राष्ट्रिय वाणिज्य बैंकमार्फत बुझाइने कर तथा राजस्व अब मोबाइल बैंकिङबाटै

A+ A A-

राष्ट्रिय वाणिज्य बैंकमार्फत भुक्तानी गर्नुपर्ने कुनै पनि किसिमको कर तथा राजस्व करदाताहरूले अब आफ्नो मोबाइल बैंकिङबाटै सजिलै भुक्तानी गर्न सक्ने भएका छन् ।

साेसम्बन्धी सुविधा उपलब्ध गराउने विषयमा राष्ट्रिय वाणिज्य बैंक र नेपालको अग्रणी भुक्तानी प्रणाली सञ्चालक फोनपे पेमेन्ट सर्भिसबीच सम्झौता भएको छ । सम्झौतापत्रमा राष्ट्रिय वाणिज्य बैंकका प्रमुख कार्यकारी अधिकृत किरणकुमार श्रेष्ठ र फोनपेका प्रमुख टेक्नोलोजी अफिसर दिवस सापकोटाले हस्ताक्षर गरेका हुन् ।

करदाताले आन्तरिक राजस्व विभागअन्तर्गतका कुनै पनि राजस्व कार्यालयको भ्याट, सम्पत्ति कर, व्यवसाय कर तथा अन्य सेवाशुल्क मोबाइल बैंकिङबाट सहजै भुक्तानी गर्न सकिनेछ । यस्तै, वाणिज्य बैंकमार्फत बुझाइने अन्य कुनै पनि किसिमका कर तथा राजस्व भुक्तानी गर्न सकिनेछ । मोबाइल बैंकिङबाट कर तिर्न सकिने भएसँगै करदाताहरूलाई विभिन्न कार्यालयमा गएर लामो लाइन बस्नुपर्ने झञ्झटबाट मुक्ति मिलेको छ ।

यस्ताे सुविधा लिनका लागि मोबाइल बैंकिङ प्रयोगकर्ताले मोबाइल बैंकिङ लगअन नै नगरी बाहिर रहेको मर्चेन्ट पेमन्टको अप्सनमा गई रेभिन्यूमा क्लिक गर्ने र त्यहाँ रहेको सरकारी राजस्व कर (Government Revenue Tax) मा क्लिक गरी करदाता संकेत नम्बर तथा अन्य विवरण भरेर सहजै भुक्तानी गर्न सकिनेछ ।

फोनपे पेमेन्ट सर्भिस नेपाल राष्ट्र बैंकबाट अनुमतिप्राप्त नेपालको भुक्तानी प्रणाली अपरेटर हो । फोनपे नेटवर्कमा ५२ वटाभन्दा बढी बैंक तथा वित्तीय संस्था आवद्ध छन् ।

यस कम्पनीका १ लाख ८० हजारभन्दा बढी मर्चेन्ट र ९० लाख मोबाइल बैंकिङ प्रयोगकर्ता तथा ३२ लाखभन्दा बढी भुक्तानी सेवाप्रदायकका मोबाइल एप्समार्फत यसले सेवा प्रदान गर्दै आएको छ । फोन पे विश्वविख्यात डाटा सुरक्षा मापदण्ड ‘पेमेन्ट कार्ड इन्डस्ट्री डाटा सुरक्षा मापदण्ड’ पीसीआई डीएसएस भीथ्री.टु.वान (PCI DSS v3.2.1) प्रमाणीकरणप्राप्त संस्था हो ।

प्रकाशित मिति: बुधबार, माघ ७, २०७७ १२:००