२० केजीको बोरामा १० केजी चामल, व्यापारीको जवाफ- मुसाले बोरा काट्यो

A+ A A-

गण्डकी प्रदेश बजार अनुगमन टोली आइतबार पोखराका तीन वटा गोदाममा छिर्‍यो ।

टोली पोखरा–५ पर्स्याङस्थित आदर्श स्टोर्स, नारायणी आयल रिफाइनरी र पोखरा–८ फिर्केस्थित दुगड ग्रुपको स्वस्तिक, सनफ्लो तेलको गोदाम पुगेको हो ।

खाने तेल, चामल, चिया लगायतमा मूल्यवृद्धि भएको गुनासो बढेपछि टोली अनुगमनमा निस्किएको हो । अनुगमनको क्रममा नारायणी आयल र दुगड ग्रुपको गोदाममा समस्या भेटिएन ।

खाने तेल र चामलको अवस्था बुझ्न गएको टोलीले तीनवटै गोदामको खरिदविक्री बिल हेर्‍यो । बिक्रेता आफैँले पहिलाको भन्दा बढी मूल्य तिरेकाले अनुगमन टोलीले केही गरेन । आदर्श स्टोर्सले २० केजीको बोरामा १० केजी चामल विक्रीका लागि राखेको पाइयो । किन यसरी राखेको भन्ने प्रश्नमा सञ्चालकले जवाफ दिए, ‘मुसाले बोरा काट्यो ।’

सृष्टि ब्रान्डको चामल त्यहीँ सिलाएर प्याकेजिङ गरेको पाइएको अनुगमन टोलीका संयोजक नारायण आचार्यले बताए । कानुनतः पसलेहरुसँग प्याकेजिङ गर्ने अधिकार हुँदैन । स्टोर्स पछाडिपट्टिको गोदाम हेरेपछि अर्कै आशंका जन्मियो ।

भुइँभरि चामल पोखिएको थियो । ‘२० केजीको बोरामा १० केजी बेच्दा त उपभोक्ताले पत्याउँदैनन् । कमसल वस्तु प्याक गरेर कमसलपन लुकाउने, ढाँट्ने छल्ने मनासय हो कि भन्ने आशंका छ,’ संयोजक आचार्यले भने ।

व्यापारीलाई बोरा सिलाउने मेसिन देखाउन भनियो । उनले बिग्रिएकाले बनाउन लगेको बताए । टोलीले उनलाई उद्योग, वाणिज्य तथा उपभोक्ता हित संरक्षण निर्देशनालयमा बनाउन लगेको मेसिन लिएर आउन भनेको छ । व्यवहारिक हिसाबले व्यापारीको जवाफ सही भए पनि कानुनी हिसाबले आफैँ प्याकेजिङ गर्नु गलत भएको अनुगमन टोलीका सदस्य कपिलनाथ कोइरालाले बताए ।

स्टोर्सबाट अनुगमन टोलीले भ्याट बिल जफत गरेको छ । भ्याट बिल लगातार काट्नु पर्नेमा स्टोर्सले बीचबीचमा काटेको पाइएकाले जफत गरिएको हो । जफत गरिएको बिल आन्तरिक राजश्व कार्यालय पठाइने र उसैले त्यसको कारण खोज्ने अनुगमन टोली संयोजक आचार्यले जानकारी दिए ।

आइतबार खाने तेल र चामलमा अनुगमन गरेको टोलीले फलामे रड, गिट्टी र बालुवाको पनि अनुगमन गर्ने भएको छ । संयोजक आचार्यले सोमबारदेखि निर्माण सामग्रीको मूल्य अनुगमन गरिने जानकारी दिए ।

प्रकाशित मिति: सोमबार, माघ ५, २०७७ १०:१३