१० महिनापछि खुले काठमाडौंका विद्यालय (फोटो फिचर)

A+ A A-

कोभिड-१९ का कारण बन्द रहेका काठमाडौं महानगरपालिकाभित्रका विद्यालय आइतबारदेखि खुलेका छन् । कोभिड-१९ संक्रमणका कारण गत ११ चैतदेखि लकडाउन भएपछि बन्द रहेका काठमाडौं महानगरपालिकाभित्रका विद्यालय आजदेखि खुलेका हुन् ।

काठमाडौं महानगरपालिकाले भौतिक दूरी कायम गरेर स्वास्थ्य मापदण्ड पूरा गर्न सक्ने विद्यालयले विद्यार्थीको उपस्थितिमा विद्यालय खोल्न सकिने बताएपछि आइतबारदेखि महानगरपालिकाभित्रका केही विद्यालय खुलेका हुन् ।

कतिपय विद्यालयले दुई सिफ्टमा कक्षा सञ्चालन गरेर विद्यार्थीको चाप घटाएका छन् । विजय स्मारक माध्यमिक विद्यालयका प्रध्यानाध्यापक डिल्लीप्रसाद शर्माले आइतबारदेखि आफ्नो विद्यालय भौतिक रूपमा पठनपाठन गर्ने गरी खुलेको जानकारी दिए ।

नर्सरीदेखि कक्षा ५ सम्म एक सिफ्ट र ५ कक्षादेखि १० कक्षासम्म अर्को सिफ्ट गरी विद्यालय सञ्चालन गरिने प्रधानाध्यापक शर्माले बताए ।

काठमाडौंका केही विद्यालय आइतबारदेखि खुले पनि सम्पूर्ण विद्यालय खुल्न भने अझै केही दिन लाग्ने भएको छ । कतिपय विद्यालयले भने पूर्वतयारी गरिरहेको र काठमाडौं महानगरपालिकाको औपचारिक पत्र प्राप्त नगरेको भन्दै विद्यालय खोलिसकेका छैनन् ।

केही दिनपछि पठनपाठन सञ्चालन गर्ने उनीहरूको तयारी रहेको छ । रत्नराज्य माध्यमिक विद्यालयका प्रध्यानाध्यापक रामाशिष यादवले शिक्षक र विद्यार्थी विद्यालय आउन उत्सुक भए पनि पूर्वतयारी गर्न समय लाग्ने भएकाले केही दिनमा विद्यालय खोल्ने बताए ।

कतिपय विद्यालयले अनलाइन प्रणालीमार्फत कक्षा सञ्चालन गरिरहेका थिए । भौतिक रूपमा विद्यालय सञ्चालन गरिएसँगै विद्यार्थी मास्क प्रयोगसहित विद्यालय जान थालेका छन् ।