अर्को सातादेखि नेपालको अन्तर्राष्ट्रिय व्यापारमा एकद्वार प्रणाली लागू हुने

अर्को सातादेखि नेपालको अन्तर्राष्ट्रिय व्यापारमा एकद्वार प्रणाली लागू हुने

A+ A A-

भन्सार विभागले व्यापारसँग जोडिएका सरकारी र निजी गरी ४० वटा निकायमा एकद्वार प्रणाली लागू गर्ने भएको छ ।

आगामी सातादेखि लागू गर्न लागेको एकद्वार प्रणालीका विषयमा विभागले बुधबार अर्थमन्त्री विष्णुप्रसाद पौडेल, उद्योग, वाणिज्य तथा आपूर्तिमन्त्री लेखराज भट्ट र कृषि तथा पशुपंक्षी विकास मन्त्री पद्माकुमारी अर्याललाई जानकारी गराएको छ ।

आयात र निर्यातलाई भन्सारसँग आवद्ध गरी अन्तर्राष्ट्रिय व्यापारलाई सहजीकरण गर्न नेपालमा राष्ट्रिय एकद्वार प्रणाली लागू गर्न थालिएको भन्सार विभागका महानिर्देशक सुमन दाहालले बताए । विभागले आगामी सातादेखि खाद्य प्रविधि तथा गुण नियन्त्रण विभाग, पशु सेवा विभाग र प्लान्ट क्वारेन्टाइन केन्द्रमा एकद्वार प्रणाली सुरू गर्ने जानकारी दिएको हो ।

तीन वटा विभागबाट सुरू गरिने कार्यक्रम चरणवद्ध रूपमा विस्तार गरिने भन्सार विभागले जनाएको छ । विभागका अनुसार एकद्वार प्रणाली सुरू भएपछि तीनवटै विभाग र अन्तर्गतका कार्यालयमा डिजिटल प्रणालीको सुरुवात हुनेछ ।

लाइसेन्स वा अनुमतिका लागि निकास तथा पैठारीकर्ताहरू विभाग तथा कार्यालयमा पुगिराख्नु नपर्ने भन्सार विभागका महानिर्देशक दाहालले बताए । अर्थमन्त्री पौडेलले एकद्वार प्रणाली सुरू भएपछि व्यापारका लागि सहजीकरण हुने, अनियमितता र राजश्व चुहावट नियन्त्रण हुने, कार्य सम्पादन छिटो र प्रभावकारी हुने बताए ।