सेती नदीमा कहिले छुट्ला काठेपुलको भर ?

A+ A A-

बझाङ सदरमुकाम चैनपुरस्थित सेती नदीमा निमार्णाधीन क्रस मोटरेबल पुलको निमार्ण कार्य अन्तिम चरणमा पुगेको छ । झण्डै ८ करोड रुपैयाँको लागतमा निर्माण भइरहेको ६९ मिटर लम्बाइको पानकोट पुल यसै वर्षको चैतसम्ममा सम्पन्न हुने निमार्ण कम्पनी इलाइट कन्स्ट्रक्सनले जनाएको छ । गएको वैशाखमा सम्पन्न गर्ने गरी चैत २०७५ मा सम्झौता भएको थियो । यहाँ फलाम र स्टिलबाट क्रस मोटरेबल पुल निमार्ण हुन लागेको हो ।

निर्माणका आवश्यक सामग्री निर्माणस्थल पानकोटमा आइपुगेको छ । सबै सामान बाहिरबाटै बनेर आएकाले अब फिटिङ र नटबोल्ट कस्ने काम मात्र बाँकी रहेको र पुल सञ्चालनमा आउन बढीमा ३ महिना लाग्ने निमार्ण कम्पनीले जनाएको छ । तोकिएको समयमा निर्माण सम्पन्न गर्ने लक्ष्य लिएर काम गरेको भए पनि कोरोना महामारीका कारण समयमा निर्माण सम्पन्न हुन नसकेको निर्माणको जिम्मा लिएको इलाइट कन्स्ट्रक्सनका प्रतिनिधि कपिल राईले बताए ।

सेती नदी पारी रहेका स्थानीय तहलाई जोड्ने गरी असार २०७३ मा निर्माण सम्पन्न गर्ने गरी उक्त पुलको ठेक्का सम्झौता भएको थियो । झण्डै ७ करोडको लागतमा निलगिरि र जागृति निमार्ण सेवाले संयुक्त रूपमा पुल निमार्णको जिम्मा लिएका थिए । डिजाइन इस्टिमेटमा त्रुटि भएका कारण पुल निमार्ण हुन नसकेको निमार्ण कम्पनीको भनाइ छ । बीचको पिलरका लागि खाल्डो खन्दा ढुंगा भेटिएको भन्दै निमार्ण कम्पनीले काम गर्न नसक्ने जनाएको थियो ।

इस्टिमेटमा त्रुटि भएपछि २०७५ मा इस्टिमेट परिवर्तन गरी पुनः टेन्डर भई निमार्ण कार्य सुरु भएको हो । यसअघि विभिन्न निर्माण कम्पनीसँग ठेक्का सम्झौता भए पनि चैत २०७५ मा इलाइट कन्स्ट्रक्सन प्रालिसँग झन्डै ८ करोडमा क्रसब्रिज बनाउने ठेक्का सम्झौता भएको थियो । यो पुल बनेपछि बझाङको सेतीपारीका साइपाल, तल्कोट, मष्टा, खप्तडछान्ना, थलारा गाँउपालिका र जयपृथ्वी नगरपालिकाबासीले यातायातको सुविधा पाउनेछन् ।

पुल निमार्णको काम अन्तिम चरणमा पुगेपछि पुल बन्ने आशा पलाएको स्थानीय नरेन्द्र उपाध्यायको भनाइ छ । 'पारीका स्थानीय तहहरूमा सडक सञ्जालको पहुँच भए पनि सेती नदीमा पक्की पुल नहुँदा यातायातका साधन वारपार गर्न सकेका छैनन्,' उनले भने । हिउँदमा सेती नदीमा पानी घटेपछि केही महिनाका लागि अस्थायी काठेपुल राखेर यातायातका साधनले ओहोरदोहोर गरे पनि जेठमा काठे पुल बगाएपछि यातायातका सेवा प्रभावित हुने गरेको उनको भनाइ छ ।

पक्की पुल निमार्ण अलपत्र, अझै अस्थायी पुलको भर

ठेकेदारको लापरबाहीका कारण पक्की पुलको निमार्ण कार्य अलपत्र परेपछि बझाङका अधिकांश स्थानीय तह काठेपुलकै भरमा छन् । ठेक्का लिने र समयमा काम नगरी ढिलासुस्ती गर्ने प्रवृत्तिका कारण पुल निमार्णको काम समयमै सम्पन्न हुन सकेको छैन ।

सेती पारीका स्थानीय तह तथा छिमेकी जिल्ला बाजुरा, अछाम र डोटीलाई सडक सञ्जालसँग जोड्ने पक्की पुल निमार्णको समयावधि सकिँदा पनि बन्न सकेका छैनन् । पक्की पुल निमार्ण नभएपछि सेती पारीका स्थानीय तह जोडन हिँउदमा सेती नदीमा काठको पुल बनाइ यातायात सञ्चालनमा ल्याउने गरेका छन् ।

खप्तडछान्ना गाउँपालिकालाई यातायात सञ्जालसँग जोड्न तमैलमा २४ वटा ह्युमपाइप राखेर अस्थायी पुल निमार्ण गरी सञ्चालनमा आएको छ । खप्तडछान्ना गाउँपालिका- ३ दारुगाउँका युवक सिद्धराज खड्काले मंसिरको पहिलो साता करिब २३ लाखको लगानीमा अस्थायी पुल निमार्ण गरेका हुन् । पुल बनेपछि सेतीपारीका खप्तडछान्ना र थलारा गाउँपालिकाका साथै बाजुराका स्थानीयलाई राहत भएको छ । यस्तै, तल्कोट गाँउपालिकाको देवसैनमा पनि अस्थायी काठे पुल निमार्ण गरिएको छ । गाउँपालिकालाई जिल्ला सदरमुकामसँग जोडन स्थानीय तहले अस्थायी काठेपुल निमार्ण गरेको हो ।

ठेक्का लिने तर निमार्ण कार्यमा लापरबाही गर्ने गरेका कारण बझाङमा निमार्णधीन पक्की पुलको निमार्ण कार्य अलपत्र परेको छ । निमार्ण कम्पनीले ठेक्का लिने तर समयमा निमार्ण नगरी राजनीतिक शक्तिको आडमा म्याद थपाइ निमार्ण कार्य अलपत्र पार्ने गरेको स्थानीयको भनाइ छ । ठेक्का लिने तर काम नगर्ने प्रवृत्तिले गर्दा विकासका योजना आए पनि आफूहरूले सुविधा पाउन नसकेको खप्तड छान्ना गाँउपालिकाका रमानन्द जोशीको भनाइ छ ।

तमैलमा निमार्ण हुन लागेको पक्की पुल, थलारा गाँउपालिकाको झनाना बजार नजिकैको पक्की पुल, तल्कोट गाउँपालिकाको देवसैन पुल र केदारस्युँ गाँउपालिकाको नारुगौडामा बन्न लागेको पुल निर्माणको समय गुज्रिसक्दा पनि बन्न सकेका छैनन् । तमैलमा निर्माणाधिन पुलको पनि पुसमा सम्झौता अवधि सकिएको छ । तीन वर्षभित्र सम्पन्न गर्ने सर्तमा के एच कन्ट्क्सन प्रालिले ११ करोड २५ लाख रुपैयाँको लागतमा निर्माण हुने गरि ठेक्का पाएको थियो । निमार्ण कार्यको समायावधि सकिँदा पनि पुलको निमार्ण कार्य सम्पन्न भएको छैन ।

तल्कोट गाउँपालिकाको देवसैन भन्ने स्थानमा सेती नदीमा निर्माण हुनु पर्ने मोटरपुलको ठेक्का २०६८ सालमा भएको थियो । याक्थुहाङ निमार्ण सेवा प्रालिले निर्माणको जिम्मा लिएको सो पुलको काम पनि हालसम्म सुरु हुन सकेको छैन । यद्यपि, कम्पनीले प्रत्येक वर्ष ठेक्का निमार्णको अवधि भने नवीकरण गरिरहेको छ । सेती लोकमार्ग अन्तर्गतको झनानामा निर्माण गर्न लागिएको पक्की पुलको काम पनि अलपत्र अवस्थामा छ । थलारा गाउँपालिकालाई जयपृथ्वी राजमार्गसँग जोड्ने पुल ठेकेदारको बेवास्ताका कारण अलपत्र परेको छ । राजनीतिक संरक्षणका कारण ठेकेदारले निमार्ण कार्यमा ढिलाइ गर्ने गरेको स्थानीयको आरोप छ ।