इजरायल कामदार पठाउन एमओयूमा हस्ताक्षर, पहिलो चरणमा ५ सय कामदार पठाइँदै

A+ A A-

वैदेशिक रोजगारीमा जाने नेपाली श्रमिकका लागि आकर्षक गन्तव्य मानिएको इजरायलमा पुनः कामदार पठाउने प्रक्रिया कानुनी रुपमा खुलेको छ ।

बिहीबार वैदेशिक रोजगार विभागका महानिर्देशक कुमारप्रसाद दहाल र नेपालका लागि इजरायली राजदूत हनान गोडरले इजरायलमा नेपाली कामदार आपूर्ति गर्ने प्रोटोलग (एमओयू) मा हस्ताक्षर गरेका छन् ।

नेपालबाट इजरायलले नर्सिङ क्षेत्र, अस्पताल, नर्सिङ होम, दिवा सेवा केन्द्र, केयर गिभरलगायतमा नेपाली श्रमिक आपूर्ति गर्नेगरी सम्झौता भएको हो ।

इजरायलमा कामदार पठाउन गत असोजमा भएको श्रम सम्झौताअनुसार अहिले एमओयूमा हस्ताक्षर भएको हो ।

अब चाँडै कामदार पठाउने प्रक्रिया सुरु हुने विभागका महानिर्देशक दहालले बताए ।

गत असोजमा इजरायलका लगि नेपालकी राजदूत अन्जान शाक्य र इजरायली परराष्ट्रमन्त्री गावी अस्केनाजीबीच सरकारीस्तरमा श्रम सम्झौता भएको थियो ।

सोही सम्झौताका आधारमा सन् २०२१ को जनवरीदेखि नेपालबाट श्रमिक छनोट गरेर पठाउने गरी प्रक्रिया अगाडि बढाएको वैदेशिक रोजगार विभागले जनाएको छ ।

सन् २०१५ मा भएको श्रम सम्झौतालाई आधार मानेर दुई देशबीच गत असोजमा पुनः श्रम सम्झौता भएको छ । सोही आधारमा नेपालले कामदार पठाउने गरि प्रक्रिया सुरु गरेको विभागका महानिर्देशक दहालले बताए ।

‘पहिलो चरणमा ५ सय कामदार रोजगारीका लागि इजरायल जाँदै छन् । श्रम सम्झौताका आधारमा हिब्रू भाषा, अंग्रेजी र तालिम लिएका कामदारलाई परीक्षण प्रणालीबाट छनोट गरिन्छ,’ उनले भने, ‘श्रम सम्झौताअनुसार सरकारी तवरबाट नेपाली श्रमिक रोजगारीका लागि इजरायल जानेछन् । विगतमा जस्तै प्रक्रिया हो । सरकारले पठाउने हो । इजरायल रोजगारीमा जानका लागि तालिम, इजरायली भाषा र अंग्रेजी समेत जानेको हुनुपर्छ ।’

नेपालका लागि इजरायली राजदूत हनान गोडरले सन् २०२१ देखि श्रम सम्झौतामा उल्लेख भएअनुसार कामदार लैजाने थालिने बताएका थिए । इजरायल सरकारले नेपाली कामदारलाई रोजगारीको अवसर दिइरहेको र तत्काल नेपालबाट नर्सिङ होमसँग केयर गिभरमा कामदार लिने उनले भनाइ राखेका थिए ।

सन् २०१५ मा सरकारीस्तरमा नै कामदार आपूर्ति गर्ने विषयमा नेपाल सरकारसँग इजरायलले ‘पाइलट प्रोजेक्ट’का रूपमा श्रम सम्झौता गरेको थियो । तर, श्रम सम्झौता भएको ३ वर्षको अवधिमा नै नेपालीका लागि इजरायलको श्रम बजार बन्द भएको थियो ।

प्रकाशित मिति: बिहीबार, माघ ८, २०७७ १२:३०