरहीन, स्थानीय भन्छन्– जयपृथ्वी राजमार्ग हो कि खाल्डे राजमार्ग ?

सडकको स्तरोन्नति गुणस्तरहीन, स्थानीय भन्छन्– जयपृथ्वी राजमार्ग हो कि खाल्डे राजमार्ग ?

A+ A A-

बझाङको जयपृथ्वी राजमार्गअन्तर्गत बागथलादेखि चैनपुरसम्मको सडकस्तरोन्नतिको काम गुणस्तरहीन भएको छ । सडक स्तरोन्नतिका क्रममा निमार्ण कम्पनीले हातैले उप्काउँदा पनि उप्किने गरी गुणस्तरहीन कालोपत्रे गरेको भन्दै स्थानीय आक्रोशित बनेका छन् ।

गुणस्तरहीन काम भएपछि स्थानीयले गुणस्तरीय काम गर्न ठेकेदार कम्पनीलाई दबाब दिएका छन् । राजमार्गको बागथलादेखि चैनपुरसम्मका सडकमा भएका खाल्डा पुर्ने कालोपत्रे गर्ने र मोडहरू फराकिलो गर्ने काम भइरहेको छ । जयपृथ्वी राजमार्गका स्तरोन्नतिका लागि जागृति निर्माण सेवा, ग्वाल्लेक निर्माण सेवा र जलजला निर्माण सेवाले ठेक्का लिएका छन् ।

सडकमा भएका खाल्डा पुर्ने र कालोपत्रे गर्ने ठेक्का जलजला निमार्ण सेवाले लिएको छ । जयपृथ्वी राजमार्गको स्तरोन्नतिका लागि सरकारले रणनैतिक सडक पुल निर्माण, सडक पूर्वाधार विकास कार्यक्रम, राजमार्ग स्तरोन्नति तथा पुनःस्थापना कार्यक्रम र सडक क्षेत्र विकास आयोजनाअन्तर्गतका कार्यक्रमबाट करोडौं रकम खर्च गरेको छ ।

विकास निर्माणको नाममा नागरिकको आखाँमा छारो हानेको भन्दै सरकोकारवाला निकायबाट यथाशीघ्र अनुगमन गरी कारबाही नगरे सडक निमार्ण कार्यमा अवरोध गर्ने स्थानीयले चेतावनी दिएका छन् ।

सडकको स्तरोन्नतिका क्रममा गुणस्तरहीन कालोपत्रे भएको स्थानीय नरेन्द्र खड्काले बताए । ‘स्तरोन्नतिको काम गुणस्तरहीन भइरहेको छ भन्ने गुनासो बढेपछि युवाहरु मिलेर सडक कालोपत्रे भएको ठाँउको अवलोकन गरेका थियौँ,’ उनले भने, ‘हातले उप्काउन मिल्नेगरी कालोपत्रे गरिएको रहेछ ।’

अहिले पनि सडकस्तरोन्नतिको काम चलिरहेको छ । सदरमुकाम चैनपुर नजिकैको सडकखण्डमा गुणस्तरहिन काम भइरहेको भए पनि सरोकारवाला निकाय मौन बसेको छ । दुई महिनाअघि गरिएको कालोपत्रे उप्किन थालेको छ ।

सडकको गुणस्तर राम्रो बनाउनु भन्दा पनि छिटो काम सकेर मुनाफा र कमिसन कुम्ल्याउन ठेकेदार र आयोजना कार्यालय लागेका कारण यस्तो समस्या भएको खड्काको भनाइ छ । सडकको स्तरोन्नतिका लागि बजेट विनियोजन हुने गरेको भए पनि ठेकेदार कम्पनीको लापरबाहीका कारण समयमै सडकको स्तरोन्नति हुन नसक्दा स्थानीयले सास्ती खेपिरहनु परेको छ । अहिले यात्रुहरूले ‘जयपृथ्वी राजमार्ग होकी खाल्डे राजमार्ग हो ?’ भनेर समेत प्रश्न गर्न थालेका छन् ।

विश्व बैंकको आर्थिक सहयोगमा ३० करोडको लागतमा ७ वर्षअघि कालोपत्रे गरिएकोे बागथला चैनपुर सडक खण्ड हस्तान्तरण नगर्दै बिग्रेको थियो । ओटासिल प्रविधिमा आधारित यस सडकखण्डको कालोपत्रे गर्ने काम गुणस्तरहीन भएका कारण छिटो बिग्रिएको स्थानीयको भनाइ छ । सडकको स्तरोन्नतिका लागि बजेट विनियोजन हुने गरेको भए पनि ठेकेदार कम्पनीको लापरबाहीका कारणसडकको स्तरोन्नति हुन सकेको छैन ।

काम गर्दा केही ठाँउमा प्राविधिक कारणले गल्ति भएको जलजला निर्माण सेवा काठमांडौँका प्रतिनिधि हरिप्रशाद खनालले बताए । ‘सडकमा भएका खाल्डा पुर्ने क्रममा केही त्रुटी देखिएको छ,’ उनले भने, ‘हामीले विग्रेको ठाँउहरुमा पुनः काम गरेका छौँ ।’

सडक डिभिजन कार्यलय सगको सम्झौता अनुसार गत बर्षनै कालोपत्रेको काम सक्नु पर्ने भए पनि कोरोना महामारीका कारण भएको बन्दाबन्दीले स्तरोन्नतिको काममा समयमै सम्पन्न गर्न नसकिएको उनले बताए । केही ठाँउमा प्राविधिक कारण त्रुटी भएको भए पनि स्टमेट अनुसारकै काम गरिने उनको खनालले बताए ।

ओटासिल सडक उप्कीसकेकोले सडकखण्डको खाल्डा पुर्ने र कालोपत्रेका लागि करिब ६ करोडमा जलजला निमार्ण सेवा सगँ सम्झौता भएको थियो । निमार्ण कम्पनीले सडक कालोपत्रे गर्ने क्रममा केही ठाँउहरुमा मापदण्डविपरित गरेको देखिएको डिभिजन सडक कार्यालय बैतडिका प्राविधिक ईन्दराज जोशिले बताए ।

‘सडक स्तरोन्नतिका लागि बिडिएम २ सेमी बाक्लो बिच्छ्याउनुपर्ने हुन्छ,’ उनले भने, ‘निमार्ण कम्पनीले केही ठाँउहरुमा मापदण्ड नपुर्याएको देखिन्छ ।’ ममर्त गर्ने ठाँउमा एकलट माटो सफा गरेर कोलतारोको झोल प्रयोग गर्नु पर्नेमा कम्पनीले सिधै कोलतारो र गिट्टी हालेरे कालोपत्रे गरेको उनले बताए । निमार्ण कम्पनीले सडक तत्काल कमसल काम रोकेर मापदण्ड बमोजिम काम गराईने र अटेर गरेमा भुक्तानी समेत रोकिने उनको भनाइ छ ।

प्रकाशित मिति: शनिबार, माघ १०, २०७७ ०७:०१