ओलीको कदमलाई सडकबाटै पररास्त गर्ने प्रचण्ड-माधव समूहको उद्‍घोष

A+ A A-

नेकपा प्रचण्ड-नेपाल समूहले प्रधानमन्त्री केपी ओलीले प्रतिनिधिसभा विघटन गरी प्रतिगमन गरेको भन्दै ओलीलाई सडक आन्दोलनमार्फत नै पररास्त गर्ने उद्‍घोष गरेका छन् ।

राजधानीमा शुक्रबार आफूपक्षीय समूहको विरोधसभालाई सम्बोधन गर्दै अध्यक्षद्वय माधवकुमार नेपाल, पुष्पकमल दाहाल 'प्रचण्ड', वरिष्ठ नेता झलनाथ खनाल, नेता घनश्याम भुसाल, पम्फा भुसाललगायतले प्रतिनिधिसभा विघटन संविधानमाथिको प्रहार भएको भन्दै संविधान र लोकतन्त्रको रक्षाका निम्ति आन्दोलनलाई सशक्त बनाउने र सडकमार्फत नै प्रतिगमनलाई पररास्त गरिने बताएका हुन् ।

सभालाई सम्बोधन गर्दै अध्यक्ष नेपालले निर्वाचित भएर पनि ओली तानाशाही बनेको तर्क गर्दै उनलाई सडकबाटै पररास्त गरिने दाबी गरे । सभामा उपस्थित संख्याले जनतामा प्रतिगमनविरुद्धको जागरण पुष्टि गर्ने भन्दै नेपालले यो उपस्थिति कास्टिङ मात्रै भएको तर्क गरे ।

‘प्रतिगमनविरुद्धको यो उपस्थितिले मलाई जनआन्दोनलको झल्को दिएको छ । यो कास्टिङ मात्रै हो । फिल्म अझै सुरु हुन बाँकी छ,’ नेपालले भने । ओलीको प्रतिगमनकारी कदम सच्चाएर नेकपा जनताको माझमा आउने नेपालले आग्रह गरे ।

सभालाई सम्बोधन गर्दै अर्का अध्यक्ष प्रचण्डले पनि प्रतिगनविरुद्ध जनता जागेकाले अब ओलीलाई सडकमार्फत नै पररास्त गर्न सकिने मत व्यक्त गरे । ‘नेपाली जनतामा प्रतिगमनविरुद्धको जागरण अझै कायम रहेको यो उपस्थितिले जनाएको छ । प्रतिगमनको सेटिङभन्दा जनताको सेटिङको जित निश्चित हुन्छ,’ प्रचण्डले भने । जनताकै बलमा ओलीको प्रतिगमनलाई पररास्त गर्ने प्रचण्डको भनाइ थियो ।

यस्तै, वरिष्ठ नेता खनालले प्रधानमन्त्री ओलीले प्रतिनिधिसभा विघटन गरी प्रतिगमन गरेकाले प्रतिगमन नसच्चिएसम्म सडक संघर्ष नछाड्ने बताए । प्रतिगमन सच्याउन र संविधान रक्षाका लागि आफ्नो समूहले सडक नछाड्ने खनालको उद्घोष छ । ‘जबसम्म प्रतिगमन सच्चिँदैन, जबसम्म संविधानको रक्षा हुँदैन, हामी सडकमा उत्रिन्छौँ,' खनालले भने ।

यस्तै, नेता घनश्याम भुसालले सडक आन्दोलनमार्फत नै ओलीलाई घुँडा टेकाउनुपर्ने बताए । ओलीलाई घुँडा टेकाएर मात्रै आफ्नो समूहले विश्राम लिने उनको भनाइ छ । ‘आन्दोलनले अब ओलीलाई घुँडा टेकाएर मात्रै विश्राम लिनेछ,’ उनले भने ।

यस्तै, नेता पम्फा भुसालले पनि ओलीले जनताको बलिदानीपूर्ण संघर्षका उपलब्धिलाई हमला गरेकाले उनलाई परास्तै गर्नैपर्ने बताइन् । ‘जनताले पुन: संघर्षबाट ओलीको कदमलाई परास्त गर्ने दिन आएको छ । हामी सडकबाटै ओलीलाई पररास्त गर्छौँ,’ उनले भनिन् ।

ओलीले संविधान र शान्ति प्रक्रिया नै बिथोल्न खोजे

प्रचण्ड-नेपाल समूहले ओलीले संविधान र शान्ति प्रक्रिया नै विघटन गर्न खोजेको आरोप लगाएको छ । विरोधसभालाई सम्बोधन गर्दै अध्यक्षद्वय नेपाल र प्रचण्ड तथा वरिष्ठ नेता खनालले ओलीले प्रतिनिधिसभा मात्रै नभई संविधान र राजनीतिक व्यवस्था नै विघटन गरेको तर्क गरेका छन् ।

अध्यक्ष नेपालले प्रधानमन्त्री ओलीले राजनीतिक प्रणाली र स्थायित्वमाथि नै धावा बोलेको बताए । ‘संविधानले प्रधानमन्त्रालाई संसद विघटनको अधिकार नै दिएको छैन । ओलीले जबरजस्ती विघटन गरेर राजनीतिक स्थायित्व र प्रणालीलाई नै बिथोल्ने काम गरेका छन्,’ नेपालले भने ।

यस्तै, अध्यक्ष प्रचण्डले प्रतिनिधिसभा विघटन सदर भएको अवस्थामा नेपालको शान्ति प्रक्रिया बिथोलिने अवस्था आउन सक्ने चेतावनी दिए । प्रतिनिधिसभा विघटन गरी ओलीले लोकतन्त्र र संविधान नै विघटन गर्न खोजेको बताए । ओलीको निरंकुश स्वेच्छारी कदम सही ठहर्‍याउने काम भएको अवस्थामा शान्ति प्रक्रिया लड्खडाउने भनाइ प्रचण्डको थियो ।

उनले भने, ‘सर्वोच्च अदालतका न्यायामूर्तिहरू र कसैले पनि मुलुकलाई मूठभेडमा लान खोज्नुभएको जस्तो मलाई लाग्दैन । म त युद्धमा जाने कुरा छैन, तीन-तीनवटा चुनाव लडिसक्यौँ । शान्तिपूर्ण रूपले जनतालाई सडकमा आउन अपिल नै गर्छु । तर, ओलीको स्वेच्छारी कदम सदर हुने अवस्था आयो भने शान्ति प्रक्रिया डिरेल हुन्छ ।’

उनले ओलीको प्रतिगमनकारी कदम सच्याउँदै मुलुकलाई बर्बादी बाटोमा नपुर्‍याउने सबैले भूमिका निर्वाह गर्नुपर्ने बताए ।

वरिष्ठ नेता खनालले प्रधानमन्त्रीले आफ्नो कदम राजनीतिक भन्दै भ्रम छरेको आरोप लगाए । प्रधानमन्त्रीको कदम प्रतिगमन भएको खनालको भनाइ छ । 'कुनै पनि प्रधानमन्त्रीले संविधानमाथि गएर कदम चाल्न पाउँदैन ओलीको कदम प्रतिगमन हो राजनीतिक होइन,' खनालले बताए ।

प्रचण्ड-माधव समूहले सर्वोच्च अदालतको फैसला नआउँदासम्म ओलीको कदम सच्याउनका लागि दबाब पुग्नेगरी आन्दोलन गर्ने रणनीति अख्तियार गरेको छ ।

प्रकाशित मिति: शुक्रबार, माघ ९, २०७७ १७:३२