न्यायाधीश सपनाको इमानमाथि इजलासमै उठ्यो प्रश्न

प्रतिनिधि सभा विघटनसम्बन्धी मुद्दाको छिनोफानो गर्न गठित संवैधानिक इजलासमा छानिएकी न्यायाधीश सपना प्रधान मल्लमाथि इजलासमै नैतिकताको प्रश्न उठेको छ । रिट निवेदकका तर्फबाट बहस गर्ने वरिष्ठ अधिवक्ता सुनिल पोखरेलले संविधान बनाउने व्यक्ति नै त्यसको व्याख्या गर्ने ठाउँमा पुगेको भन्दै कटाक्षसहित इमानको प्रश्न उठाएका हुन् ।

बहसका क्रममा पोखरेलले भने, ‘संसारमा थोरै मान्छे भाग्यमानी हुन्छन् । त्यस्तै भाग्यमानी श्रीमान हुनु्हुन्छ, सपन प्रधान मल्ल । किनभने उहाँ संविधान निर्माणमा सामेल हुनुभयो । आज संविधानको व्याख्या गर्ने ठाउँमा हुनुहुन्छ । यो ठूलो सौभाग्य हो ।’

मल्ल यसअघि नैतिकतामै प्रश्न उठेपछि इजलासबाट बाहिरिएका न्यायाधीश हरिकृष्ण कार्कीको ठाउँमा छनौट भएकी हुन् । मल्ल पहिलो संविधानसभामा तत्कालीन नेकपा एमालेको कोटाबाट समानुपातिक सभासद् बनेकी थिइन् ।

मल्ल संवैधानिक इजलासमा छानिएपछि नै उनीमाथि मुद्दाको एउटा पक्ष प्रधानमन्त्री केपी ओलीसँग बालुवाटारमा भेट गरेको आरोप लागेको छ । तर सर्वोच्च अदालतले विज्ञप्ति निकालेर यसबारे खण्डन गर्दै भ्रम फैलाउनेलाई कानुनी कारबाही गर्न सक्ने चेतावनी दिएको थियो ।

भेटबारे २ माघको इजलासमा रिट निवेदक पक्षकी शशि श्रेष्ठले कुरा उठाएकी थिइन् । लगत्तै सर्वोच्चको खण्डन आएको थियो । ३ माघमा प्रधानमन्त्री ओलीले समेत भेटबारे खण्डन गरेका थिए ।

मल्लको ठाउँमा रहेका न्यायाधीश कार्की ०७२ मा ओली पहिलोपटक प्रधानमन्त्री छँदा महान्यायधिवक्तामा नियुक्त भएका थिए । त्यही भएर कार्कीले विवादको प्रमु्ख पात्र प्रधानमन्त्री ओली जोडिएको मुद्दा सुनुवाई गर्दा स्वार्थ बाझिने भन्दै प्रश्न उठेको थियो । पहिलो र दोस्रो सुनुवाइमा बसेका कार्की २२ पुसको इजलासबाट नबस्ने घोषणा गरेका थिए । उनको ठाउँमा छानिएकी मल्लमाथि समेत नैतिकताकै प्रश्न पुनः उब्जिएको हो ।

प्रकाशित मिति: आइतबार, माघ ४, २०७७ १५:३९