रिङ रोडको १०.२ किलोमिटर सडकखण्ड हरियाली बनाउने अभियानमा एनसेल

A+ A A-

एनसेल आजियाटा लिमिटेडले कोटेश्वरदेखि कलंकी सडकखण्डको ग्रीन बेल्ट क्षेत्रमा हरियाली निर्माण तथा संरक्षण गर्ने भएकाे छ । कम्पनीले आफ्नो व्यावसायिक सामाजिक उत्तरदायित्वअन्तर्गत वन तथा भू–संरक्षण विभागसँगको सहकार्यमा उक्त कार्य गरिरहेकाे जानकारी दिएकाे हाे ।

एनसेलकाे सहयाेगमा झण्डै १०.२ किलोमिटर दूरी रहेको यस सडकखण्डको एकान्तकुनादेखि बल्खु सडकखण्डका ग्रीन बेल्ट क्षेत्रमा नमुनाका रूपमा हरियाली निर्माण गर्ने कार्य सम्पन्न भएको छ । यस ग्रीनबेल्ट क्षेत्रलाई एक उदाहरणीय हरित क्षेत्रको रूपमा विकास गरी यस क्षेत्रको संरक्षण गर्ने उद्देश्य एनसेलले लिएको छ ।

यसअघि एनसेलले कोटेश्वरदेखि कलंकी सडकखण्डमा वृक्षरोपणका लागि पनि सहयोग गरेको थियो । हरियाली विकासका साथै एनसेलले पाँच वर्षसम्म यो खण्डमा रहेका ६ हजारभन्दा बढी रुख बिरुवाको हेरचाह गर्दै ग्रीन बेल्टको संरक्षणको काम पनि गर्नेछ ।

एनसेलका प्रमुख कार्यकारी अधिकृत एन्डी चोङले वन तथा भू–संरक्षण विभागसँगको यो सहकार्यले कसरी सार्वजनिक र निजीक्षेत्रको सहकार्यमा प्रभावकारी काम गर्न सकिन्छ भन्ने उजागर गरेको बताए । उनले भने, 'रिङरोडको १०.२ किलोमिटर सडकखण्डको क्षेत्रमा दायाँबायाँ हरियाली निर्माण तथा संरक्षणको कार्य सार्वजनिक–निजी साझेदारीको एक उत्तम उदाहरण हो । यस अभियानले समुदायमा स्वच्छ वातावरण निर्माण गर्दै वातावरण र पर्यावरणसम्बन्धी लक्ष्यप्राप्तिमा योगदान पुर्‍याउने विश्वास लिएका छौँ ।'

वनतथा भू–संरक्षण विभागका महानिर्देशक मनबहादुर खड्काले वृक्षरोपण गर्दै हरियाली बढाउने सरकारको अभियानअन्तर्गत यो रिङरोड ग्रीनबेल्ट योजना कार्यान्वयनका लागि दुई महानगरपालिकाकाे समन्यवयका साथ एनसेलसँग सहकार्य गर्न पाएकोमा खुसी व्यक्त गरे । उनले भने, 'रुख रोप्न सजिलो छ तर यसको हेरचाह गरी हुर्काउने र हरियाली कायम गर्दै फाइदा लिन धेरै गाह्रो हुन्छ । यो काम एनसेलले गर्दै छ । यो योजनाको जिम्मेवारी लिएकोमा हामी एनसेलप्रति आभारी छौँ ।'

ललितपुर महानगरपालिकाका मेयर चिरीबाबु महर्जनले भने, 'यो योजनाले हाम्रो हरियाली विकास तथा वातावरण संरक्षणसम्बन्धी ग्रीन एन्ड ब्लू क्याम्पेनमा ठूलो योगदान दिने भएकाले हाम्रो ललितपुर महानगरपालिका यो योजनाको सफल कार्यान्वयनका लागि आवश्यक पर्ने कुनै पनि सहयोग गर्न तयार छ ।'

एनसेलले काठमाडौं महानगरपालिकामा एक हरित पार्क पनि निर्माण गर्दै छ । यसअघि एनसेलले धनुषाधाम संरक्षित वनको ३३ हेक्टर जमिनमा ५० हजार वृक्षरोपण गरेको थियो । यसका साथै धनुषामा वृक्षरोपण र पर्यावरण संरक्षण तथा प्रवर्द्धनसम्बन्धी जनचेतना अभिवृद्धिका कार्यक्रमहरू सञ्चालन गरेको थियो । यस पहलको सफल कार्यान्वयनपछि सरकारले धनुषाधाम संरक्षित वनलाई ‘खुल्ला चरिचरन तथा अनियमित कटान मुक्त क्षेत्र’ पनि घोषणा गरिसकेको छ ।

प्रकाशित मिति: शुक्रबार, माघ ९, २०७७ १३:१०