वकिललाई प्रधानन्यायाधीशले भने, 'हामीलाई हतार छ, बहस छिटो टुंग्याउनाेस्'

फाइल तस्वीर

A+ A A-

सर्वाेच्च अदालतकाे संवैधानिक इजलासमा प्रतिनिधिसभा विघटनसम्बन्धी मुद्दाकाे सुनुवाइ जारी छ । प्रधानन्यायाधीश चोलेन्द्रशमशेर राणासहित विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसीको इजलासमा भइरहेकाे सुनुवाइमा अहिले रिट निवेदकतर्फका कानुन व्यवसायी बहसमा छन् ।

बहसका क्रममा अधिवक्ता सुलाेचना धितालले २०४७ सालकाे संविधानले राजनीतिलाई स्थिर गराउन नसकेकाले २०७२ मा संविधान ल्याउनुपरेकाे तर्क गरिन् । 'नयाँ संविधानकाे मूल मर्म नै स्थिरता हाे । त्यसैले सरकार गठन भएकाे २ वर्षसम्म अविश्वास प्रस्ताव ल्याउन नपाइने भनिएकाे हाे', इजलासमा उनले भनिन्, 'प्रधानमन्त्रीले सहजै संसद विघटन गर्न नसक्ने व्यवस्था त्यसैले त संविधानमा राखिएकाे हाे ।'

उनले जनतालाई खोप किन्न पैसा छैन भन्ने सरकारले चुनावका लागि पैसाकाे कमी हुन नदिने भनेकाेप्रति आश्चर्यता प्रकट गरिन् ।

छिटाेछिटाे बहस गर्न राणाकाे आग्रह

त्यसपछि अधिवक्ता कोपिलप्रसाद अधिकारीले बहसका लागि १५ मिनेटको समय माग गरे । यसअघि बुधबार ३० मिनेटभित्र बहस सक्न भनेका प्रधानन्यायाधीश राणाले उनलाई १० मिनेटमा सक्न आग्रह गरे ।

अधिवक्ता अधिवक्ता तथा निवेदक शालिकराम सापकोटालाई पनि उनले १० मिनेटभन्दा बढी समय नलिने भने । 'आज पाँचौँ (नियमित सुनुवाइ) दिन हो । जम्मा १५/१६ जनाको सकिएको छ, यसरी त कहिले सकिएला ?' उनले प्रश्न गरे ।

१३ वटा रिट निवेदनमा बहसका लागि करिब तीन सय जनाले वकालतनामा बुझाएकाे र फैसला आउन ढिलाई हुने भन्दै प्रधानन्यायाधीश राणाले बहसको समय छोट्याउन भनेका हुन् । ‘तपाईंहरू झन्डै तीन सय जना हुनुहुन्छ । परिस्थिति यस्तै छ’, राणाले भने । प्रधानन्यायाधीशले राणाले आफूहरूलाई हतार भएको समेत बताए । 'हामीलाई एकदम हतार छ’, उनले भने ।

प्रकाशित मिति: शुक्रबार, माघ ९, २०७७ १२:३७