काठमाडौंमा निजी विद्यालय खुले, सरकारी अझै अलमलमा

A+ A A-

कोरोना भाइरस (कोभिड–१९) का कारण बन्द भएका काठमाडौंका विद्यालय कतै खुलेका छन् भने कतै बन्द नै छन् । कोभिड–१९ संकट व्यवस्थापन केन्द्र (सीसीएमसी) ले बन्द विद्यालय खोल्ने निर्णय गरेसँगै निजी विद्यालयहरूले पठनपाठन पुनः सुरु गरेका छन् । तर, सरकारी विद्यालयहरू भने अझै अलमलमा छन् ।

लकडाउनपछि बन्द मध्यबानेश्वरकाे रत्नराज्य माध्यमिक विद्यालयको गेट खुलाइए पनि विद्यार्थी बोलाइएको छैन । ‘कोरोना जोखिम अझै घटेको छैन । त्यसैले सबै विद्यार्थी बोलाउन नसकिएको हो’, प्रधानाध्यापक रामाशिष यादवले भने, ‘विद्यालयमा २५ सय विद्यार्थी छन् । कोरोनाले समस्या पार्‍याे भने कसले जिम्मेवारी लिने ?’

रत्नराज्यले १ देखि ३ कक्षासम्मका विद्यार्थीलाई विद्यालयमै बाेलाएर पठनपाठन गराइरहेको छ । साना बालबालिकालाई अनलाइनमा पढाउन समस्या हुने र विद्यालयमा बाेलाउँदा पनि सामाजिक दूरी कायम गराउन गाह्राे हुने भएकाले साना कक्षाका विद्यार्थीलाई विद्यालयमै बाेलाएर पठनपाठन गराइएकाे यादवले बताए ।

‘अहिले हामीले १ देखि ३ कक्षासम्मका विद्यार्थीलाई एक दिन बिराएर पालैपालाे बोलाएर पढाइरहेका छाैँ’, उनले भने ।

८ देखि १२ कक्षाका विद्यार्थीलाई भने अनलाइनबाटै पढाउने गरिएको उनले बताए । स्कुल आउने विद्यार्थीलाई पनि मास्क, स्यानिटाइजर अनिवार्य गरिएको छ । एउटा बेञ्चमा दुई जना विद्यार्थी मात्र राख्ने गरिएको छ । अवस्था जटिल भएन भने १५ माघदेखि सबै कक्षा विद्यालयबाटै सञ्चालन गरिने प्रधानाध्यापक यादवकाे भनाइ छ ।

त्रिपुरेश्वरको विश्वनिकेतन माध्यमिक विद्यालयले ११ र १२ कक्षाका विद्यार्थी मात्र बोलाएर पठनपाठन सुरु गरेको छ ।

विश्वनिकेतनमा ३५ सय विद्यार्थी अध्ययनरत छन् । धेरै विद्यार्थी भएकाले सबै कक्षा एकैचोटि सञ्चालन गर्दा संक्रमणको जोखिम हुने भएकाले ११ र १२ कक्षा मात्र सञ्चालन गरिएको सहायक प्रधानाध्यापक गंगा थापाले बताइन् ।

१५ माघसम्ममा सबै कक्षा सञ्चालन गराइने उनले बताइन् । ‘अहिले एउटा बेन्चमा दुई जना राखेका छाैँ । स्यानिटाइजर, मास्क स्कुलबाटै दिइएकाे छ’, उनले भनिन् ।

चिकित्सकहरूले जाडो मौसममा कोरोना जोखिम बढ्न सक्ने शंका गरेका छन् । त्यसमाथि नयाँ प्रकृतिको कोरोना भाइरस नेपालमा पनि पुष्टि भएकाले सावधानी अपनाउनुपर्ने चिकित्सकको भनाइ छ ।

प्रकाशित मिति: बुधबार, माघ ७, २०७७ १७:३३