‘खोप लिन भ्यान जाँदैछ, ल्याएर कतिलाई लगाउने थाहा छैन’

A+ A A-

भारतले अनुदानमा दिएको कोरोना भाइरसविरुद्धको १० लाख डोज खोप आइतबारसम्म सबै प्रदेशमा पुर्‍याउने सरकारको तयारी छ । गण्डकी प्रदेशको खोप भण्डारण गृह पोखरामा छ । तर, कति खोप गण्डकीमा आउँछ भन्ने जानकारी केन्द्रबाट आइसकेको छैन । खोप कति जनालाई लगाउने हो भन्ने पनि टुंगो नलागेको सामाजिक विकास मन्त्रालयले जनाएको छ ।

मन्त्रालयका स्वास्थ्य महाशाखा प्रमुख शम्भुप्रसाद ज्ञवालीका अनुसार कति खोप आउँछ भनेर जानकारी नभएकाले खोप लगाउनेको संख्या हेरफेर हुनसक्ने सम्भावना देखिन्छ । ‘कति डोज खोप आउने हो यकिन छैन । एक जनालाई दुईपटक लगाउनपर्छ,’ उनले दोधारको स्थिति सुनाए, ‘जति जनाको नाम पठाउँछौँ त्यति आउने हो कि, बढी आउने हो, खोप आएपछि लगाउनेको संख्या हेरफेर हुनसक्छ ।’

स्वास्थ्यकर्मी, सरसफाइकर्मी र एम्बुलेन्स चालक गरेर बिहीबारसम्म साढे १८ हजारको नाम खाेपका लागि प्रदेश सरकारलाई प्राप्त भएको उनले बताए ।

सरकारले कुल जनसंख्याको तीन प्रतिशतलाई खोप दिने भनेको छ । प्रदेशमा पनि त्यहीअनुसार आउने भएकाले गण्डकीमा ७५ हजार जनालाई (कुल जनसंख्या २५ लाख) खोप प्राप्त हुनेछ । एक जनालाई दुई पटक लगाउनुपर्ने भएकाले ३० देखि ३५ हजार जनाले सुरुमा खोप लगाउन पाउने छन् । यसमा स्वास्थ्यकर्मी, महिला स्वयंसेविका, सरसफाइकर्मी र एम्बुलेन्स चालक पहिलो प्राथमिकतामा छन् ।

प्रदेशमा पहिलेदेखि खोप भण्डारण हुँदै आएका दुई वटा फ्रिज प्रदेश स्वास्थ्य आपूर्ति व्यवस्थापन केन्द्रअन्तर्गत छन् । केन्द्रको त्यही फ्रिज कोभिड-१९ को भ्याक्सिन ‘कोभिसिल्ड’ राख्न प्रयोग गरिनेछ ।केन्द्रका निर्देशक खिमबहादुर खड्काका अनुसार कुनै समस्या नभए शुक्रबार बेलुकासम्म खोप पोखरा आइपुग्नेछ । ‘शुक्रबार यहाँबाट गाडी जाँदैछ । सबै कुरा मिल्यो भने बेलुकासम्म आउँछ,’ उनले भने, ‘यहीँ ल्याएर स्टोर गरेर राख्छौँ । निर्देशिका आयो भने एक हप्ताभित्र लगाउन सुरु हुन्छ ।’

महाशाखा प्रमुख ज्ञवालीका अनुसार अहिले दुई वटा फ्रिज सञ्चालनमा छन् । खोप पोखरा आएको तीनदेखि पाँच दिनमा जिल्लामा पुग्ने प्रदेश स्वास्थ्य निर्देशनालयका निर्देशक डा. विनोदविन्दु शर्माले जानकारी दिए । अरू खोपजस्तै माइनस दुईदेखि आठ डिग्री सेन्टिग्रेडमा राखिने भएकाले जिल्लासम्म पुर्‍याउन कुनै समस्या नहुने उनले बताए ।

डा. शर्माका अनुसार जिल्लास्थित भण्डारण केन्द्रमा लगेपछि त्यो खोपलाई विभिन्न केन्द्रमा पुर्‍याइने छ । गण्डकी प्रदेशका ११ जिल्लामा १७ सय खोप केन्द्र रहेको मन्त्रालयका स्वास्थ्य महाशाखा प्रमुख शम्भुप्रसाद ज्ञवालीले जानकारी दिए ।

‘अहिलेलाई नियमित खोप लगाउँदा भइरहेकै कोल्ड क्यारियरले काम चल्छ,’ उनले भने, ‘पछि अरू भ्याक्सिन पनि लगाउनुपर्ने, कोभिड पनि लगाउन पर्दा त्यसको समस्या हुने देखिन्छ ।’

प्रकाशित मिति: शुक्रबार, माघ ९, २०७७ १२:००