शहीद गंगालाल राष्ट्रिय हृदय केन्द्रमा अब अनलाइनबाटै एपोइन्टमेन्ट लिन सकिने

शहीद गंगालाल राष्ट्रिय हृदय केन्द्रमा अब अनलाइनबाटै एपोइन्टमेन्ट लिन सकिने

A+ A A-

शहीद गंगालाल राष्ट्रिय हृदय केन्द्रमा अब अनलाइनबाटै एपोइन्टमेन्ट लिन सकिने भएकाे छ । शहीद गंगालाल राष्ट्रिय हृदय केन्द्र कोजेन्ट हेल्थले नेपालको अग्रणी भुक्तानी सेवा प्रदायक ई-सेवाको सहकार्यमा त्यस्ताे सेवा उपलब्ध गराएकाे हो ।

साेसम्बन्धी सम्झौतापत्रमा शहिद गंगालाल राष्ट्रिय हृदय केन्द्रको तर्फबाट मेडिकल डाइरेक्टर डा. चन्द्रमणि अधिकारी र कोजेन्ट हेल्थको तर्फबाट प्रबन्ध निर्देशक डेनियल डी श्रेष्ठले हस्ताक्षर गरेका छन् ।

सम्झौतासँगै शहीद गंगालाल अस्पतालमा उपचार गर्न तथा डाक्टरसँगको परामर्शका लागि ई-सेवा मोबाइल एप्लिकेसनमार्फत अनलाइन एपोइन्टमेन्ट लिन सकिनेछ । अनलाइन एपोइन्टमेन्ट सेवाले अस्पतालका ओपीडी सेवाहरू चुस्त बनाउन र बिरामीहरूको सन्तुष्टि बढाउन मद्दत पुग्ने अपेक्षा गरिएको छ ।

बिरामीले घरबाटै डाक्टरसँग एपोइन्टमेन्ट लिने र भुक्तानी गर्न सक्ने हुँदा अस्पतालमा लाइन लाग्नुपर्ने झञ्झटबाट मुक्ति पाइनुका साथै समयको समेत बचत हुने ई-सेवाले जनाएकाे छ । अहिलेको कोभिड १९ को महामारीका बेला यो सेवाले अझ धेरै सहजता ल्याउनेछ । कोजेन्ट हेल्थ र ई-सेवाले अस्पतालहरूमा अनलाइनबाट एपोइन्टमेन्ट लिन सकिने सेवाको सुरु गरेसँगै यस प्लेटफर्ममा आवद्ध हुने अस्पतालको संख्या बढ्दो छ ।

कोजेन्ट हेल्थ प्रालि स्वास्थ्य सूचना प्रविधि क्षेत्रको नवप्रवर्तक कम्पनी हो । कम्पनीले इलेक्ट्रोनिक मेडिकल रेकर्ड (ईएमआर) मा आधारित अस्पताल तथा स्वास्थ्य संस्थाका व्यवस्थापनलाई पूर्ण रूपमा डिजिटलाइज गर्नका लागि प्रविधि निर्माणको काम गर्दै आएको छ ।

कोजेन्ट हेल्थ र ईसेवाद्वारा निर्मित ई–एपोइन्टमेन्ट र क्यूआर पेमेन्टलगायत कोजेन्ट ईएमआर, कोजेन्ट ईएमआर वेब र स्मार्ट स्वास्थ्य जस्ता प्रविधिहरू नेपालभरका सयभन्दा बढी अस्पताल र स्वास्थ्य संस्थामा प्रयोग भइरहेका छन् ।

प्रकाशित मिति: आइतबार, माघ ४, २०७७ १६:१३