अस्ट्रेलियाविरुद्धको टेस्ट सिरिज भारतले जित्यो, ऋषभ पन्तको उत्कृष्ट प्रदर्शन

अस्ट्रेलियाविरुद्धको टेस्ट सिरिज भारतले जित्यो, ऋषभ पन्तको उत्कृष्ट प्रदर्शन

A+ A A-

अस्ट्रेलिया विरुद्धको टेस्ट सिरिज भारतले जितेको छ । अन्तिम तथा चौथो खेलमा तीन विकेटले विजयी भएसँगै भारतले चार खेलको सिरिज २-१ ले सिरिज जितेको हो । एक खेल भने ड्र भएको थियो ।

अन्तिम तथा निर्णायक म्याचमा अस्ट्रेलियाले दिएको ३२८ रनको लक्ष्य भारतले ९७ ओभरमा सात विकेट गुमाएर पूरा गर्‍यो । भारतको जीतमा ऋषभ पन्तले उत्कृष्ट पारी खेले । उनले १३८ बलमा एक छक्का र नौ चौकाको सहयोगमा अविजित ८९ रन बनाए ।

त्यस्तै, शुभमन गिलले ९१, चेतेश्वर पुजाराले ५६, कप्तान आजिंक्य रहाणेले २४, वासिङ्टन सुन्दरले २२, मयंक अग्रवालले नौ र रोहित शर्माले सात रनको योगदान दिए । बलिङमा प्याट कमिन्सले चार, नाथन लायनले दुई र जोश हेजलउडले एक विकेट लिए ।

ब्रिसबेनमा भएको चौथो टेस्टमा अस्ट्रेलिया दोस्रो इनिङ्समा २ सय ९४ रन समेटिएपछि भारतले ३२८ रनको लक्ष्य पाएको थियो ।

दोस्रो इनिङ्समा अस्ट्रेलियाका लागि स्टिभ स्मिथले ५५, डेविड वार्नरले ४८, मार्कस ह्यारिसले ३८, क्यामरन ग्रीनले ३७, प्याट कमिन्सले २८, कप्तान टिम पेनले २७, मार्नस लाबुसेनले २५ रन बनाए ।

बलिङमा भारतका मोहमद सिराजले ५, शार्दुल ठाकुरले ४ र वासिङ्टन सुन्दरले एक विकेट हात पारे । पहिलो इनिङ्समा अस्ट्रेलियाले ३६९ रन बनाउँदा भारत ३३६ रनमा अलआउट भएको थियो ।

अस्ट्रेलियाका लागि पहिलो इनिङ्समा मार्नस लाबुसेनले सर्वाधिक १०८ रन बनाए । बलिङमा टी नटराजन, शार्दुल ठाकुर र वासिङ्टन सुन्दरले सर्वाधिक तीन/तीन विकेट लिएका थिए ।

भारतका लागि पहिलो इनिङ्स शार्दुल ठाकुरले ६७, वासिङ्टन सुन्दरले ६२, रोहित शर्माले ४४, मयंक अग्रवालले ३८, कप्तान अजिंक्य रहाणेले ३७, चेतेश्वर पुजाराले २५, ऋषभ पन्तले २३ र मोहम्मद सिराजले १३ रन जोडे । बलिङमा अस्ट्रेलियाका जोश हजलउडले सर्वाधिक पाँच विकेट लिए ।