ज्योति विकास बैंकद्वारा कपिलवस्तु सामुदायिक अस्पताललाई बेबी वार्मर प्रदान

ज्योति विकास बैंकद्वारा कपिलवस्तु सामुदायिक अस्पताललाई बेबी वार्मर प्रदान

A+ A A-

ज्योति विकास बैंकले कपिलवस्तु सामुदायिक अस्पताल, कपिलवस्तुलाई एक थान बेबी वार्मर प्रदान गरेको छ । अस्पतालको प्राङ्गणमा आयोजित एक कार्यक्रममा राष्ट्रिय आविष्कार केन्द्र र ज्योति विकास बैंकद्वारा संयुक्त रूपमा सो बेबी वार्मर प्रदान गरिएको हो ।

बैंकले आफ्नाे सामाजिक उत्तरदायित्वअन्तर्गत 'हाम्रो विकास प्रवर्द्धन कोष' बाट उक्त सहयाेग गरेकाे बताएकाे छ । बेबी वार्मरले नवजात शिशुको शारीरिक तापक्रम उचित बनाइराख्न सहयोग गर्दछ ।

कार्यक्रममा ज्योति विकास बैंकका तर्फबाट लुम्बिनी, कर्णाली र सुदूरपश्चिम प्रदेश क्षेत्रका क्षेत्रीय प्रमुख कपिल न्यौपाने, बैंकका जीतपुर शाखाका शाखा प्रबन्धक लक्ष्मण के. सी र राष्ट्रिय आविष्कार केन्द्रका तर्फबाट सञ्जयबहादुर सिंह, कपिलवस्तु सामुदायिक अस्पतालका अध्यक्ष रामजी सेन, बाणगंगा नगरपालिका- ४ कपिलवस्तुका वडा अध्यक्ष गणेशबहादुर क्षेत्रीलगायत विभिन्न स्थानीय निकायका पदाधिकारीहरूको उपस्थिति थियाे ।

नवजात शिशुको शारीरिक तापक्रम उचित राख्न प्रयोग हुने बेबी वार्मरबाट कपिलवस्तु सामुदायिक अस्पतालमा प्रसूति सेवा लिन आउने वार्षिक करिब ५ सय जना प्रत्यक्ष रूपमा लाभान्वित हुनेछन् । सो कार्यक्रमको अवसरमा राष्ट्रिय आविष्कार केन्द्रकाे तर्फबाट पीपीई र फेसशिल्डजस्ता कोरोना भाइरस नियन्त्रणमा प्रयाेग हुने स्वास्थ्य सामग्रीसमेत अस्पताललाई प्रदान गरिएको थियो ।

नेपाली समाजमा स्थानीय तहमा सुषुप्त रूपमा रहेका सम्भावनाको पहिचान गरी त्यस्ता सम्भावनालाई उजागर गर्न सहयोगी बन्ने मूल उद्देश्यबाट निर्देशित 'हाम्रो विकास प्रवर्द्धन कोष' मार्फत ज्योति विकास बैंकले विभिन्न सामाजिक संस्था तथा नागरिकसँग प्रत्यक्ष रूपमा जोडिएर सामाजिक उत्तरदायित्वसम्बन्धी कार्यहरू गर्दै आएको छ ।

बैंकले १२औं वार्षिकोत्सवको अवसरमा डा. महावीर पुनद्वारा प्रवर्द्धित राष्ट्रिय आविष्कार केन्द्रलाई १० वटा 'न्यानो नानी' बेबी वार्मर बनाई देशका विभिन्न ग्रामीण तथा पहुँच नपुगेका अस्पताललाई हस्तान्तरण गर्ने सहकार्यका लागि ८ लाख रुपैयाँ प्रदान गरेको थियो ।

हाल बैंकले १०५ शाखा कार्यालय, १ एक्सटेन्सन काउन्टर तथा ६१ वटा एटीएममार्फत सेवा उपलब्ध गराउँदै आइरहेको छ । हालसम्म बैंकले ३ लाखभन्दा बढी खाताबाट करिब ४५ अर्ब ८५ करोड निक्षेप संकलन गरी २३ हजारभन्दा बढी ऋणीलाई करिब ३७ अर्ब ५९ करोड रुपैयाँ कर्जा लगानी गर्न सफल भएको छ ।

प्रकाशित मिति: आइतबार, माघ ४, २०७७ १७:१४