'ओलीले शान्ति प्रक्रिया बिथोल्न लागे' भनेर मञ्चबाट ओर्लिएका प्रचण्डले बाबुरामसँग भेटे, सहकार्यको प्रस्ताव

'ओलीले शान्ति प्रक्रिया बिथोल्न लागे' भनेर मञ्चबाट ओर्लिएका प्रचण्डले बाबुरामसँग भेटे, सहकार्यको प्रस्ताव

फाइल तस्वीर

A+ A A-

प्रधानमन्त्री केपी ओलीले शान्ति प्रक्रिया नै बिथाेल्न खाेजेकाे भाषण गरेका नेकपा (माधव-प्रचण्ड) अध्यक्ष पुष्पकमल दाहाल 'प्रचण्ड'ले पूर्वप्रधानमन्त्री बाबुराम भट्टराईसँग छलफल गरेका छन् ।

प्रतिनिधिसभा विघटनकाे विराेधमा शुक्रबार काठमाडौंमा आयोजित सभालाई सम्बोधन गरेलगत्तै प्रचण्डले जनता समाजवादी पार्टी संघीय परिषद् अध्यक्ष भट्टराई र उपराष्ट्रपति नन्दबहादुर पुनसँग लैनचाैरस्थित उपराष्ट्रपति भवन पुगेर छलफल गरेका हुन् । स्राेतका अनुसार सशस्त्र युद्धकालका यी सहयाेद्धाबीच आधा घण्टा छलफल भएकाे थियाे । ओलीले शान्ति प्रक्रियामाथि धावा बाेल्न थालेकाे, बिथाेल्न खाेजेकाले आफूहरू मिलेर अघि बढ्नुपर्ने प्रस्ताव प्रचण्डले राखेका छन् । भेटमा प्रचण्डले केपी र उनका गुटका मान्छेले विकसित राजनीतिक घटनाक्रम ठूलै सेटिङकाे उपज भएकाे कुरा गर्दै हिँडेकाे र केपीले शान्ति प्रक्रिया बिथोल्न सक्ने बताएका थिए ।

शुक्रबार रत्नपार्ककाे विरोधसभालाई सम्बोधन गर्दै प्रचण्डले ओलीबाट शान्ति प्रक्रिया बिथाेलिने खतरा औँल्याएका थिए ।

भट्टराईले प्रचण्डसँग छलफल भएकाे पुष्टि गरे । उनले पार्टीकाे स्वार्थभन्दा माथि उठ्ने बेला आएकाे समेत बताएका छन् । 'अहिले प्रत्येक जिम्मेवार नागरिक आफ्नाे र पार्टीकाे स्वार्थभन्दा माथि उठ्ने बेला आएकाे छ । यसै क्रममा मैले ओली प्रतिगमनविरुद्ध संयुक्त जनआन्दाेलन निर्माण गर्ने प्रयासस्वरूप पूर्वप्रम र दलका नेताहरू शेरबहादुर देउवा, माधव नेपाल, प्रचण्डगायत अन्य नेताहरूसँग भेटघाट गरेकाे हुँ, गर्दै रहनेछु', भट्टराईले ट्वीट गरेका छन् ।

अहिले प्रत्येक जिम्मेवार नागरिक आफ्नो र पार्टीको स्वार्थभन्दा माथि उठ्ने वेला आएको छ।यसै क्रममा मैले ओली प्रतिगमनविरूद्ध संयुक्त जनआन्दोलन निर्माण गर्ने प्रयास स्वरूप पूर्व प्रम र दलका नेताहरू शेरबहादुर देउबा,माधव नेपाल,प्रचण्ड लगायत अन्य नेताहरूसंग भेटघाट गरेको हुॅ। गर्दैरहनेछु!
— Baburam Bhattarai (@brb1954) January 22, 2021

१४ वर्षअघि अर्थात् ५ मंसिर २०६३ मा तत्कालीन माओवादी र नेपाल सरकारबीच बृहत् शान्ति सम्झौता भएकाे थियाे । त्यसपछि तत्कालीन माओवादी हतियारबद्ध द्वन्द्वबाट शान्तिपूर्ण रूपान्तरणको बाटोमा आएकाे थियाे । शान्ति प्रक्रियाको बाँकी कामका रूपमा लिइने संक्रमणकालीन न्याय सम्बद्ध आयोगहरू अहिले पनि क्रियाशील छन्

प्रकाशित मिति: शुक्रबार, माघ ९, २०७७ २३:५८